Lücas
17 Tsënam qateqninkunata kënö nirqan: “Jutsaman* chätsikoqkuna kanantaqa manam imapis michanqatsu. Tsënö kaptimpis, ¡allaw jukkunata jutsaman chätseq nuna! 2 Pishi wamranö kaqkunata jutsaman* chätseqpaqqa,* rumi mulinuta kunkanman warkurkur lamarman jitarkuyanqanmi mas alliqa kanqa.+ 3 Cuidädu kayë. Creikoq mayiki jutsata* ruraptinqa, corregi,+ y arrepentikuptinqa, perdonëkuy.+ 4 Cada junaq qanchis kuti contrëki jutsata* ruraptimpis, qanchis kuti kutimur ‘arrepentikümi’ nishuptikiqa, perdonëkunëkim”.+
5 Tsëpitanam apostolkunaqa Señorta, “mas markäkuyänäpaq o yärakuyänäpaq yanapëkayämë”+ nir rogayarqan. 6 Tsënam Señorqa pëkunata kënö nirqan: “Markäkuyanqëki o yärakuyanqëki mostäza murunöllapis kaptinqa, möra plantata,‘¡këpita jipikar lamarman plantakë!’ niyaptikipis, cäsuyäshunkimanmi.+
7 Sirwishoqnikikuna chakrachö yapyanqampita* o mitsinqampita kutimuptin, ¿mëqëkitan, ‘mikunapaq kanan höra mësaman shamuy’ niyankiman? 8 Tsëpa rantinqa, ¿manatsuraq, ‘cenanäpaq imallatapis ruramuy, y mikur y upur ushanqäyaq mandilnikita watakurkur sirwimë, tsëpitanam qamqa mikunki y upunki’ niyankiman? 9 Mandayanqëkita ruranqampitaqa manachi sirwishoqnikikunata agradecikuyankimantsu, ¿aw? 10 Tsënölla qamkunapis mandayäshunqëkita rurar usharirqa, kënö niyë: ‘Mana imapaqpis väleq sirwipakoqkunallam kantsik. Noqantsikqa ruranantsik kaqllatam rurarquntsik’”.+
11 Jerusalenman ëwëkarmi Jesusqa Samaria y Galilëa provinciapa pasarqan. 12 Juk caserïuman yëkuykarnam, lepra qeshyayoq chunka nunakunawan tinkurqan, peru pëkunaqa karullachömi shäkuriyarqan.*+ 13 Y fuertipam, “¡Jesus, Maestru, llakipëkayämë!”* niyarqan. 14 Pëkunata rikëkurnam Jesusqa, “rikäyäshunëkipaq sacerdötikunaman ëwayë”+ nirqan. Tsënam ëwëkarnin leprankunapita alliyaskiyarqan.*+ 15 Pëkunapita jukninmi, alliyashqa kanqanta cuentata qokurir, Teyta Diosta fuertipa alabar kutirqan. 16 Y chakin kaqman ëwëkur urkumpis patsaman chanqanyaq qonqurikuykurmi Jesusta agradecikurqan. Tsë nunaqa Samariapitam karqan.+ 17 Tsëta rikëkurnam Jesusqa nirqan: “Chunkanmi leprapita alliyäyashqa ¿aw? Tsëqa, ¿mëtan isqun kaqkunaqa? 18 Manam mëqampis Teyta Diosta alabaq kutiyämushqatsu, sinöqa kë juk nacion nunallam”. 19 Tsënam tsë nunata, “sharkur ëwakuy, markäkoq o yärakoq karmi alliyarqunki”+ nirqan.
20 Diospa Gobiernun imë shamunampaq kaqta fariseukuna tapupäyaptinnam,+ pëqa kënö nirqan: “Diospa Gobiernunqa manam llapankuna rikëkäyaptintsu shamunqa. 21 Manam ‘¡rikäyë, këchömi këkan!’ o ‘¡washachömi këkan!’ niyanqatsu. Awmi, Diospa Gobiernunqa qamkunachönam këkan”.+
22 Tsëpitanam qateqninkunata kënö nirqan: “Ichikllachönam Nunapa Tsurinta rikëta munarpis, rikëta puëdiyankinatsu. 23 Nunakunaqa, ‘¡rikäyë, washachömi këkan!’ o ‘¡rikäyë, këchömi këkan!’ niyäshunkim. Peru ama yarquyankitsu ni qepankunata cörriyankitsu.+ 24 Imanömi räyu tillapyanqampis ciëlupa juk kuchumpita juknin kuchunyaq atsikyan, tsënömi Nunapa Tsurimpis+ junaqninchö kanqa.+ 25 Tsënö kaptimpis, puntataqa imëka sufrimientuparan pasanan, y kanan witsan nunakunaran despreciayänan.+ 26 Noëpa+ tiempunchö pasanqannöllam, Nunapa Tsurimpa junaqninchöpis pasanqa:+ 27 Noë arcaman yëkunqan junaqyaq+ y Alläpa Tamya* shamur llapankunata ushakätsinqan junaqyaqmi,+ nunakunaqa mikur y upur kayarqan. Ollqukunapis y warmikunapis casakurmi këkäyarqan. 28 Y Lotpa+ tiempunchö pasanqannöllam pasanqa. Tsë tiempu nunakunaqa, mikur, upur, rantikur, rantipakur, murupakur y wayikunata rurarmi këkäyarqan. 29 Peru Sodömapita Lot yarqunqan junaqmi, ninawan azufri ciëlupita tamyamuptin llapankuna ushakäyarqan.+ 30 Tsënöllam Nunapa Tsurin nunakunata juzganan junaqpis pasanqa.+
31 Tsë junaqqa, wayi janan azoteachö këkaqqa, ama wayi rurinchö cösasninkunata jipeq yëkutsuntsu, tsënölla chakrachö këkaqpis, ama qepachö dejanqan cösaskunaman kutitsuntsu. 32 Yarpäyë Lotpa warminta ima pasanqanta.+ 33 Vïdanta imëkanöpa salvëta munaqqa, wanunqam o wañunqam; peru vïdanta oqraqqa, salvanqam.+ 34 Qamkunatam këta nï:* tsë paqasqa ishkaq nunakuna cämachö këkäyaptinmi, jukninta apakuyanqa, y jukninta dejariyanqa.+ 35 Ishkaq warmikuna tsë mulinullachö aqëkäyaptinmi, jukninta apakuyanqa, y jukninta dejariyanqa”. 36 * 37 Tsëta wiyëkurnam pëkunaqa, “¿mëchötan tsëqa kanqa, Teytë?” nir tapuyarqan. Tsënam pëqa, “ayakuna këkanqanmanmi pichakkunaqa* juntakäyanqa” nirqan.+