Hëchus
10 Cesarëa markachömi Corneliu jutiyoq nuna karqan. Pëqa Italia soldädukuna* niyanqanta mandaqmi* karqan. 2 Pëqa wayinchö kawaqkunawan juntum Diosta adoraq y respetaq. Wanëkaqkunatam* yanapaq, y Teyta Diosmanmi imëpis mañakoq. 3 Las tres de la tardinönam,*+ suëñuyninchönö cläru rikarqan Teyta Diospa angelnin pë këkanqanman yëkur, “¡Corneliu!” neqta. 4 Corneliuqa alläpa mantsakashqa rikararmi, “¿imatan pasashqa Teytë?” nir tapurqan. Tsënam pëqa kënö nirqan: “Teyta Diosqa mañakunqëkitam wiyashqa y waktsakunata yanapanqëkitam rikashqa, y pëqa llapantam yarparëkan.+ 5 Tsëmi Pëdru nir reqiyanqan Simon jutiyoq nunata apayämunampaq, Jöpi markaman nunakunata mandë. 6 Pëqa lamar kuchunchö kawaq qarawan trabajaq Simonpa wayinchömi posadashqa këkan”. 7 Tsënam parlapaqnin angel ëwakushqanllachö, ishkaq sirweqninkunata y Diosta respetaq sirweqnin soldäduta qayatsirqan, 8 y llapan pasanqanta willëkurmi Jöpi markaman mandarqan.
9 Waränin junaq nänipa ëwar markaman chëkäyaptinnam, Pëdruqa pullan junaqnö* Teyta Diosman mañakoq wayi janan azoteaman ëwarqan. 10 Peru alläpa mallaqarmi mikuyta munarqan. Y mikuyta rurayanqanyaqmi suëñuykaqnö tikrarqan,+ 11 y ciëlu kicharëkaqta y chuskun kuchumpita watashqa lïnupita jatun säbanas niraq patsaman urëkämoqtam rikarqan. 12 Tsëpa rurinchömi chusku chakiyoq tukuyläya animalkuna, lätëpa pureq animalkuna y ciëluchö volaq* pishqukuna këkäyarqan. 13 Tsënam, “¡sharkuy Pëdru, pishtar mikuy!” neqta wiyarqan. 14 Pëdrunam, “Manam tsëtaqa imëpis rurashaqtsu Teytë. Diospa rikëninchö mana limpiu y melanëpaq kaqkunataqa, manam imëpis mikurqötsu” nirqan.+ 15 Tsënam yapë parlapar, “ama Teyta Dios limpiuyätsinqanta mana limpiupaq churar sïguinatsu” nirqan. 16 Kima kutichöpis tsënö neqtam wiyarqan, tsëllanam säbanas niraqqa ciëluman kutikurqan.
17 Pëdruqa suëñuyninchönö rikanqanman y tsëkuna ima ninan kanqanmanmi pensar këkarqan. Tsëyaqnam Corneliu mandanqan nunakunaqa Simonpa wayin mëchö kanqanta tapukushqa kayarqan, tsë wayipa punkunchönam këkäyarqan.+ 18 Y qayakurmi Pëdru nir reqiyanqan Simon tsëchö posadakushqa o mana posadakushqa kanqanta tapukuyarqan. 19 Suëñuyninchönö rikanqanman Pëdru pensëkaptinllaraqmi santu espïrituqa+ kënö nirqan: “¡Rikë! Kimaq nunakunam qampaq tapukuykäyan. 20 Noqam pëkunata mandamurqö. Tsëmi urë y imapaqpis mana yarpachakur pëkunawan ëwë”. 21 Tsënam Pëdruqa tsë nunakuna këkäyanqanman urar, “këchömi këkä, noqam ashiyanqëki nuna kä. ¿Imaqtan shayämurqunki?” nirqan. 22 Pëkunanam niyarqan: “Corneliuqa+ soldädukunata mandaq, allita ruraq y Teyta Diosta respetaq nunam, llapan judïukunam pëpaq allita parlayan. Pëtam limpiu angelninwan Teyta Dios mandashqa wayinman invitashunëkipaq y llapan ninqëkita wiyakunampaq”. 23 Tsënam Pëdruqa yëkuyänampaq nirqan, tsëchömi posadakuyarqan.
Waränin junaqnam, sharkur pëkunawan ëwakurqan, y Jöpi markapita wakin wawqikunam pëwan ëwayarqan. 24 Tsëpita juk junaqtanam Cesarëa markaman charqan y Corneliuqa wayinman qayatsinqan kastankunawan y kuyë amïgunkunawanmi shuyëkarqan. 25 Pëdru wayinman yëkuriptinnam, Corneliuqa ëwar respetar chakin kaqman qonqurikuykurqan. 26 Tsënam Pëdruqa, “sharkuy noqapis nunallam kä”+ nir sharkatsirqan. 27 Pëwan parlar parlar wayiman yëkurqa, atska nunakunatam juntarëkaqta tarirqan. 28 Pëkunatam kënö nirqan: “Qamkunaqa allim musyayanki judïu nuna, juk kasta nunakunawan juntakunqan o pëkunaman witinqanqa, leypa contran kanqanta.+ Peru Teyta Diosmi cläru musyatsimashqa, pï nunatapis mana limpiutanö o melanëpaqtanö mana rikänäpaq.+ 29 Tsëmi ashimaq shayämuptin, upälla shamurqö. Tsëqa kanan niyämë imapaq qayatsiyämanqëkita”.
30 Tsënam Corneliuqa kënö nirqan: “Chusku junaqnam pasashqa kanan las tres de la tardinö,* wayïchö Diosman mañakur këkaptï chipapëkaq röpayoq nuna puntäman yurirkamur 31 kënö nimanqampita: ‘Corneliu, Teyta Diosmi mañakunqëkita wiyashqa y waktsakunata llakipar* yanapanqëkitam yarpashqa. 32 Tsëmi Pëdru nir reqiyanqan Simonta pushayämunampaq, Jöpi markaman nunakunata mandë. Pëqa lamar kuchunchö kawaq qarawan trabajaq Simonpa wayinchömi posadakushqa këkan’.+ 33 Tsëmi pëkunata qamman mandamurqä y qamqa mana negakurmi shallämurqunki. Kananqa Teyta Jehovä* mandashunqëkita wiyayänäpaqmi, llapäkuna Diospa rikëninchö juntarëkäyä”.
34 Tsënö niyaptinnam Pëdruqa kënö nirqan: “Kananmi rasumpa entiendï, Teyta Diosqa llapan nunatapis igualpa rikanqanta,+ 35 më nacionpita kayaptimpis pëta respetaqkunata y allita ruraqkunataqa shumaq chaskinqanta.+ 36 Pëmi yamë kawakuypaq alli noticiakunata Jesucristuwan willatsir,+ Israelpa tsurinkunaman palabranta chätsirqan. Jesucristum llapankunapa Señornin.+ 37 Qamkunaqa musyayankim bautizakuyänampaq Juan willakur ushariptin, Galilëa+ provinciapita qallëkur entëru Judëa provinciachö imapita parlayanqanta. 38 Nunakunaqa Nazaretpita Jesuspaq, santu espïrituwan y poderwan Teyta Dios imanö akranqampaq+ y pëwan kaptin+ allikunata rurar y Diablu sufritsinqan nunakunata alliyätsir+ wakpa këpa ëwanqampitam parlayaq. 39 Noqakunam judïukuna kawayanqan markakunachö y Jerusalenchö llapan ruranqanta rikaq testïgukuna kayä, peru pëkunaqa qeruman warkurmi wanutsiyarqan. 40 Tsënö kaptimpis kima junaqta kawatsimurmi,+ Teyta Diosqa nunakunata yuripunanta* permitirqan, 41 peru manam llapan nunakunatsu, sinöqa Teyta Dios puntallapitana akranqan testïgukunallatam. Awmi, noqakunallata, wanunqampita kawarimunqanchö pëwan juntu mikoq y upoq kaqkunallata.+ 42 Tsëpitanam kawëkaqkunapa y wanushqakunapa+ jueznin kanampaq Teyta Dios churanqanta, nunakunata willayänäpaq y llapanta musyatsiyänäpaq mandayämarqan.+ 43 Diospa llapan willakoqninkunapis, pëman markäkoqkuna o yärakoqkuna jutinrëkur+ jutsankunapita* perdonta chaskiyanqanta nirmi pëpaq willakuyan”.+
44 Pëdru tsëkunapaq manaraq parlar ushaptinmi, Diospa palabranta* wiyakuykaqkunaman santu espïritu urämurqan.+ 45 Juk nacion nunakunapis Teyta Dios qarakunqan* santu espïrituta chaskiyanqanta rikarmi, ishpakuyänampa puntanchö señalakushqa Pëdruwan ëwaq creikoqkunaqa espantashqa këkäyarqan. 46 Tsënöqa këkäyarqan, juk idiömachö parlayanqanta y Diosta alabayanqanta wiyarmi.+ Tsëpitanam Pëdruqa kënö nirqan: 47 “Kë nunakunaqa noqantsiknömi santu espïrituta chaskiyashqa, tsëqa ¿pillapis yakuta negar bautizakuyänanta michëta puëdinmantsuraq?”.+ 48 Tsënö nirmi Jesucristupa jutinchö bautizayänampaq mandakurqan.+ Tsëpitanam juk ishkë junaqkuna pëkunawan quedakunampaq rogayarqan.