Proverbius
11 Teyta Jehoväqa, pisheqta pesaq* balanzataqa alläpam melanan,
2 Orgullösu tikrakurirqa penqakuychömi ushayanqa,+
peru humildi nunaqa Teyta Dios yachaq kanqantam alli entiendin.+
3 Llapan shonqunkunawan Teyta Diosta cäsukoqkunaqa allikunata rurarmi kawakuyan,+
peru mana alli nunakunaqa, mana allikunata rurarmi imëka mana alliman chäyan.+
4 Mana alli nunakunata Teyta Dios ushakätsinqan junaqqa,+ rïcu kayanqampis manam salvanqatsu,
peru allillata ruraq nunakunaqa salvakuyanqam.+
5 Alli nunakunaqa, alli nänipa ëwaq cuentam allikunata rurar kushishqa kawakuyan,
peru mana alli nunakunaqa, mana allikunata rurayanqampitam mana allichö ushayanqa.+
6 Alli nunaqa, allikunata ruranqampitam salvakunqa,+
peru mana confiakuypaq nunataqa mana alli munëninkunam vencinqa.+
7 Mana alli nuna wanuriptinqa, kallpasapa kar imëka rurëta munanqan y tarita munanqampis pasëpam* ushakärin.+
8 Alli nunataqa, imëkata sufriptimpis yanapayanqam,
peru mana alli nunaqa, alli nunapa rantinmi sufrinqa.+
9 Teyta Diospa contran churakaqkunaqa, parlayanqanwanmi nuna mayinkunata mana allikunaman chätsiyan,
peru alli nunakunaqa, imatapis alli musyarmi pëkunapita librakäyan.+
10 Alli nunakuna llapampaqpis alli kayaptinqa, markanchö nunakunaqa kushikuyanmi,
y mana alli nunakuna wanuyaptinqa llapanmi kushikuyan.+
11 Alli kaqta ruraq nunakuna bendicionta chaskiyaptinmi, markankunapis mas reqishqa tikrarin,+
peru mana alli nunakunaqa, parlayanqanwanmi markankunata ushakäratsiyan.+
12 Imatapis mana entiendeq nunaqa, nuna mayintam desprecian,
peru alli pensëta yachaq nunaqa upällam kakun.+
13 Cuentustëru nunaqa, jukkuna parlakuyanqanta wiyarirmi willakurna purirëkan,+
peru confiakuypaq nunaqa imata musyarpis upällam kakun.
14 Alli consejakoqkuna mana kaptinqa nunakuna sufriyanmi,
peru consejaqninkuna mëtsikaq kayaptinqa, imëka rurayanqampis allim yarqun.*+
15 Jukpa jaqanta pagakunampaq änikoq nunaqa, mana allichömi ushanqa,+
peru jukpa jaqanta pagakunampaq mana änikoq nunaqa tranquïlum kawakunqa.
16 Alli shonquyoq warmitaqa alli kanqampitam llapampis alabayan,+
peru mana alli nunakunaqa, jukkunapa imëkankunatam apakuyan.
17 Alli nuna* ruranqankunaqa kikintapis yanapanqam,+
peru mana alli nuna ruranqankunaqa kikimpaqpis mana allim kanqa.*+
18 Mana alli nunakuna imatapis mana allita rurar tariyanqankunaqa, manam imapaqpis välintsu,+
peru alli kaqkunata ruraqkunaqa rasumpam alli päguta chaskiyan.+
19 Alli kaqkunallata imëkanöpapis ruraqkunaqa kawayanqam,+
peru mana allikunallata ruraqkunaqa wanuyanqam.
20 Shonqunchö mana allikunallata pensaq nunataqa Teyta Jehoväqa alläpam melanan,+
peru imëpis allikunallaman yarparaq nunataqa kuyanmi.+
21 Këtam cläru musyanëkita munä: mana alli nunaqa manam castïgupita salvakunqatsu,+
peru alli nunapa tsurinkunaqa salvakuyanqam.
22 Shumaqllan karpis mana entiendikoq warmiqa,
kuchipa senqanchö yakarëkaq örupita rurashqa shumaq ärunömi.
23 Alli nunakuna munayanqanqa imapis allillam,+
peru mana alli nunakuna imatapis munayanqanqa Teyta Diostam cöleratsin.
24 Nuna mayinta imatapis voluntäwan qarëkoq kaqqa mastam tarin,+
peru këkäpuptin nuna mayinta mana qaraqqa waktsam tikran.+
25 Nuna mayinta imallawampis yanapaqqa imëkayoqmi tikranqa.+
Yanapakoq kaqtaqa kikintapis yanapayanqam.+
26 Tsaki mikuyta kikinllapaq quedatsikoq nunataqa llapankunam maldiciyanqa,
peru rantikoq nunapaqqa allitam parlayanqa.*
27 Wakinkunata jinan höra yanapaq nunataqa kuyayanqam,+
peru wakinkunata mana allita ruraq nunaqa, kikinmi mana allichö ushanqa.+
28 Riquëzankunaman confiakoq nunaqa imëkatam sufrinqa,+
peru allita ruraq nunaqa, alläpa lindu tseqllimoq plantanöran kanqa.+
29 Familianta penqakatseq* nunapa herencianqa vientullam kanqa.+
Imatapis mana entiendeq nunaqa, yachaq nunapa sirweqninmi kanqa.
30 Allita ruraq nunakuna imatapis rurayanqanqa, wakinkuna alli kawakuyänampaqmi yanapakun.*+
Allikunata rurayänampaq wakinkunata yanapaq* nunaqa, yachaqmi.+