Hëchus
14 Iconiu markachönam judïukuna Diosta adorayänan wayiman yëkuyarqan, imanö parlayanqanta wiyarmi, mëtsikaq judïukuna y griëgu nunakuna creikoq tikrayarqan. 2 Peru mana creikoq judïukunaqa, juk nacion nunakunata inkitarmi wawqikunapa contran sharkatsiyarqan.+ 3 Tsëmi pëkunaqa Teyta Jehoväpita* autoridäta chaskishqa karnin, atska tiempupa mana mantsakushpa nunakunata parlapar kayarqan. Milagrukunata y imëka espantëpaqkunata rurayänanta permitirmi, Teyta Diosqa alläpa alli kanqampita willakuyanqanwan acuerdu kanqanta rikätsikurqan.+ 4 Tsënö kaptimpis, tsë markachö nunakunaqa ishkë grüpumanmi rakikäyarqan: wakinmi judïukunapa favornin kayarqan, y wakinnam apostolkunapa favornin. 5 Tsënam juk nacion nunakuna, judïukuna y gobernadorninkunaqa, Pablutawan Bernabëta imëkata rurar sufritsiyänampaq y rumiwan tsampiyänampaq o saqmayänampaq yachatsinakuyarqan.+ 6 Tsëta musyëkurnam pëkunaqa Licaoniachö këkaq Listra y Derbi markakunaman y tsë markakunapa amänunkunaman qeshpir ëwakuyarqan.+ 7 Tsëchömi alli noticiakunata willakur kayarqan.
8 Listra markachömi chakinkunata kuyutsita mana puëdeq nuna tëkarqan. Pëqa yurikunqampita cöju karmi imëpis purishqatsu karqan. 9 Tsë nunaqa Pablu parlanqantam wiyëkarqan. Tsënam Pabluqa defrenti rikëkur alliyänampaqnö markäkoq o yärakoq kanqanta rikar+ 10 fuertipa “¡sharkuy!” nirqan. Tsënam tsë nunaqa, juklla saltëpa sharkur* purir qallëkurqan.+ 11 Pablu ruranqanta rikëkurnam, nunakunaqa Licaönica idiömachö fuertipa, “¡dioskunam nunaman tikrar noqantsikman uräyämushqa!”+ niyarqan. 12 Tsëmi Bernabëta Zëus nir qayayarqan, peru Pablutaqa mas parlakoq kaptinmi Hermes nir qayayarqan. 13 Tsënam markapa yëkunanchö Zëuspaq rurayanqan templuchö yanapakoq sacerdötiqa, tsë markapa punkunman törukunata y corönakunata aparqan, y nunakunawan juntum pishtashqa animalkunata pëkunapaq rupatsita munarqan.
14 Tsëta musyëkurnam, apostol Bernabëwan apostol Pabluqa, janan röpankunata rachir mëtsika nunakuna rurinman cörripa yëkukuykur fuertipa kënö niyarqan: 15 “Teytakuna, ¿imanirtan tsëta rurayanki? Noqakunaqa qamkunanö imachöpis pantaq nunakunallam kayä.+ Mana imapaqpis väleqkunata dejëkur, ciëluta, patsata, lamarta y tsëkunachö llapan kaqkunata ruraq, kawëkaq Diosman kutiyänëkipaqmi alli noticiakunata willëkäyaq.+ 16 Unë witsanqa, cada nacionchö nunakuna munayanqannö kawakuyänantam pë permitirqan,+ 17 peru manam dejarqantsu imëka allikunata rurar kikimpita musyatsikuyta.+ Tsëmi ciëlupita tamyatsimur tiempunchö mëtsikata cosechayänanta permitirqan,+ y shonqunkunachö kushikuyänampaqmi mëtsika mikuyyoq kayänanta permitirqan”.+ 18 Peru tsëkunata nirpis, ichikllapam michëta puëdiyarqantsu nunakuna pëkunapaq pishtashqa animalkunata rupatsiyänanta.
19 Tsënam Antioquïapita y Iconiupita judïukuna chëkur nunakunata inkitayarqan Pablupa+ contran churakäyänampaq, tsëmi rumiwan tsampir o saqmar ushayarqan y wanushqana kanqanta pensarmi qaracharkur markapita waqtaman apayarqan.+ 20 Tsënö kaptimpis, Jesuspa qateqninkuna lädunman chäriyaptinqa, sharkurmi* markaman yëkurqan. Waränin junaqnam, Bernabëwan juntu Derbi markaman ëwakuyarqan.+ 21 Tsë markachö alli noticiakunata willakurir y mëtsika nunakunata Jesuspa qateqnin tikrayänampaq yanapëkurmi Listraman, Iconiuman y Antioquïaman kutiyarqan. 22 Tsëchömi creikuyanqanta mana dejayänampaq, y “Diospa Gobiernunman yëkunapaqqa, mëtsika sufrimientupam pasashun”+ nir Diospa kaqchö alli kayänampaq Jesuspa qateqninkunata yanapayarqan.+ 23 Tsënöllam Teyta Diosman mañakur y ayunar,+ congregacionkuna kayanqanchö anciänukunata* churayarqan,+ y pëman creikoq tikrashqa kayaptinmi, cuidëkunampaq Teyta Jehoväpa* makinchö pëkunata dejayarqan.
24 Tsëpitanam Pisidiapa pasar Panfiliaman chäyarqan,+ 25 y Perga jutiyoq markachö Diospa palabranta willakuskirmi Atalia markaman ëwayarqan. 26 Tsëpitanam barcuwan Antioquïaman ëwayarqan. Tsëchömi rurar ushayanqan trabäjuta cumpliyänampaq, pëkunawan alläpa alli kar Teyta Dios cuidëkunampaq pëpa makinchö dejëkuyarqan.+
27 Char congregacionchö wawqikunata y panikunata juntëkurmi, Teyta Dios pëkunawan llapan logranqanta willayarqan. Tsënöllam juk nacion nunakuna pëman creikuyänanta Teyta Dios permitinqantapis willayarqan.+ 28 Tsënömi Jesuspa qateqninkunawan atska tiempupa quedakuyarqan.