Juan
5 Tsëpitanam judïukunapa fiestan kaptin,+ Jesus Jerusalenman witsarqan. 2 Jerusalenchöqa Üsha Punku+ niyanqampa lädunchömi, hebreu idiömachö Betzäta nir reqiyan jatun pözu kan, tsë pözupa kuchunchömi columnakunayoq pitsqa pasadïzukuna kan. 3 Tsëchömi mëtsika qeshyëkaqkuna, wiskukuna o qaprakuna, cöjukuna y makin o chakin wanushqa* nunakuna këkäyarqan. 4 * 5 Treinta y öchu watapana qeshyëkaq nunapis tsëchömi këkarqan. 6 Patsachö jitarëkaqta rikar y unëpana qeshyanqanta musyarmi Jesusqa, “¿alliyëta munankiku?”+ nir tapurqan. 7 Tsënam qeshyëkaq nunaqa nirqan: “Teytë, manam ni pïnï kantsu yaku kuyunqan höra pözuman yëkatsimänampaq, y cada yëkuyta munëkaptïmi, manaraq chaptï jukna yëkurin”. 8 Tsënö niptinnam Jesusqa, “¡sharkuy! Kirmëkita aparkur puri”+ nirqan. 9 Tsënam tsë nunaqa jinan höra alliyärir, kirmanta aparkur purir qallëkurqan.
Tsë junaqqa säbadum karqan. 10 Tsëmi judïukunaqa tsë alliyashqa nunata, “kananqa säbadum. Mana allitam rurëkanki kirmëkita puritsir”+ niyarqan. 11 Tsënam pëqa, “kikin alliyätsimaq nunam, ‘kirmëkita aparkur puri’ nimashqa” nir contestarqan. 12 Tsënö niptinnam pëkunaqa, “¿pitan ‘kirmëkita aptarkur puri’ nishoqniki nunaqa?” nir tapuyarqan. 13 Peru tsë alliyashqa nunaqa, tsëchö mëtsika nunakuna rurimpa Jesus ëwakushqa kaptinmi, pï kanqanta musyarqantsu.
14 Tsëpitanam Jesusqa templuchö tarïkur kënö nirqan: “Rikë, kananqa allinam këkanki. Imapis mas peor mana pasashunëkipaq, amana jutsata* rurënatsu”. 15 Tsënam tsë nunaqa, judïukunaman ëwar Jesus alliyätsishqa kanqanta willarqan. 16 Tsëmi judïukunaqa, säbaduchö Jesus tsëkunata ruraptin, problëmata rurar qallëkuyarqan. 17 Tsënam pëqa, “Teytäqa kananyaqmi trabajëkan, y noqapis trabajarmi këkä”+ nirqan. 18 Tsëmi judïukunaqa niyarqan säbadu junaqta mana respetanqanta y Dios Teytan kanqanta nirqa+ Teyta Dioswan igualaq tukuykanqanta, tsëmi masraq wanutsita tïrayarqan.
19 Tsëmi Jesusqa kënö nirqan: “Rasunllatam qamkunata nï,* Tsuriqa manam kikinllapitaqa imatapis rurantsu, sinöqa Teytanta ruraqta rikanqanllatam.+ Awmi, Teyta imatapis ruranqannöllam, Tsuripis llapanta ruran. 20 Teytaqa Tsurita kuyarmi+ llapan ruranqanta musyatsin, y qamkuna espantakuyänëkipaqmi tsëpitapis mas espantëpaqkunata rikätsinqa.+ 21 Wanushqakunata Teyta kawaritsinqannöllam+ Tsuripis munanqan kaqta kawaritsin.+ 22 Kikin Teytaqa manam pitapis juzgantsu, sinöqa Tsuritam churashqa llapankunata juzganampaq,+ 23 tsëta ruraptin Teytata respetayanqannölla, Tsuritapis llapankuna respetayänampaq. Tsurita mana respetaqqa, manam mandamoqnin Teytatapis respetantsu.+ 24 Rasunllatam qamkunata nï,* ninqäkunata wiyakoqqa y mandamaqnïta creeqqa, imëyaqpis kawëtam tarinqa+ y manam juzgashqatsu* kanqa, sinöqa wanushqanö o wañushqanö këkanqampitam kananqa kawëkanna.+
25 Rasunllatam qamkunata nï,* höra chäramunnam, awmi höranam, Diospa Tsurin parlanqanta wanushqakuna wiyayänampaq, y cäsukoq kaqkuna kawayänampaq. 26 Teyta kikinchö kawëyoq kanqannömi,*+ Tsuritapis permitishqa kikinchö kawëyoq kanampaq.+ 27 Y Nunapa Tsurin kaptinmi+ juzganampaq carguman churashqa.+ 28 Ama tsë ninqäkunapita espantakuyëtsu. Ichikllachönam sepultürachö* këkaqkunaqa qayanqanta wiyar+ 29 tsëpita yarqayämunqa. Allikunata rurashqa kaqkunaqa, kawayänampaqmi kawariyämunqa, y mana allikunata rurashqa kaqkunanam, juzgashqa* kayänampaq kawariyämunqa.+ 30 Noqaqa manam kikïllapitaqa imatapis rurätsu. Wiyanqämannömi pitapis juzgä, y kikï munanqäta ruranäpa rantin mandamaqnï munanqanta ruraptïmi,+ juzganqäqa imëpis allilla.+
31 Kikïpaq imatapis noqalla willakuptïqa, tsë willakunqä manachi rasuntsu kanman.*+ 32 Tsënö kaptimpis, jukmi noqapita willakun, y musyämi noqapita willakunqanqa rasumpa kaqlla kanqanta.+ 33 Qamkunaqa Juanmanmi nunakunata mandayarqunki, y pëqa rasumpa kaqllatam noqapita willakushqa.+ 34 Tsënö kaptimpis, noqaqa manam wanätsu* pï nunapis noqapita willakunanta, peru qamkuna salvakuyänëkipaqmi këkunata nikä. 35 Juanqa rawrëkaq o lunyëkaq y chipapëkaq chiwchinömi karqan, y qamkunaqa wallka tiempullapam aktsinchö kushishqa kayarqunki.+ 36 Tsënö kaptimpis, Teytä ruranäpaq mandamanqankunam. Awmi, noqa ruranqäkunam, Juan willakunqampitapis masraq Teyta mandamanqanta musyatsikun.+ 37 Y kikin mandamaqnï Teytam noqapita willakushqa.+ Qamkunaqa manam imëpis parlanqanta wiyayashqankitsu ni cäranta rikäyashqankitsu,+ 38 y pë mandamunqan kaqta mana creiyaptikim, ninqankunaqa shonquykikunachötsu këkan.
39 Qamkunaqa imëyaqpis kawëta tariyänëkipaq kaqta pensarmi, Diospa Palabrampita alli yachakuyanki,+ y tsëchömi noqapita willakun.+ 40 Tsënö kaptimpis, manam imëyaqpis kawëta tariyänëkipaq, noqaman shamuyta munayankitsu.+ 41 Noqaqa manam munätsu nunakuna alabayämänanta. 42 Peru allim musyä, qamkunaqa Teyta Diosta mana kuyayanqëkita. 43 Teytäpa jutinchö shamuykaptïpis, qamkunaqa manam chaskiyämankitsu. Peru pï nunapis kikimpa jutinchö shamuptinqa, pëtam sïqa chaskiyankiman. 44 Jukllëlla Diospa rikëninchö alli këta ashiyänëkipa rantin qamkunapura alabanakuyta ashikarqa, ¿imanöraq noqata creiyämanki?+ 45 Ama pensayëtsu Teytapa puntanchö noqa acusayänaqpaq kaqta. Qamkunataqa markäkuyanqëki o yärakuyanqëki Moisesmi acusayäshunki.+ 46 Rasumpa kaqchöqa, Moisesta creirqa, pë noqapaq qellqashqa kaptinmi noqatapis creiyämankiman.+ 47 Peru pë qellqanqankunata mana creikarqa, ¿imanöraq ninqäkunata creiyanki?”.