Ezequiel

33 Teyta Jehovämi kënö nir parlapämarqan: 2 “Nunapa tsurin, marka mayikikunata kënö nir parlapë:

‘Këman pensariyë, juk nacionta atacayänanta permitïman,+ peru tsë nacionchö nunakunaqa juk nunata churayanman täpakur rikachakunampaq.+ 3 Y tsë täpakoqqa, atacaq ëwëkäyanqanta rikëkur waqrapita trompëtata tocar willakunman.+ 4 Peru tsë markachö juk nunaqa, waqrapita trompëta waqëkanqanta wiyëkarpis cäsukunmantsu,+ tsëna atacaq ëwaqkunaqa tsë nunata wanuratsiyanman. Wanunqampitaqa kikin nunam culpayoq kanman.+ 5 Waqrapita trompëta waqaqtaqa wiyarqanmi, peru manam cäsurqantsu. Tsëmi wanunqampitaqa o wañunqampitaqa kikin culpayoq. Trompëta waqaqta cäsukushqa karqa, salvakunmanmi karqan.

6 Peru tsë täpakoq, atacaq ëwëkäyanqanta rikëkarpis waqrapita trompëtata tocanmantsu,+ y markachö nunakunaqa musyayanmantsu atacaq ëwëkäyanqanta. Tsëna atacaqkunaqa chëkur wakin nunakunata wanuratsiyanman. Tsë wanoq nunakunaqa kikinkunapa jutsankunapitam* wanuyashqa. Peru yawarnintam sïqa tsë täpakoqta reclamashaq’.+

7 Nunapa tsurin, qamtam Israel nacionman churarqoq rikachakur täpakunëkipaq. Imatapis parlanqäkunata wiyarqa, noqapa jutïchö willakunki.+ 8 Juk mana alli nunata kënö nïman: ‘Mana alli nuna, qamqa wanunkim’.+ Peru qamqa, tsënö nikaptï, mana alli rurëkunata dejanampaq parlapankimantsu. Tsë nunaqa, mana allikunata ruranqampita, mana alli nunanö wanunqa,+ peru yawarnintaqa qamtam reclamashqëki. 9 Peru mana allikunata dejanampaq parlapëkaptiki mana cäsukur maslla rurarqa, mana allikunata ruranqampitam wanunqa,+ peru qamqa salvakunkim.+

10 Qamqa nunapa tsurin, Israel nunakunata kënö nï: ‘Qamkunam kënö nikäyanki: “Mana cäsukoq kanqantsikpita y jutsata* ruranqantsikpitaqa alläpam sufrintsik y tsëkunaman yarparmi llakishqallana kawakuntsik.+ ¿Tsënö këkartsuraq kawëkäshunraq?”’.+ 11 Noqam, Llapanta Gobernaq kawëkaq Jehovä kënö nï: ‘“Noqaqa manam, juk mana alli nuna wanuptin kushikütsu.+ Peru juk mana alli nuna cambiaptin+ y allikunata ruranqampita kawaptinmi sïqa kushikü’.+ Mana alli rurëkunataqa dejayë,+ juklla dejayë. Israel nunakuna, ¿imanirtan wanuyta munayanki?”’+

12 Nunapa tsurin, marka mayikikunata kënö nï: ‘Juk nunakush alli ruraq këkar mana cäsukoq tikrakurinqa, tsëqa manam puntata alli ruraq kanqampita salvakunqatsu.+ Y juk nunakush mana alli ruraq këkar allikunatana ruranqa, tsëqa manam puntata mana allita ruranqampitaqa wanunqatsu.+ Tsënöllam juk alli ruraq nuna jutsata* rurarqa, puntata allikunata ruranqampitaqa salvakunqatsu.+ 13 Juk alli ruraq nunatakush, “qamqa manam wanunkitsu” nïman. Tsënö nikaptï pëqa kikinllaman confiakur mana allikunata rurar qallëkunman,+ mananam puntata allikunata ruranqantaqa yarpäshaqnatsu. Mana allita ruranqampitaqa wanunqam.+

14 Y mana allita ruraq nunatakush, “qamqa wanunkim” nïman. Peru pëqa, jutsa* ruranqankunata dejarir allikunatana rurar qallëkunman,+ 15 prenda quedatsinqantapis,+ suwakunqantapis kutitsinman+ y kawëman apakoq leyta cäsukur mana allikunataqa ruranmannatsu. Tsëta rurarqa kawakunqam,+ manam wanunqatsu. 16 Puntata mana allikunata ruranqankunataqa manam yarpäshaqtsu,+ allikunata ruranqampitam kawakunqa’.+

17 Peru marka mayikikunaqa kënömi niyashqa: ‘Jehoväpis mana conviëneqllatam ruran’. Rasumpa kaqchöqa, pëkunam mana allikunataqa rurayan.

18 Sï juk nuna alli ruraq këkar mana allikunatana rurar qallëkunqa, tsëqa mana allita ruranqampitam wanunqa.+ 19 Peru juk mana alli nuna, mana alli rurëkunata dejar alli kaqkunallatana rurarqa kawakunqam.+

20 Peru qamkunaqa kënömi niyarqunki: ‘Jehoväpis mana conviëneqllatam ruran’.+ Israel nunakuna, noqaqa mana allikunata rurayanqëkipitam cada ünuta juzgayashqëki”.

21 Babiloniaman apayämanqampita döci wata pasarinqanchömi, chunka killapa pitsqa junaqninchö, Jerusalenpita qeshpir shamoq nuna chämurqan,+ y kënömi nimarqan: “¡Jerusalen markatam ushakäratsiyashqa!”.+

22 Tsë nuna chämunampaq juk paqas pishikaptinmi, Teyta Jehoväqa poderninwan yanapamarqan. Tsëmi tsë nuna manaraq chämuptin parlëta puëdirqäna. Tsëpita witsëpaqa mananam müdunatsu* karqä.+

23 Tsëpitanam Teyta Jehoväqa kënö nimarqan: 24 “Nunapa tsurin, kë ushakashqa markakunachö këkaq nunakunaqa Israel markakunapaqmi kënö nikäyan:+ ‘Abrahanqa japallan këkarmi, kë entëru markakunapa duëñun karqan.+ Peru noqantsikqa mëtsikaqmi kantsik y kë entëru markakunatam entregamarquntsik. Noqantsikmi duëñun kantsik’.

25 Tsëmi kënö ninëki: ‘Këtam Llapanta Gobernaq Teyta Jehovä niyäshunki: “Qamkunaqa yawaryoq ëtsatam mikuyanki,+ melanëpaq santukunamanmi confiakuyanki y nuna mayikikunapa yawarnintam jichayanki.+ ¿Tsënö këkartsuraq kë markakunapa duëñun kayankiman? 26 Qamkunaqa espädëkikunamanmi confiakuyanki,+ imëka mana allikunatam rurayanki, y llapëkipis nuna mayikikunapa warminkunawanmi kakuyanki.*+ ¿Tsënö këkartsuraq kë markakunapa duëñun kayankiman?”’.+

27 Tsëmi pëkunata kënö ninëki: ‘Llapanta Gobernaq Teyta Jehovämi kënö niyäshunki: “Noqaqa kawëkaq Diosmi kä, tsëmi tsë ushakashqa markakunachö kawaqkunataqa espädawan wanutsiyanqa o wañutsiyanqa, chakrakunachö kawaqkunatanam chukaru animalkuna mikukurkuyanqa y alli segurashqa shumaq wayikunachö y machëkunachö këkaqkunanam qeshyawan wanuyanqa.+ 28 Kë markakunataqa, imapis mana kanqan sitiutanömi dejarishaq+ y orgullösu kanqanqa ushakärinqam. Israel jirkakunatapis imannaqtam dejarishaq,+ y tsëkunapaqa manam ni pï pasanqatsu. 29 Imëka mana allikunata rurayanqampita kë markakunata imannaqta dejariptïmi,+ musyariyanki noqa Jehovä kanqäta”’.+

30 Nunapa tsurin, qampaqmi marka mayikikunaqa murällakunachö y wayi punkukunachö parlëkäyan.+ Juknin jukninmi kënö ninakuyan: ‘Aku ëwashun, Teyta Jehovä ninqanta willamänapaq’. 31 Llapankuna juntakëkurmi, sirwimaqnïkuna rurayanqannö puntëkiman jamakayämunqa. Peru parlapanqëkita wiyakurpis manam cäsukuyanqatsu.+ Pëkunaqa alli shiminkunapa parlapäyäshurnikipis, shonqunkunachöqa imëkayoq këllamanmi yarparëkäyan, tsëmi imëka mana allikunata rurayan. 32 Qamqa pëkunapaq kanki, cuerdayoq instrumentukunata tocar tocar pipa shonquntapis suwëta munar shumaq cantaqkunanöran. Parlapanqëkitaqa kushishqam wiyakuyan, peru manam cäsukuyantsu. 33 Parlapanqëkikunaqa cumplikanqam, y cumplikäriptinqa pëkunaqa musyayanqam pëkunata willanampaq juk willakoq kashqa kanqanta”.+