1 Timoteu
5 Ama mayor nunataqa chukrupa parlapëtsu.+ Tsëpa rantinqa, papänikitanö consejë, y jövin kaqkunatana wawqikikunatanö; 2 mayor warmikunatana mamëkitanö, y shipashkunatana panikikunatanö, imëpis limpiu shonquwan.
3 Yanapayänanta rasumpa wanaq* viudakunata* shumaq tratë.*+ 4 Peru mëqan viudapapis wamrankuna o willkankuna kaptinqa, pëkunaraq wayinkunachö yachakuyätsun llapan shonqunkunawan Teyta Diosta sirwita,+ y papäninkunata y awilunkunata jaqa cuenta cuidayätsun+ y atiendiyätsun, tsëqa alläpa allim Diospa rikëninchö.+ 5 Yanapayänanta rasumpa wanaq* y imannaq viudaqa, Teyta Diosmanmi markäkun o yärakun,+ y paqasta junaqtam rogakur y mañakur këkan.+ 6 Peru munanqanta* rurarlla kawakoqqa, kawëkarpis wanushqanömi këkan. 7 Tsëmi qamqa tsëkunata mandakur sïguï, tsënöpa llapankuna imapitapis mana parlashqa kayänampaq. 8 Pï nunapis kikimpa kaqkunata y masqa wayinchö kaqkunata mana mantenirqa, creikunqantam mana kaqpaq churashqa, y mana markäkoq o yärakoq nunapitapis mas peormi.+
9 Listaman churayanqëki viudaqa, sesenta watapita masyoqmi kanan, juk nunallapa warminllam kashqa kanan, 10 y imëka allikunata ruranqampitam reqishqa kanan,+ awmi, wamrankunata alli wätanqampita,+ posadatsikoq kanqampita,+ limpiu nunakunapa chakinta yakuwan awinqampita,*+ sufrikaqkunata yanapanqampita+ y imëka allikunata ruranqampitam reqishqa kanan.
11 Peru mënus watayoq viudakunataqa ama listaman churëtsu. Oqllanakuyta munayanqan Cristuta sirwiyänanta michaptinmi, pëkunaqa casakuyta munayan. 12 Pëkunaqa punta änikuyanqanta mana cumplirmi, kikinkuna culpayoq tikrayanqa. 13 Tsënöllam mana imatapis rurëta y wayin wayin purita yachakäyan. Awmi, manam imatapis mana rurëllatatsu, sinöqa chismösa këta y mana parlayänampaq kaqkunapita parlar jukpa asuntunkunaman mëtikuytam yachakuyan.+ 14 Tsëmi munä jövinllaraq viudakuna casakuyänanta,+ wamrayoq kayänanta+ y wayinkunata shumaq rikäyänanta, tsënöpa chikimaqnintsikkuna noqantsikpita mana allita mana parlayänampaq. 15 Rasumpa kaqchöqa, wakin viudakunaqa rasumpa kaqta dejëkurmi Satanastana qatiyashqa. 16 Mëqan creikoq warmipapis viuda* kastankuna kaptinqa, congregacionchö kaqkuna mana cargutsakuyänampaq pë yanapatsun, tsënöpam congregacionchö kaqkunaqa rasumpa wanaq* viudakunata yanapayanqa.+
17 Congregacionchö kaqkunata alli dirigeq anciänukunaqa,*+ mas respetashqa kayätsun,+ masqa parlar y yachatsikur alli trabajaqkuna.+ 18 Teyta Diospa Palabranchömi kënö nin: “Ërachö imatapis cosecharqa, ama töruman bozalta churayankitsu”.+ Y kënöpis ninmi: “Trabajaq nunaqa pägunta chaskinanmi”.+ 19 Ishkaq o kimaq testïgukuna mana kayaptinqa, ama anciänuta* acusayaptin creinkitsu.+ 20 Tsëchö këkaqkunapa puntanchö jutsa* ruraqkunata corregi,+ tsënöpa wakinkunapis tsëpita yachakuyänampaq.* 21 Teyta Diospa, Cristu Jesuspa y akrashqa angelkunapa rikëninchömi alli cläru mandaq, pimampis mana qaqashpa y llapankunata igualpa rikar, tsë ninqäkunata cäsukunëkipaq.+
22 Ama pï nunamampis carguta chaskinampaq makikita raslla o saslla churëtsu.+ Tsënölla ama jukpa jutsampita* culpayoq këtsu. Imëpis limpiu shonquyoq kë.
23 Amana yakuta upuynatsu;* sinöqa pachëkirëkur y seguïdu qeshyanqëkirëkur vïnuta ichikllata upuy.
24 Wakin nunakuna jutsa* rurayanqantaqa pïmëmi musyayan y tsë höram juzgashqa kayan, peru wakin nunakuna rurayanqan jutsaqa tiempu pasaptinran musyakan.+ 25 Tsënöllam allikunata rurayanqantaqa pïmë musyayan+ y mana musyëraq kaqkunaqa manam pakashqalla quedakuyanqatsu.+