Exodu

12 Tsëpitanam Teyta Jehoväqa Egiptuchö këkäyaptin Moisestawan Aaronta nirqan: 2 “Qamkunapaqqa kë killachömi wata qallanqa, y kë killam qallanan killa kanqa.+ 3 Llapan israelïtakunata kënö niyë: ‘Kë killapa chunka kaq junaqninmi cada wayichö familiakuna orqu* üshata+ akrayänëki. 4 Familiëkikunachö wallkaqlla karqa, mas amänuchö kaq vecïnuykikunawanmi mikuyänëkipaq juntakäyänëki. Tsë orqu* üsha ëkaqpaq kanqantam tantiayänëki. 5 Tsë orqu* üshaqa juk watayoqmi, y sänum kanan.+ Orqu üsha mana kapuyäshuptikiqa juk watayoq chïvutam* akrayänëki. 6 Tsë orqu* üshata o chïvutaqa* kë killapa catorci junaqninyaqmi katsiyänëki,+ y tsë tardim* pishtayänëki.+ 7 Tsëpitanam mikuyänëkipaq juntakäyanqëki wayipa punkumpa ishkan kuchunta y jananta tsë pishtayanqëki animalpa yawarninwan llushiyänëki.+

8 Y tsë pishtayanqëki animalpa ëtsantaqa shumaq kankëkurmi levadürannaq tantatawan+ y chawa verdürakunatawan+ tsë paqaslla mikuyänëki.+ 9 Tsë ëtsataqa manam yanuyänëkitsu ni chawataqa* mikuyänëkitsu, sinöqa peqanta o umanta, chakinta y pachanchö kaqninkunatapis llapantam kankayänëki. 10 Waränin junaqpaqqa manam imantapis sobratsiyänëkitsu, imapis sobraptinqa llapantam rupatsiyänëki.+ 11 Tseqllëkikunata alli watashqa, llanqikushqa y tukruykikunata aptakushqallanam mikuyänëki. Tsë llapantaqa rurayänëki Teyta Jehovä salvayäshunëkipaq kaqta agradecikurninmi. 12 Tsë paqasmi llapan nunakunapa mayor tsurinkunata y animalninkunapa punta wawankunata wanutsir entëru Egiptupa purishaq.+ Y tsëchömi musyayanqa Egiptuchö adorayanqankunaqa imapaqpis mana väliyanqanta.+ Noqa Jehovämi tsëta rurashaq. 13 Y wayikikunapa punkunman llushiyanqëki yawarta rikarqa pasakushaqmi, y manam ni wamrëkikunata ni animalnikikunata wanutsishaqtsu.+

14 Y noqa Jehovä tsë paqas ruranqätaqa cada watam yarpäyänëki. Y kë mandakunqätaqa tsëpita yurikoq kastëkikunapis cumpliyänanmi. 15 Juk semänapam levadürannaq tantata mikuyänëki.+ Tsëmi tsë semänapa qallanan junaqllana levadürayoq masata wayikikunapita jitariyänëki. Y pillapis tsë semänachö levadürayoq tantata mikuptinqa wanutsiyänëkim o wañutsiyänëkim. 16 Tsë semänapa qallanan junaqchö y ushanan junaqchömi Teyta Diosta adorayänëkipaq juntakäyänëki. Tsë ishkan junaqqa, manam ima trabäjutapis rurayänëkitsu,+ sinöqa mikuyänëkillapaqmi imatapis rurayänëki.

17 Noqam tsë paqas llapëkita Egiptupita salvayashqëki, y tsëta yarparmi qanchis junaqpa Levadürannaq Tanta Mikuna Fiestata rurayänëki.+ Kë mandakunqätaqa tsëpita yurikoq kastëkikunapis cumpliyänanmi. 18 Watata qallaq killam, catorci junaq ushanan tardipita veintiunu junaqyaq levadürannaq tantata mikuyänëki.+ 19 Y qanchis junaqmi levadürayoq masataqa wayikikunachö katsiyänëkitsu. Qamkunawan këkaq forastëru o marka mayikikuna+ imatapis levadürayoqta mikuptinqa, tsë nunata wanutsiyänëkim.+ 20 Manam imatapis levadürayoqtaqa mikuyänëkitsu, sinöqa levadürannaq tantallatam mikuyänëki’”.

21 Tsënam Moisesqa israelïtakunapa dirigeqninkunata jinan höra qayëkatsir kënö+ nirqan: “Israelïta mayintsikkunata niyë familiankunawan mikuyänampaq juk malta animalta akrayänampaq. Tsë Pascua Fiestapaq animaltaqa tsë paqasmi pishtayänan. 22 Y tsë animalpa yawarninwanmi, punkunkunapa jananta y ishkan kuchunta tsaqtsukuna plantawan* llushiyänan. Y patsa waranqanyaqmi wayinkunapita yarquyänantsu. 23 Tsë paqasmi Teyta Jehoväqa egipciukunata castiganqa, y israelïtakunapa punkunchö yawar llushirëkaqta rikarqa, Teyta Jehoväqa manam tsë wayichö pitapis wanutsinqatsu,+ tsëpa rantinqa defrentim pasakunqa.

24 Tsëtaqa cada watam familiëkikunawan juntakëkur yarpäyänëki, y wamrëkikunapis yarpäyänanmi.+ 25 Teyta Jehovä äniyäshunqëki markachöna këkarpis tsëta yarpäyänëkipaqmi cada wata juntakäyänëki.+ 26 Y, ‘¿imanirtan këtaqa rurëkantsik?’+ nirnin wamrëkikuna tapuyäshuptikiqa, 27 ‘Teyta Diosnintsikmi Egiptuchö llapan wayikunapa pasarqan, y egipciukunata castigarmi mayor tsurinkunata wanutsirqan, peru israelïtakunapa mayor tsurinkunataqa manam wanutsirqantsu. Tsëmi llapantsik juntu Teyta Jehoväta agradecikur Pascua Fiestapaq kë animalta pishtarquntsik’ niyanki”.

Moises tsënö niptinmi urkunkunapis patsaman chanqanyaq llapankuna* qonqurikuyarqan. 28 Tsënam israelïtakunaqa Moisesta y Aaronta Teyta Jehovä mandanqannölla llapanta rurayarqan.+

29 Tsënam Teyta Jehoväqa pullan paqas egipciukunapa llapan mayor tsurinkunata wanuratsirqan.+ Egiptuchö gobernaqpa mayor tsurimpita qallëkurmi, prësurëkaqkunapa mayor tsurinkunatapis wanuratsirqan. Y animalninkunapa punta wawankunatapis llapantam wanutsirqan.+ 30 Y cada wayichö wanupakushqa karmi tsë paqasqa Egiptuchö gobernaqpis, sirweqninkunapis y llapan egipciukunapis alläpa waqayarqan,+ y tsënö waqayanqanqa entëru Egiptuchömi wiyakarqan. 31 Y tsë paqasmi Egiptuchö gobernaqqa Moisesta y Aaronta qayëkatsir+ nirqan: “¡Llapan marka mayikikunata pusharkur kanan höra ëwakuyë! Niyanqëkinölla Jehovä Diosnikikunata adorayänëkipaq këpita ëwakuyë.+ 32 Üshëkikunata y wäkëkikunata qatirkur ëwakuyë,+ y bendicimänampaq Diosnikikunata mañakuyë”.

33 Egipciukunaqa, “mana ëwakuyaptikiqa llapäkunam ushakäyäshaq”+ nirmi israelïtakunata jinan höra yarqukuyänampaq niyarqan.+ 34 Tsënam israelïtakunaqa pituyanqan levadürannaq masankunata y masa rurakuyänanta aparkur ëwakuyarqan. 35 Israelïtakunaqa Moises ninqannöllam plätapita y örupita rurashqa cösaskunata y röpakunata egipciukunata mañakuyarqan.+ 36 Y Teyta Jehovä permitiptinmi egipciukunaqa israelïtakunata alli tratayarqan. Tsënömi israelïtakunaqa egipciukunata imannaqta dejëkur ëwakuyarqan.+

37 Israelïtakunaqa Ramesespita+ yarqurmi Sucot+ sitiuman ëwakuyarqan. Ollqu kaqkunaqa seiscientus milnömi kayarqan, warmikunata y wamrakunataqa manam yupayarqantsu.*+ 38 Mana israelïta kasta kaqkunapis+ mëtsikaqmi pëkunawan ëwakuyarqan. Llapankunam mëtsika üshankunata y wäkankunata qatirkur ëwakuyarqan. 39 Egiptupita jinan höra ëwakushqa karmi mikuyänampaq imatapis alistapakushqatsu kayarqan.+ Tsëmi Egiptupita apayanqan levadürannaq masawan tantata rurayarqan, y tsëllatam mikuyarqan.

40 Cuatrocientus treinta watam+ israelïtakunaqa Egiptuchö kayarqan.+ 41 Egiptu nacionchö cuatrocientus treinta watata cumpliyanqan junaqmi Jehovä Diosqa llapan israelïtakunata tsë nacionpita apakurqan. 42 Jehovä Diosqa paqaspam israelïtakunata Egiptupita apakurqan, y tsë paqas pasakunqantaqa cada watam yarpäyänan karqan. Israelïtakunaqa Teyta Jehoväta agradecikurmi+ cada wata tsëta yarpäyänan karqan, y tsëpita yureq tsurinkunapis tsënöllam rurayänan karqan.

43 Tsëpitanam Teyta Jehoväqa Moisestawan Aaronta kënö nirqan: “Egiptupita yarquyanqëki paqasta yarparqa, këtam cuentaman churayänëki: tsë paqas mikuyänëkipaq pishtayanqëki ëtsa Pascua Fiestapaq kaptinmi forastërukunaqa mikuyänantsu.+ 44 Y sirwishunëkipaq pï nunatapis rantishqa karqa, puntataqa ishpakunampa puntanchöran señalatsiyänëki.+ Tsëran pëqa tsë ëtsata mikunan. 45 Juk markapita ëwakamoqkunaqa y trabajapakoq shamoqkunaqa manam tsë ëtsata mikuyänantsu. 46 Y tsë orqu* üshata mikuyänëkipaq vecïnuykikunawan juntakarqa, juk wayillachömi mikuyänëki. Tsë animalpa ëtsantaqa manam wayikikunapita juk läduman apayänëkitsu ni tullunta pakiyänëkitsu.+ 47 Llapëki israelïtakunam Pascua Fiestata yarpäyänëki. 48 Mëqan forastërupis Teyta Jehoväta agradecikur tsë paqas pasakunqanta qamkunawan yarpëta munaptinqa, familianchö llapan ollqu kaqkunam ishpakuyänampa puntanchö señalakuyänan. Tsëta rurar-ran pëkunaqa marka mayikikuna tikrayanqa, y qamkunawan juntu tsë paqas pasakunqanta yarpäyanqa. Ishpakuyänampa puntanchö mana señalakushqa kaqkunaqa, manam tsë paqaspaq alistayanqëki ëtsata mikuyänantsu.+ 49 Kë mandakunqätaqa llapan israelïtakuna y forastërukunam cäsukuyänëki”.+

50 Israelïtakunaqa Moisesta y Aaronta Teyta Jehovä mandanqantanöllam llapanta rurayarqan. 51 Y tsë paqasmi Teyta Jehoväqa llapan israelïtakunata Egiptupita apakurqan.