Juëces
14 Tsënam Sansonqa Timnä markaman urarqan, y tsëchömi juk filistëa* warmita rikärqan. 2 Tsëpitanam papäninman y mamäninman kutir kënö nirqan: “Timnä markachömi* juk shumaqllan warmita rikarqö. Pëwan casatsiyämänëkitam munä”. 3 Tsënam papäninwan mamäninqa niyarqan: “¿Manaku kastantsikchö o marka mayintsikchö qampaqnö warmi kan?+ ¿Imanirtan Teyta Diosta mana sirweq filistëa warmita munanki?”. Sansonnam papäninta nirqan: “Pëta parlapëkamuy, pëtam warmïpaq munä”.* 4 Tsënöqa Sanson nirqan Jehovä Dios yanapaptinmi. Tsë witsampaqqa filisteu nunakunam israelïtakunata dominëkäyarqan, tsëmi Teyta Diosqa israelïtakunata salvanampaq filisteukunata achäkita ashipëkarqan. Tsëtaqa Sansonpa papäninwan mamäninqa manam musyayarqantsu.+
5 Tsëmi Sansonqa, papäninwan mamäninwan Timnä markaman urarqan. Y üvas plantakunaman chäriptinmi, juk leon ataquëta munar qaparir yarqaramurqan. 6 Tsë höram Jehovä Diosqa poderninwan Sansonta yanaparqan,+ tsëmi imëka llullu cabratanö leonta ishkëman rachiskirqan.* Peru papänintawan mamänintaqa manam willarqantsu. 7 Tsëpitanam Sansonqa, Timnä markaman chëkur kuyanqan warmiwan parlarqan.+
8 Tsëpitanam Sansonqa, Timnä markaman yapë kutirqan, tsë warmita wayinman apakunampaq.+ Y ëwarëkarnam wanutsinqan leonta rikaq ëwarqan. Wanushqa leonchöqa mëtsika abëjakunatam rikëkurqan y mieltapis rurashqanam kayänaq. 9 Tsëmi Sansonqa makinwan mielta jipirir mikur mikur ëwarqan. Papäninman y mamäninman chëkurnam mikuyänampaq mielta qararqan. Peru wanushqa leonchö tarinqantaqa manam willarqantsu.
10 Tsëpitanam Sansonqa papäninwan ëwayarqan warmipa markanman, y Sansonqa jövin ollqukunapa costumbrinkunamannömi fiestata rurarqan. 11 Tsëta rikarmi nunakunaqa, yanapayänampaq treinta ollqukunata mandayarqan. 12 Tsënam Sansonqa pëkunata nirqan: “Juk adivinanzata niriyashqëki. Qanchis junaq fiesta duranqanchö ima kanqanta niyämaptikiqa, lïnu tëlapita rurashqa treinta röpakunawan y treinta mas allin kaq röpakunawanmi pagayashqëki. 13 Peru ima kanqanta mana niyämaptikiqa, qamkunam lïnu tëlapita treinta röpakunawan y treinta mas alli kaq röpakunawan pagayämanki”. Pëkunanam, “mä niyämë adivinancëkita, wiyëtam munayä” niyarqan. 14 Sansonnam kënö nirqan:
“Mikoq kaqpitam mikuy yarqurqan,
y kallpayoq kaqpitam mishkeq yarqurqan.+ ¿Imatan?, mä niyämë”.
Kima junaqna pasarishqa kaptimpis, pëkunaqa manam adivinëta puëdiyarqantsu. 15 Tsëmi chusku kaq junaqchöqa, Sansonpa warminta* niyarqan: “Qowëkita o runëkita* yachëllapa tapumuy+ tsë adivinanza ima kanqanta, y tsëpitana willayämanki. Tsëta mana ruraptikiqa qamta y papänikipa familiantam ninawan prendïkuyashqëki. ¿Cösasnïkunata apakuyta munarku invitayämarqëki?”. 16 Tsënam warminqa Sansonta waqaparnin nirqan: “Qamqa manam kuyamankitsu, chikimankim.+ Rasumpa kuyamarqa marka mayïkunata ninqëki adivinanza ima kanqantam willamankiman”. Tsëta niptinnam Sansonqa, “manam ni papänïta ni mamänïtapis willarqötsu, ¿tsëtsuraq qamtaraq willaqman?” nirqan. 17 Tsënam warminqa mana pärëpa waqaparqan y qanchis junaqchö fiesta ushanqanyaqmi waqaparqan. Tsëmi qanchis kaq junaqyaq pasëpa* ajayätsishqa kaptin, Sansonqa adivinanza ima kanqanta willëkurqan. Tsënam warmiqa marka mayinkunata willarqan.+ 18 Tsëmi qanchis kaq junaq manaraq tardiyaptin, tsë markachö nunakunaqa Sansonta kënö niyarqan:
“¿Imatan mielpita mas mishkeq,
y imatan leonpita mas kallpayoq?”.+
Pënam nirqan:
“Malta wäkäwan mana yapyashqa* karqa,+
manam tapuyanqaq adivinanza ima kanqanta musyayankimantsu karqan”.
19 Tsëpitanam Teyta Jehoväqa poderninwan yanaparqan.+ Y pënam Asquelon+ markaman ëwëkur treinta nunakunata wanuratsir röpankunata apamurqan, y adivinanza ima kanqanta neqkunatam entregarqan.+ Tsënö entreguëkurnam papänimpa wayinman alläpa cölerashqa kutirqan.
20 Tsëyaqnam Sansonpa warmintaqa+ fiestachö yanapaq jövintawan casaratsiyarqan.+