2 Corintius
11 Juiciunnaq nunanö parlamunqäta aguantayämänëkitam munä. ¡Peru rasumpa kaqchöqa aguantëkäyämankinam! 2 Teyta Dios qamkunapaq yarpachakunqannömi noqapis qamkunapaq yarpachakü. Noqaqa kikïmi juk nunallawan casatsiyänaqpaq,* awmi, manaraq piwampis oqllanakushqa limpiu shipashtanö Cristullata entregayänaqpaqmi* änikurqä.+ 3 Peru Cristupa kaqkuna rasumpa kuyakoq y limpiu shonquyoq kanantsik këkaptin, Ëvata culebra yachëllapa engañanqannölla,+ imanö pensayanqëkita imanöllapis cambiatsiyäshunëkitam mantsä.+ 4 Tsëtaqa nikä, pï nunapis qamkunaman shamur noqakuna mana willayanqaq Jesuspita willayäshuptiki o imanö pensayanqëkichö pushayäshoqniki jukläyana kaptin o chaskiyanqëki alli noticiakunata jukläya noticiakunata chätsiyämuptinqa,+ mana imatapis nirmi tsëkunata chaskiyanki. 5 Noqaqa clärum rikätsikurqö “alläpa alli apostolnikikunapita” imachöpis mana mënus kanqäta.+ 6 Peru alli parlëta mana yacharpis,+ imëkatam alli musyä y tsëtaqa imëkanöpa y llapanchömi cläru rikätsiyarqoq.
7 ¿O mana allitaku rurarqö qamkuna väleqpaq churashqa kayänëkipaq humillakur Teyta Diospa alli noticiankunata kushishqa y debaldilla willayarniki?+ 8 Qamkunata sirwiyänaqpaqmi, suwakoq cuenta juk congregacionkunachö këkaqkuna yanapayämänanta* dejarqö.+ 9 Tsënö kaptimpis, qamkunawan këkar wananqäkunata* faltapakurqa, Macedoniapita shamoq wawqikuna llapan wananqäkunawan yanapayämaptinmi, pitapis mañapakur purirqätsu.+ Awmi manam imatapis mañakuyashqëkitsu y tsënö rurarmi sïguishaq.+ 10 Cristunö rasumpa kaqllata parlanqänöllam, Acäya kinrëchö alabakuytapis dejashaqtsu.+ 11 ¿Imanirtan qamkunapita imatapis chaskirqötsu? ¿Qamkunata mana kuyayarnikiku?* Teyta Diosqa musyanmi qamkunata kuyayanqaqta.*
12 Alabakuyanqan asuntuchö* noqakunawan igual kayanqanta rikätsikuyänampaq imallatapis* tarita munaqkuna imapitapis mana alabakuyänampaqmi, rurëkanqäta rurar sïguishaq.+ 13 Tsë nunakunaqa manam rasumpa apostoltsu kayan, jukkunata engañaq trabajadorkuna y Cristupa apostolnin tukoqkunam kayan.+ 14 Kikin Satanaspis alli angel tukur kaptinmi, tsëpaqqa espantakütsu.+ 15 Awmi, manam espantakuypaqtsu sirweqninkunapis allita ruraq tukuyanqan. Peru ushananchö pëkunata pasanqanqa rurayanqanmannömi kanqa.+
16 Yapëmi këta niyaq: ama pillapis juiciunnaq kanqäta pensatsuntsu. Peru juiciunnaq kanqäta pensarpis, juiciunnaq nunatanö chaskïkayämë, tsënöpa ichikllapis alabakunäpaq. 17 Kananqa manam Señor ruranqannötsu parlapëkäyaq, sinöqa kikinllaman confiakoq y alabakoq juiciunnaq nuna ruranqannömi. 18 Mëtsikaq nunakuna kë munduchö kaqpita alabakuykäyaptinqa, noqapis tsëkunapitam alabakushaq. 19 Alläpa “alli juiciuyoq” karmi, qamkunaqa juiciunnaq kaqkunata kushishqa aguantayanki. 20 Awmi, qamkunaqa sirweqnin tikratsiyäshoqnikikunata, imëkëkikunata ushaqkunata, kapuyäshunqëkita apakoqkunata, qamkunapita mas alli tukoqkunata y cärëkikunachö laqyayäshoqnikikunatam aguantayanki.
21 Capazchi noqakunaqa alläpa mantsakoq kayarqö, tsëmi kikïkuna penqakuyänäpaq tsëtaqa niyaq.
Peru wakinkuna rurayanqampita mana penqakuykäyaptinqa noqapis tsënömi rurashaq, tsëtaqa juiciunnaq nunanömi nikä. 22 ¿Hebreu nunaku kayan? Noqapis hebreu nunam kä.+ ¿Israel nunaku kayan? Noqapis Israel nunam kä. ¿Abrahanpa kastanku kayan? Noqapis Abrahanpa kastanmi kä.+ 23 ¿Cristupa sirweqninku kayan? Löcunömi nï: noqaqa pëkunapitapis masmi kä. Noqaqa pëkunapita masmi trabajarqö,+ mas kutim carcelchö karqö,+ atska kutim maqayämashqa y atska kutim wanunäpaqna o wañunäpaqna karqö.+ 24 Pitsqa kutim judïukunaqa treinta y nuëvi kuti astayämarqan,+ 25 kima kutim tukruwan maqayämarqan,+ juk kutim rumikunawan tsampiyämarqan o saqmayämarqan,+ kima kutim viajanqä barcukuna ushakarqan,+ juk paqas y juk junaqmi lamarchö karqä. 26 Mëtsika kutim viajarqö, mayukunata* tsimpëta mana puëdir, suwakoqkunapita peligruchö, marka mayïkunapita peligruchö+ y juk nacion nunakunapita peligruchö karqö,+ tsënöllam markachö këkar,+ tsunyaq sitiuchö këkar, lamarchö këkar y wawqi tukoqkunapitapis peligruchö karqö, 27 imëkata rurarmi alli trabajarqö, atska kutim paqaspa punurqötsu,+ mallaqëkar y yakunëkarmi karqö,+ mëtsika kutim mikurqötsu,+ alalëtam pasarqö y röpannaqmi* quedarqö.
28 Y manam tsëkunata pasanqällatsu, sinöqa waran waranmi mëtsë congregacionkunachö këkaqkunapaq yarpachakü.+ 29 Pillapis mana alli këkaptinqa, ¿manaku noqapis mana alli këkä? Y pillapis creikunqanta dejariptinqa, ¿manaku cölerakü?
30 Alabakunä kaptinqa, mana alli këkanqäta rikätsikoqkunapitam alabakushaq. 31 Imëyaqpis alabashqa kanampaq Señor Jesuspa Teyta Diosnin y Teytanmi, rasun kaqllata nikanqäta musyan. 32 Damascuchö këkaptïmi, gobernaq Arëtaspa mandädunchö gobernador, noqata prësumänampaq Damascu nunakunapa markanta cuidatsirqan, 33 peru markapa perqanchö ventänampam canastawan* bajatsiyämarqan,+ tsënömi makimpita salvakurqä.