1 Tesalonicensis
1 Pablupita, Silvänupita*+ y Timoteupita,+ Teyta Dioswan y Señor Jesucristuwan juknölla këkaq Tesalönica congregacionchö kaqkunapaq:
Teyta Dios qamkunawan alläpa alli këkutsun y yamë kayänëkipaq yanapëkuyäshuy.
2 Mañakuyanqächö qamkunapaq mañakurqa, Teyta Diostam imëpis agradecikuyä.+ 3 Awmi, manam imëpis qonqayätsu Teytantsikpa y Diosnintsikpa rikëninchö markäkur o yärakur rurayanqëkita, kuyakoq kayanqëkita rikätsikur rurayanqëkita+ y Señornintsik Jesucristuchö shuyäkurnin alli tsarakuyanqëkita. 4 Teyta Dios kuyanqan wawqikuna y panikuna, noqakunaqa musyayämi pë akrayäshunqëkita. 5 Awmi, willakuyanqä alli noticiakunataqa, manam shimillapatsu qamkunaman chätsiyämurqä, sinöqa poderwan, santu espïrituwan y willakuyanqäpita següru karmi. Y qamkunaqa musyayankim, qamkunapa biennikikunapaq imanö nunakuna kayanqäta. 6 Manam tsëllatsu, qamkunaqa noqakuna+ y Señor ruranqannömi,+ imëka sufrimientukunapa pasëkarpis,+ santu espïritupita shamoq kushikuywan Teyta Diospa palabranta chaskikuyarqëki. 7 Tsënömi Macedonia y Acäya congregacionkunachö kaqkunapaq alli ejemplu tikrayarqëki.
8 Rasumpa kaqchöqa, qamkunarëkurmi Teyta Jehoväpa* palabranllatatsu Macedoniachö y Acäyachö wiyayashqa, sinöqa mëtsëchömi Diosman markäkuyanqëkipita o yärakuyanqëkipita wiyayashqa,+ tsëmi ima mastapis niyänatsu. 9 Pëkunaqa parlarmi sïguiyan punta kutichö reqinakunqantsikpita, y Teyta Diosman kutir santukunata dejëkur kawëkaq+ y rasumpa Diosta sirwiyanqëkipita, 10 y wanunqampita kawaritsimunqan Tsurin Jesus ciëlupita shamunanta shuyëkäyanqëkipita,+ pëmi ichikllachöna chämoq castïgupita salvamäshun.+