Mateu
16 Tsëchö këkaptinnam fariseukuna y saduceukunaqa, Jesusman witïkur mana alliman chätsita munar ciëlupita ima señal-llatapis pëkunata rikätsinampaq niyarqan.+ 2 Tsënam pëqa kënö nirqan: “Inti o rupay jeqëkaptinmi qamkunaqa, ‘ciëluqa pukarëkanmi, alli tiempum kanqa’ niyanki. 3 Patsa warämuptinnam, ‘kananqa alalanqam y tamyanqam, ciëlu pukëkarpis pukutarëkanmi’ niyanki. Ciëluta rikëkur imanö tiempu kanampaq kaqta tantiarpis, kanan witsan señalkunataqa manam tantiëta yachayankitsu. 4 Teyta Diosta dejareq mana alli nunakunam milagruta rikëta munayan, peru manam ni ima milagrutapis rikäyanqatsu,+ sinöqa Diospa willakoqnin Jonasta pasanqan milagrullatam”.+ Tsënö nïkurmi pëkunata dejëkur ëwakurqan.
5 Tsëpitanam qochapa juknin lädunman tsimpayarqan, y Jesuspa qateqninkunaqa tanta apëtam qonqëkuyarqan.+ 6 Tsënam Jesusqa nirqan: “Fariseukunapa y saduceukunapa levadürampita cuidakuyë”.+ 7 Tsënam pëkunaqa kënö ninakuyarqan: “Manam tantata apamurquntsiktsu”. 8 Tsënö parlëkäyanqanta wiyarnam Jesusqa kënö nirqan: “Markäkuynin o yärakuynin pisheq nunakuna, ¿imanirtan tantëkikuna mana kanqampaq parlëkäyanki? 9 ¿Manaku cuentata qokuyankiraq imapaq parlëkanqäta? ¿Manaku yarpäyanki pitsqa tantapita cincu mil nunakuna mikuyanqanta, y sobranqanta ëka canastaman juntayanqëkita?+ 10 ¿O qonqëkuyarqunkinaku qanchis tantalla cuatru mil nunakuna mikuyänampaq tinkunqanta, y sobranqanta ëka jatun canastaman juntayanqëkita?+ 11 ¿Imanirtan cuentata qokuyarqunkitsu tantapaq mana parlëkanqäta? Noqaqa fariseukunapa y saduceukunapa levadürampita cuidakuyänëkipaqmi qamkunata nirqö”.*+ 12 Tsëran entiendiyarqan tanta rurayänan levadürapaq mana parlëkanqanta, sinöqa fariseukuna y saduceukuna yachatsikuyanqampita cuidakuyänampaq parlëkanqanta.
13 Cesarëa de Filïpu kinrëman chärirnam, qateqninkunata Jesus kënö tapurqan: “¿Nunapa Tsurin pï kanqantataq nunakuna niyan?”.+ 14 Tsënam pëkunaqa kënö niyarqan: “Wakinmi, Bautizakoq Juanmi niyan;+ wakinnam, Elïasmi niyan,+ y wakinnam, Jeremïas o Diospa juk willakoqninchi niyan”. 15 Pënam, “qamkunaqa, ¿pï kanqätataq niyanki?” nirqan. 16 Tsënam Simon Pëdruqa kënö nirqan: “Qamqa Cristum kanki,+ kawëkaq Diospa Tsurin”.+ 17 Jesusnam nirqan: “Kushikuy Jonaspa tsurin Simon, manam nunatsu tsëtaqa musyatsishurqunki, sinöqa ciëluchö këkaq Teytämi.+ 18 Y këtapis neqmi: qammi Pëdru+ kanki, y kë jatun qaqa jananchö+ kayaptinmi wanuypis* noqaman creikoqkunata* vencita puëdinqatsu. 19 Noqam Diospa Gobiernumpa llävinkunata entregashqëki, y imatapis kë patsachö watanqëkiqa, ciëluchöqa watashqanam kanqa, y imatapis kë patsachö paskanqëkiqa, ciëluchöqa paskashqanam kanqa”. 20 Tsëpitanam qateqninkunata alli cläru nirqan pë Cristu kanqanta pitapis mana willayänampaq.+
21 Tsë witsampitam Jesusqa qateqninkunata entienditsirqan Jerusalenman ëwanampaq kaqta, y tsëchö dirigeqkuna, mandakoq sacerdötikuna y Ley qellqaqkuna sufritsiyänampaq kaqta, wanutsiyänampaq o wañutsiyänampaq kaqta y kima junaqta kawaritsimunampaq kaqta.+ 22 Tsënam Pëdruqa juk läduman apëkur qayapar kënö nirqan: “¡Teytë, ama tsënöqa parlëtsu!* Qamtaqa manam tsëqa pasashunkitsu”.+ 23 Jesusnam tumakurir Pëdruta kënö nirqan: “¡Qepäman churakë Satanas! Qamqa ishkitsikoq* rumim noqapaq kanki, qamqa manam Dios pensanqannötsu pensëkanki, sinöqa nunakuna pensayanqannömi”.+
24 Tsëpitanam Jesusqa qateqninkunata kënö nirqan: “Pï nunapis qatimaqnï këta munarqa, amana kikimpaqqa kawatsunnatsu, sinöqa sufrimientu qerunta* aparkur qepäta shamutsun.+ 25 Vïdanta salvëta munaqqa, wanunqam o wañunqam; peru qatimaqnï kanqanrëkur wanoqqa, kawarkamunqam.+ 26 Rasumpa kaqchöqa, ¿imataraq juk nuna logranman kë mundupa duëñun karpis, wanunan kaptinqa?+ ¿O imataraq salvakunampaq nuna entreganman?+ 27 Nunapa Tsurinqa Teytampita chaskinqan poderwan y angelninkunawan shamurmi, cada nunata portakuyanqanmannö juzganqa.+ 28 Noqam qamkunata nï,* këchö këkaqkunapita wakinnikiqa manam wanuyankitsu, Nunapa Tsurinta puëdeq gobernaqnö shamuykaqta rikäyanqëkiyaq”.+