Josuë
3 Tsënam Josuëwan llapan israelïtakunaqa* patsapis manaraq waraptin sharkuyarqan, y Sitim sitiupita+ yarqurninmi Jordan mayuman* chäyarqan. Peru manaraq tsimparmi tsë paqasqa tsëllachö quedakuyarqan.
2 Tsëpita kima junaqtam mandakoqkunaqa,+ entëru campamentuchö 3 llapan israelïtakunata kënö niyarqan: “Levïpa kastan sacerdötikuna Jehovä Diosnintsikpa Sagrädu Cäjanta apëkäyanqanta rikarqa,+ qepantam ëwayänëki. 4 Manam alläpaqa witiyänëkitsu, sinöqa mil metruspanö* karu qepanllatam ëwayänëki, tsënöpam musyayanki më nänipa ëwayänëkipaq kaqta. Qamkunaqa manam imëpis tsë nänipa ëwayarqunkiraqtsu”.
5 Tsëpitanam Josuëqa llapan israelïtakunata kënö nirqan: “Alistakuyë,+ warëmi imëpis mana rikäyanqëkikunata qamkunapaq Jehovä Dios ruramunqa”.+
6 Tsënam Josuëqa sacerdötikunata nirqan: “Sagrädu Cäjata+ hombrurkur llapankunapa puntanta ëwayë”. Tsënam pëkunaqa, Sagrädu Cäjata hombrurkur puntata ëwar qallëkuyarqan.
7 Jehovä Diosqa Josuëtam nirqan: “Kananmi rikätsikushaq Moisesta yanapanqänölla+ qamtapis yanapëkanqaqta.+ Tsënöpam kanampitaqa llapan israelïtakuna respetayäshunki.+ 8 Sagrädu Cäjata apaq sacerdötikunatam mandanëki, Jordan mayupa* kuchunman chärir tsëchö shëkar* quedakuyänampaq”.+
9 Tsënam Josuëqa israelïtakunata nirqan: “Shamur wiyayë Jehovä Diosnintsik nimanqanta”. 10 Tsëpitanam Josuëqa nirqan: “Kananmi cläru rikäyanki rasumpa kawaq Teyta Dios yanapëkäyäshunqëkita,+ y pëmi ushakätsinqa cananeu, hitïta, heveu, perizïta, guirgaseu, amorreu y jebuseu nunakunata.+ 11 ¡Alkäbulla kayanki! Entëru Patsachö gobernaq Diosnintsikpa Sagrädu Cäjanmi, qamkunapa puntëkikunata Jordan mayuman* yëkunqa. 12 Kananqa, Israelchö kastakunapita döci ollqukunata akrayë, jukta cada kastapita.+ 13 Y entëru Patsata kamaq Jehovä Diospa Sagrädu Cäjanta apaq sacerdötikunapa chakinkuna Jordan mayu yakuman yëkuriptinllam, janapita shamoq yakuqa tsapakärinqa y qochakar qallëkunqa”.+
14 Tsënam israelïtakunaqa, Jordan mayupa* tsimpanchö quedakuyanqan sitiupita yarqur qallëkuyarqan, y puntankunatam Sagrädu Cäjata apaq sacerdötikuna ëwayarqan.+ 15 Y Sagrädu Cäjata apaq sacerdötikuna Jordan mayuman* chëkur yakuman yëkuriyaptinllam (cosëcha witsanqa Jordan mayuqa alläpam miran),+ 16 janapita shamoq yakuqa tsapakärirqan. Y Zaretan markapa amänuchö këkaq Adan markayaqmi qochakar kutirqan. Arabä qochaman o Kachi qochaman uraq yakunam ëwarëkarlla ushakärirqan. Yaku qochakashqa quedariptinnam, llapankuna Jericö markapa frentinman tsimpayarqan. 17 Jehoväpa Sagrädu Cäjanta apaq sacerdötikunaqa, llapan israelïtakuna Jordan mayuta tsaki patsapa tsimpayanqanyaqmi,+ mayupa* chowpinchö* tsaki patsachö shëkar* quedariyarqan.+