Jeremïas
10 Israelpita nunakuna, Teyta Jehovä niyäshunqëkita wiyakuyë. 2 Teyta Jehovämi këta nin:
“Ama juk nacion nunakunanöqa portakuyëtsu.+
Ciëluchö imëka espantëpaqkunata rikar
juk nacionkunapita nunakuna mantsakäyaptimpis ama qamkunaqa espantakuyëtsu.+
3 Nunakunapa costumbrinkunaqa manam imapaqpis välintsu.
Pëkunaqa qeruta mutuskirmi imëka rurëta yachaq nunaman apayan,
y pënam herramientanwan santunkuna rurapun.+
4 Tsëpitanam plätawan y öruwan+ adornayan,
y mana ishkinampaqmi martilluwan y clävukunawan alli segurayan.+
5 Tsë santukunaqa pepinïlluta muruyanqan chakrachö,
pishqukunata mantsakätsinampaq churayanqannömi kayan,
y manam parlëtapis puëdiyantsu.+ Purita mana puëdiyaptinmi aparishqa puritsiyan.+
Ama mantsayëtsu, tsëkunaqa manam ni ima allita ni ima mana allita rurëta puëdiyantsu”.+
6 Qamnöqa manam ni pï kantsu.+ Qamqa alläpa puëdeqmi kanki,
jutikiqa Jehovämi y alläpa poderösum kanki.
7 Nacionkunapa gobernaqnin këkaptikiqa,
¿manatsuraq respetayäshunkiman?+
Awmi, tsënömi kanman. Mëtsë nacionkunachö y gobiernukunachöpis
manam qamnö yachaqqa ni pï kantsu.+
8 Llapankunam mana cäsukoq y upa kayan.+
Qerupita santukuna niyanqanqa manam ni imapaqpis välintsu.*+
9 Tarsispitam+ plätata apayämun y Ufaz sitiupitam öruta apayämun.
Tsë santukunataqa, imëka rurë yachaq nuna y öruwan trabajaq nunallam rurashqa.
Azul hïlupita y granäti millwapita rurashqa röpawanmi vistitsiyan.
Tsë santukunataqa imëkatapis alli rurë yachaq nunallam rurashqa.
10 Jehovä Diosllam rasumpa kaq Diosqa.
Pëqa imëpis kawëkaq Dios+ y imëpis Gobernaqmi+ kanqa.
Pë cöleraptinqa patsapis kuyurinmi,+
y mëtsë nacionpita nunakunapis manam tsarakuyta puëdiyantsu.
11 *Kënö nirmi qamkunaqa willakuyänëki:
“Santukunaqa manam ciëluta ni patsata rurayashqatsu.
Tsëmi patsapita y ciëlupa jawampita* llapankuna ushakäyanqa”.+
12 Teyta Diosqa poderninwanmi patsata kamashqa.
Alläpa yachaq karmi muruna chakrakunatapis sitiunman churashqa,+
y imatapis alli entiendirmi ciëlukunata mashtashqa.+
13 Pë parlanqanta wiyarqa,
ciëluchö yakupis wakman këmanmi kuyun.+
Pëqa patsapa entëru kuchumpita pukutë witsänantam permitin.+
14 Llapan nunakunapis mana imata musyaqnö y upanömi portakuyan.
Metalta tsulluratsir rurayanqan santukunaqa manam kawëkäyantsu,+
y manam imapaqpis väliyantsu.+ Tsëmi öruwan trabajaqkunapis,
rurayanqan santukunapita penqakuyanqa.
15 Tsë santukunaqa manam imapaqpis väliyantsu, y ruraqninkunapis penqakuychömi ushayan.+
Teyta Dios tsë santukunata juzganqan junaqqa, llapankunam ushakäyanqa.
16 Jacobpa kastankunapa herencian cuenta
Teyta Diosqa manam tsë santukunanötsu. Pëqa llapantam kamashqa,
y Israelpita nunakunam tukrun cuenta y herencian kayan.+
Pëpa jutinqa angelkunata mandaq Jehovämi.+
17 Warmi, qepikita aptë.
Chikishoqnikiqa entëru läduykichönam këkan.
18 Teyta Jehovämi këta nin:
“Kananmi kë kinrëchö kawaq nunakunata markankunapita qarqushaq,*+
y imëka mana allikunapa pasayänantam permitishaq”.
19 ¡Allaw noqallä! ¡Imëka mana allikunam pasamashqa!+
Herïdäpaqpis manam jampi kantsu.
Tsëmi kënö nirqä: “Këmi noqapa nanënïqa tsë nanëtam alli aguantanä.
Llapan tsurïkunatam apakuyashqa, manam jukllëllapis kannatsu.+
Carpäta armanampaq y tëlankunata mashtanampaqpis, manam ni pï kannatsu.
Upanö portakuyaptinmi cargunchö këkaq üshakunapis
wakpa këpa ëwakuyashqa”.+
22 ¡Wiyayë! ¡Juk noticiatam chätsiyämushqa! Norti läduchö nunakunam büllata rurar këkäyan.+
Y Judä kinrëchö markakunata tsunyaq sitiuman tikratsiyänampaq
y chacalkuna* pärayänan sitiuman tikratsiyänampaqshi mëtsika soldädukuna shamuykäyan.+
23 Teyta Jehovä, noqaqa allim musyä nunakunaqa kikinkunallapita imanö kawayänampaq kaqta mana musyayanqanta.
Awmi, purikaq nunakunaqa manam imanö kawayanqanllatapis alli dirigita puëdiyantsu.+
24 Teyta Jehovä, alli kaqta rurar corregïkallämë.
Peru ama cöleranqëki höraqa,+ mana ushakätsimänëkipaq.+
25 Mana kaqpaq churayäshoqniki nacionkunapita nunakunawan,+
y jutikita mana alabaq familiakunawan alläpa cölerakuy.