Juan

11 Juk kutinam Läzaru jutiyoq nuna qeshyëkarqan. Pëqa paninkuna Marïawan y Martawanmi Betania caserïupita kayarqan.+ 2 Kë Marïam Señorpa chakinman perfümita jichar aqtsanwan tsakitsirqan.+ Pëpa turin Läzarum qeshyëkarqan. 3 Tsëmi paninkunaqa Jesusman juk nunata mandayarqan kënö willanampaq: “Teytë, kuyë amïguykim qeshyëkan”. 4 Tsëta wiyëkurnam Jesusqa nirqan: “Kë qeshyaqa manam Läzaruta wanutsinanllapaqtsu kanqa, sinöqa Teyta Dios alabashqa kanampaqmi,+ y tsërëkur Diospa Tsurimpis alabashqa kanampaq”.

5 Jesusqa Martata, nananta o ñañanta y Läzarutam alläpa kuyaq. 6 Tsënö kaptimpis, Läzaru qeshyëkanqanta musyëkarpis, këkanqan sitiuchömi ishkë junaq mas quedakurqan. 7 Tsëpitanam qateqninkunata “aku, Judëa provinciata yapë ëwashun” nirqan. 8 Tsënam qateqninkunaqa niyarqan: “Maestru,+ tsëllaran Judëa provinciapita nunakunaqa rumiwan tsampiyäshïnikita o saqmayäshuynikita munayashqa,+ ¿tsënö këkaptinku yapë kutita munëkanki?”. 9 Jesusnam nirqan: “Junaqchöqa döci höram aktsi kan, ¿aw?+ Pï nunapis junaqpa purirqa, nunakunapaq aktsita rikarmi imawampis trompizantsu. 10 Peru pï nunapis paqaspa purirqa, rikänampaq aktsi mana kaptinmi trompizar ushan”.

11 Tsëpitanam nirqan: “Amïguntsik Läzaruqa punukärishqam,+ peru riyatsinäpaqmi o rikchatsinäpaqmi pë këkanqanman ëwëkä”. 12 Tsënam qateqninkunaqa, “Teytë, punuykarqa alliyärinqachi” niyarqan. 13 Jesusqa Läzaru wanushqa kanqampaqmi parlëkarqan, peru pëkunaqa descansar punuykanqantam pensayarqan. 14 Tsënam Jesusqa pëkunata cläru nirqan: “Läzaruqa wanushqam,+ 15 y qamkunarëkurmi tsëchö mana kanqäpita alläpa kushikü, tsënöpa qamkuna creiyänëkipaq. Aku, pë këkanqanman ëwashun”. 16 Tsënam Millish nir reqiyanqan Tomasqa, Jesuspa wakin qateqninkunata kënö nirqan: “Aku noqantsikpis ëwashun, pëwan juntu wanunapaq o wañunapaq”.+

17 Jesus chänampaqqa, Läzaruqa chusku junaqnam sepultürachö këkarqan. 18 Betaniaqa Jerusalenpita kima kilömetruchönöllam* këkarqan. 19 Turinkuna wanushqa kaptinmi, Martatawan Marïata shoqaq mëtsikaq judïukuna shayämushqa kayarqan. 20 Jesus ëwëkanqanta musyëkurnam Martaqa taripaq ëwarqan; peru Marïaqa+ wayichömi tëkar quedakurqan. 21 Tsënam Martaqa Jesusta kënö nirqan: “Teytë, këchö kaptikiqa manachi turï wanunmantsu karqan. 22 Peru kanan hörapis noqaqa allim musyä, imatapis mañakuptikiqa, Teyta Dios wiyashunëkipaq kaqta”. 23 Jesusnam, “turikiqa kawarimunqam” nirqan. 24 Tsënam Martaqa nirqan: “Musyämi wanushqakuna kawariyämuptin+ ushanan kaq junaqchö sharkamunampaq kaqta”. 25 Jesusnam nirqan: “Noqam wanushqakunata kawaritseq y nunakunata kawëkaqta katseq kä.+ Noqaman markäkoqqa o yärakoqqa, wanurnimpis kawarimunqam; 26 y noqaman markäkoq o yärakoq kawëkaq nunakunaqa, manam imëpis wanuyanqatsu o wañuyanqatsu.+ ¿Qam tsëta creinkiku?”. 27 Tsënam pëqa nirqan: “Awmi Teytë, noqaqa musyämi nunakunaman shamunampaq kaq Diospa Tsurin Cristu kanqëkita”. 28 Tsëpitanam nanan o ñañan Marïaman ëwar japallanllata qayëkur kënö nirqan: “Maestrum+ këchö këkan, y qayashunkim”. 29 Tsëta wiyëkurnam, Marïaqa jinan höra sharkur rikaq ëwarqan.

30 Jesusqa manaran tsë caserïuman yëkushqaraqtsu karqan, sinöqa Martawan tinkuyanqan sitiullachöran këkarqan. 31 Illaqpita sharkur Marïa ëwakunqanta rikarnam, wayinchö shoqar këkaq judïukunaqa, sepultüraman waqaq ëwëkanqanta pensar qepanta ëwayarqan.+ 32 Jesus këkanqanman chëkur Jesusta rikëkurnam, Marïaqa chakin kaqman qonqurikuykur kënö nirqan: “Teytë, këchö kaptikiqa, manachi turï wanunmantsu karqan”. 33 Marïata waqaqta rikar y qepanta ëwaq judïukunata waqëkäyanqanta rikarmi, Jesusqa shonqunchö* nanatsikur alläpa llakikurqan. 34 Y, “¿mëmantan churayarqunki?” nirmi tapurqan. Tsënam pëkunaqa, “Teytë, shamurnin kikiki rikë” nir contestayarqan. 35 Tsë höram Jesusqa waqarqan.+ 36 Tsëta rikëkurnam judïukunaqa, “rikäyë, ¡imanömi kuyashqa!” niyarqan. 37 Peru wakinkunaqa kënömi niyarqan: “Wisku o qapra nunapa nawinta alliyätsishqa këkarqa,+ ¿manatsuraq Läzaru mana wanunampaq imallatapis ruranman karqan?”.

38 Jesusqa shonqunchömi yapë llakikurqan, y sepultüramanmi ëwarqan. Tsë sepultüraqa machëmi karqan, y jatun rumim punkunta tsaparëkarqan. 39 Tsënam Jesusqa, “rumita wititsiyë” nirqan. Wanukushqa Läzarupa panin Martanam nirqan: “Teytë, chusku junaqnam pasashqa, kananyaqqa alläpanachi asyan”. 40 Tsënam Jesusqa, “¿manaku nirqaq creirqa Teyta Diospa chipapäkoq poderninta rikänëkipaq kaqta?”+ nir tapurqan. 41 Tsëmi rumita wititsiyarqan. Tsënam Jesusqa ciëluman rikëkur+ kënö nirqan: “Teytallä, wiyamanqëkipitam alläpa agradecikoq. 42 Noqaqa musyämi imëpis wiyamanqëkita, peru läduchö këkaq mëtsika nunakuna qam mandamanqëkita creiyänampaqmi këta nikä”.+ 43 Tsënö nirirmi, fuertipa “¡Läzaru, yarqamuy!”+ nirqan. 44 Tsënö niptinnam wanushqa nunaqa chakinkuna y makinkuna wankushqa yarqamurqan, y cärampis tëlawan wankushqam këkarqan. Tsënam Jesusqa, “wankuraq tëlakunata paskayë, y ëwakunanta dejayë” nirqan.

45 Tsëmi Marïata watukaq shamoq mëtsika judïukunaqa, Jesus ruranqanta rikar pëman markäkuyarqan o yärakuyarqan.+ 46 Peru wakinqa fariseukunaman ëwarmi Jesus ruranqanta willayarqan. 47 Tsëmi mandakoq sacerdötikuna y fariseukunaqa, Judïukunapa Jatun Cortinchö trabajaqkunata juntëkur kënö niyarqan: “¿Imatataq rurashun? Kë nunaqa imëka milagrukunatam ruran.+ 48 Tsënölla dejashqaqa, llapanmi pëman markäkur o yärakur qallëkuyanqa, y Röma nunakuna shamurmi templuntsikta* y nacionnintsikta duëñutsakuyanqa”. 49 Peru pëkunapita tsë wata mas mandakoq sacerdöti Caifasmi+ kënö nirqan: “Qamkunaqa manam imatapis entiendiyankitsu. 50 Manam cuentata qokuyankitsu entëru nacion ushakänampa rantinqa, llapan nunakunarëkur juk nunalla wanunan o wañunan mas alli kanqanta”. 51 Peru tsëtaqa manam kikinllapitatsu nirqan, sinöqa tsë wata mas mandakoq sacerdöti karmi, judïu nunakunarëkur Jesus wanunampaq kaqta musyatsikurqan. 52 Y manam judïu nunakunarëkurllatsu, sinöqa wakchö këchö këkaq Diospa tsurinkunata juk grüpullaman juntanampaqmi. 53 Tsëmi imanö wanutsiyänampaq kaqta tsë junaqpita yachatsinakuyarqan.

54 Tsëmi Jesusqa judïukunapa rikëninchö purirqannatsu, sinöqa tsunyaq sitiupa amänunchö këkaq Efrain niyanqan markatam ëwakurqan,+ y tsëchömi qateqninkunawan quedakurqan. 55 Judïukuna rurayanqan Pascua Fiestaqa+ ichikllachönam kanan karqan, y tsë fiesta manaraq qallaptinmi, caserïukunapita atskaq nunakuna, Ley ninqannö Diospa rikëninchö limpiu kayänampaq Jerusalenman witsäyarqan. 56 Wakpa këpam Jesusta ashiyarqan, y templuchömi juknin juknin kënö ninakuyarqan: “¿Ima niyankitan? ¿Manatsuraq fiestaman shamunqa?”. 57 Peru mandakoq sacerdötikuna y fariseukunaqa, Jesusta prësuyta munarmi, pï nunapis mëchö këkanqanta musyarqa willakunampaq mandakuyarqan.