Exodu
40 Tsëpitanam Jehoväqa Moisesta kënö nirqan: 2 “Punta kaq killapa qallanan junaqninmi carpa* wayita+ armanëki.* 3 Tsëpitanam mana rikäyänampaq Sagrädu Cäjata+ cortïnapa qepanman churanëki.+ 4 Y mësata, mësa jananchö churaränampaq kaqkunata y candelabrutam+ carpa* wayipa rurinman churanëki.+ Tsëpitanam candelabrupa chiwchinkunata tsaritsinëki.+ 5 Y inciensuta rupatsiyänampaq örupita altartam Sagrädu Cäjapa frentinman churanëki.+ Y carpa* wayipa yëkunanman churayänampaq ruranqëki bayëtatam warkunëki.+
6 Tsëpitanam ushakanqanyaq rupatsina qarëkunapaq altarta,+ carpa* wayipa frentinman churanëki. 7 Yakuta winayänampaqmi carpa* wayipa y altarpa chowpinman* jatun lavatoriuta churanëki.+ 8 Bayëtakunawanmi patiuta+ cercanëki, y patiupa yëkunanman churayänampaq ruranqëki bayëtatam+ warkunëki. 9 Tsëpitanam rikënïchö limpiu kanampaq, carpa* wayita sagrädu aceitiwan+ limpiuyätsinëki.+ Y rikënïchö sagrädu kayänampaqmi carpa wayita y tsëchö utilizäyänampaq kaqkunatapis limpiuyätsinëki. 10 Tsënöllam ushakanqanyaq rupatsina qarëkunapaq altarta y tsëchö utilizäyänampaq kaqkunatapis limpiuyätsinëki. Tsëtaqa ruranëki tsë altar rikënïchö sagrädu kanampaqmi.+ 11 Tsënöllam rikënïchö limpiu kanampaq jatun lavatoriupa y armazonnimpa jananmampis sagrädu aceitita jichanëki.
12 Tsëpitanam Aarontawan tsurinkunata carpa* wayiman qayëkatsir bañakuyänampaq ninëki.+ 13 Y sagrädu röpakunawanmi Aaronta vistitsinëki.+ Tsëpitanam rikënïchö limpiu kanampaq y sacerdöti karnin sirwimänampaq peqanman o umanman sagrädu aceitita jichanëki.+ 14 Tsënöllam Aaronpa tsurinkunatapis carpa* wayiman qayëkatsir largu röpakunata vistitsinëki.+ 15 Y sacerdöti karnin sirwiyämänampaqmi pëkunapa papäninkunawan ruranqëkinölla peqankunaman o umankunaman sagrädu aceitita jichanëki.+ Aaron, tsurinkuna y tsëpita yureq tsurinkunam imëpis sacerdöti kayanqa”.+
16 Moisesqa Jehovä ninqannöllam llapanta rurarqan.+
17 Ishkë wata pasanqanchönam, punta kaq killapa qallanan junaqninchö carpa* wayita armarqan.+ 18 Puntataqa täcukunata churëkurmi marcukunata jawirqan.+ Tsë marcukunapa chowpimpam* listonkunata ullutsirqan,+ y columnakunatam jawirqan.+ 19 Tsëpitanam piëzanqan bayëtakunawan carpa* wayita qatarqan,+ y tsëpa jananmanmi cabrapa millwampita ruranqan bayëtata y qaratsakunata churarqan.+ Tsëtaqa Jehovä mandanqannöllam Moises rurarqan.
20 Teyta Dios qellqanqan ishkë palta rumikunatam+ Sagrädu Cäja rurinman churarqan.+ Tsëpitanam Sagrädu Cäjapa argöllankunapa listonkunata ulluratsir+ cäjata tsaparqan.+ 21 Y Sagrädu Cäjatam carpa* wayi rurinman yëkutsirqan. Tsëpitanam tsë cäjata mana rikäyänampaq+ cortïnata churarqan.+ Tsëtaqa Teyta Jehovä mandanqannöllam Moises rurarqan.
22 Tsëpitanam cortïnapa puntanchö churaränampaq carpa* wayipa derëcha lädunman mësata churarqan.*+ 23 Teyta Jehoväpa rikëninchö kanampaqmi tsë mësapa jananman tantakunata pelarqan.+ Tsëtaqa Teyta Jehovä mandanqannöllam Moises rurarqan.
24 Tsënöllam mësapa frentinchö churaränampaq carpa* wayipa izquierda lädunman candelabruta+ churarqan. 25 Tsëpitanam Teyta Jehoväpa rikëninchö aktsinampaq candelabruchö chiwchikunata+ tsaritsirqan. Tsëtaqa Teyta Jehovä mandanqannöllam Moises rurarqan.
26 Y cortïnapa frentinmanmi örupita altarta churarqan.+ 27 Tsënöpa shumaq pukutaq o mushkoq inciensuta+ rupatsiyänampaq.+ Tsëtaqa Teyta Jehovä mandanqannöllam Moises rurarqan.
28 Tsëpitanam carpa* wayipa yëkunanchö ëwaq cortïnata churarqan.+
29 Tsënöllam ushakanqanyaq rupatsina qarëkunapaq, y gränupita rurashqa qarëkunata churayänampaq altartapis carpa* wayipa frentinman churarqan.+ Tsëtaqa Teyta Jehovä mandanqannöllam Moises rurarqan.
30 Tsëpitanam carpa* wayipa y altarpa chowpinman* jatun lavatoriuta churarqan, y awikuyänampaqmi* yakuta winarqan.+ 31 Tsëchömi Moises, Aaron y Aaronpa tsurinkuna makinkunata y chakinkunata yakuwan awikuyarqan. 32 Y carpa* wayiman manaraq yëkur, y altarman qarëkunata rupatseq manaraq ëwarmi, tsë yakuwan awikuyaq.*+ Tsëtaqa Teyta Jehovä mandanqannöllam Moises rurarqan.
33 Carpa* wayipa y pishtashqa animalkunata rupatsiyänan altarpa entërumpam patiuta cercarqan.+ Tsëpitanam patiupa yëkunanman churayänampaq ruranqan bayëtata warkurqan.+
Tsënömi Moisesqa Teyta Dios llapan mandanqanta rurarqan. 34 Tsë höram pukutë urämurnin carpa* wayita tsaparkurqan, y Teyta Jehoväpa poderninmi carpa wayiman juntarirqan.+ 35 Carpa* wayipa jananman pukutë urämushqa kaptin, y Teyta Jehoväpa podernin carpa wayiman juntarishqa kaptinmi,+ Moisesqa carpa wayiman yëkuyta puëdirqantsu.
36 Tsë pukutë witsëpa kutikuptinqa, llapan israelïtakunam carpankunata* paskapakuyaq, y tsënömi llapan viäjinkunachö rurayarqan.+ 37 Peru pukutë mana sharkuptinqa manam carpankunata* paskapakuyaqtsu, sinöqa pukutë sharkunqanyaqmi këkäyanqan sitiullachö quedakuyaq.+ 38 Junaqpaqa Teyta Jehovä yuritsinqan pukutëtam carpa* wayipa jananchö rikäyaq, y paqaspanam ninanö rawrëkaq o lunyëkaq pukutëta rikäyaq.+ Tsënö pasakunqantam israelïtakunaqa llapan viäjinkunachö rikäyarqan.