Jeremïas
22 Teyta Jehovämi këta nin: “Judächö gobernaqpa wayinman* ëwar kë ninqaqkunata willë. 2 Kënömi ninëki: ‘Davidpa gobernar täkunampita Judächö gobernaq, sirwishoqnikikuna y kë markapita llapan nunakuna. Awmi, llapëki kë punkupa yëkoqkuna, Teyta Jehovä ninqanta wiyayë. 3 Teyta Jehovämi këta nin: “Imëpis alli kaqta rurayë y rasumpa kaqllata parlayë. Engañakoqkuna mana engañayänampaq nuna mayikikunata yanapayë. Ama forastërukunata mana alli tratayëtsu, y ama papäninnaq kaqkunata ni viudakunata sufritsiyëtsu+ ni kë kinrëchö culpannaq nunakunata wanutsiyëtsu.+ 4 Qamkuna llapan ninqäkunata cumpliyaptikiqa, David gobernar täkunampita gobernaqkunam,+ carrëtankunachö y cawallunkuna montashqa, kë wayipa punkunkunapa yëkayämunqa. Awmi, gobernaqkuna, sirweqninkuna y kë markapita nunakunam yëkayämunqa”’.+
5 ‘Ninqäkunata qamkuna mana cäsukuyaptikiqa, kë wayitam tsunyaq sitiuman tikratsishaq. Tsëtaqa kikïpa jutïchömi qamkunata willëkä’*+ ninmi Teyta Jehovä.
6 Judächö gobernaqpa wayinchö kaqkunapaqmi
Teyta Jehovä këta nin: ‘Qamkunaqa Galaad kinrënö
y Lïbanuchö jirkakunanömi noqapaq kayanki.
Peru tsunyaq sitiumanmi tikratsiyashqëki,
y markëkikunachöpis manam ni pï kawanqanatsu.+
7 Espädankunawan y lanzankunawan ushakätsiyäshunëkipaqmi
imëka ushakätseq nunakunata qamkunaman mandamushaq.+
Pëkunaqa mas alli kaq cedruykikunata muturmi
ninachö ushakätsiyanqa.+
8 Kë markapa pasarmi mëtsë nacionpita nunakuna, “¿imanirtan Teyta Jehoväqa kë reqishqa markata tsënö rurashqa?”+ nir parlayanqa. 9 Tsëpitam kënö ninakuyanqa: “Tsënöqa ushayashqa, Jehovä Diosninkunawan rurayanqan acuerduta mana cumplishqa kar, y santukunapa puntanman qonqurikur imëka mana allikunata rurashqa karmi”’.+
10 Ama wanushqakunapaq waqayëtsu ni llakikuyëtsu.
Juk nacionman apashqa kaqkunapaq llakikur waqayë.
Pëkunaqa manam yuriyanqan markakunaman kutiyämunqanatsu.
11 Josïaspa+ tsurin Salumtaqa,*+ papänimpa rantin Judächö gobernëkaptinmi, juk nacionman apakuyashqa. Pëpaqmi Teyta Jehoväqa këta nin: ‘Manam imëpis kutimunqanatsu. 12 Pëqa apayanqan nacionchömi wanunqa o wañunqa, y manam yapëqa kë kinrë markakunata rikanqanatsu’.+
13 Allaw nuna mayinkunata mana allita rurar wayinta
y jana kaq cuartunkunata ruraq nuna.
Pëqa debaldillam nuna mayinkunata trabajatsin,
y manam trabajayanqampita pagantsu.+
14 Y kënömi nin: ‘Jatun wayitam ruratsishaq,
y jana kaq cuartunkunaqa jatunmi kanqa.
Ventänankunam churatsishaq, y wayipa entëru perqanman
cedrupita tablakunata laqatsirmi pukawan pintatsishaq’.
15 ¿Mëtsika cedru qeruwan wayikita rurartsuraq mas watakuna gobernanki?
Papänikipis mikurqanmi y upurqanmi.
Peru imëpis allillata ruraptin y rasun kaqllata parlaptinmi,+
llapan ruranqampis allilla yarqurqan.
16 Papänikiqa waktsakunapaq y sufrikaqkunapaqmi justiciata rurarqan.
Tsëmi imata ruranqampis allilla yarqurqan.
‘¿Manaku tsëkunataqa noqata alli reqimar rurarqan?’ ninmi Teyta Jehovä.
17 ‘Peru qamqa imëkayoq këta munarmi,
nuna mayikita engañar ushanki, culpannaq nunakunatam wanutsinki
y wakinkunata engañarmi imëkankunawan quedakunki’.
18 Tsëmi Judächö gobernaq Josïaspa tsurin Jehoiaquimpaq+
Teyta Jehovä këta nin: ‘Nunakunaqa, “¡allaw wawqillä! ¡Allaw panillä!
¡Allaw patronllä! ¡Allaw gobernayämaq nuna!”
nirmi wanushqakunapaq llakikuyan.
Peru Jehoiaquimpaqqa manam tsënötsu llakikuyanqa.
20 Löcuyëpa kuyayäshoqniki wënëkikunam ushakäyashqa.+
21 Següru sientikuyanqëki witsanmi qamkunawan parlarqä.
Peru qamkunaqa, ‘manam cäsuyashqëkitsu’+ niyämarqëkim.
Tsënömi jövin kayanqëkipita portakuyarqunki,
y manam ninqäkunata cäsukuyarqunkitsu.+
22 Vientu shamurmi mitsikoqkunata apakunqa+
y löcuyëpa kuyayäshoqnikikunatam juk nacionman apayanqa.
Tsënö imëka mana allikunata pasarmi penqakuychö y allqutsashqa ushanki.
23 Qamqa Lïbanuchömi cedrukuna+ rurinchö kawanki.+
Tsënö kaptimpis, imëka mana allikunata sufrirqa
y imëka mana allikunapa pasarqa, wamran yurinampaqna këkaptin
warmi nanatsikur sufrinqannömi alläpa sufrinki”.+
24 “Teyta Jehoväqa kënöpis ninmi: ‘Judächö gobernaq Jehoiaquimpa+ tsurin Conïas,*+ noqa rasumpa kawanqänöllam, derëcha makïchö sellakuna sortijanö kaptikipis, këkanqëkipitam jipishqëki. 25 Pëkunata alläpa mantsëkaptikim, wanutsishuynikita munaq nunakunapa, Babiloniachö gobernaq Nabucodonosorpa y Caldëapita nunakunapa makinman entregashqëki.+ 26 Noqa permitiptïmi, qamta y mamëkitapis yuriyanqëki markapita juk nacionman apayäshunki, tsëchömi wanuyanki. 27 Kë kinrë markakunaman imëkanöpa kutimuyta munarpis, manam imëpis kutiyämunqanatsu.+
28 ¿Conïasqa pakishqa
y mana ni pï munanqan mankanöku këkan?
¿Imanirtan pëta y kastankunatapis,
mana reqiyanqan markakunaman qarquyashqa?’.+
29 Entëru patsachö* kawaq nunakuna,* Teyta Jehovä ninqanta wiyakuyë.
30 Teyta Jehovämi këta nin: ‘Kë nunapa tsurinkunaqa,
manam David gobernar täkunanchö täkuyanqatsu,
y manam yapëqa Judächö gobernayanqatsu.
Tsëmi kë nunapaqqa, tsurinnaq nunanö kanqanta
y imanö kawanqanchö mana alli yarqupakunqanta nir qellqayë’”.+