Josuë
2 Tsënam Nunpa tsurin Josuëqa, Sitim sitiupita+ ishkë rikapakoqkunata mandarqan. Kënömi nirqan: “Ëwar markakunata rikapakarayämuy y masqa Jericö markata”. Tsënam pëkunaqa ëwayarqan, y qellëpaqrëkur jukwan jukwan kakoq* Rahab+ jutiyoq warmipa wayinmanmi chäyarqan y tsëchömi quedakuyarqan. 2 Tsënam Jericöchö gobernaqta kënö nir willayarqan: “Kanan paqasmi israelïtakuna markantsikkunata rikapakoq shayämushqa”. 3 Tsënö niyaptinmi Jericöpa gobernantinqa soldädunkunata mandarqan Rahabta kënö niyänampaq: “Wayikiman chämoq nunakunaqa markantsikta rikapakoqmi shayämushqa. Tsëmi jinan höra qarqamunëki”.
4 Rahabnam ishkan rikapakoqkunata pakëkur, soldädukunata kënö nirqan: “Awmi, tsë nunakunaqa wayïman chäyämurqanmi, peru manam musyarqätsu mëpita kayanqanta. 5 Tardiyäriptinmi, markapa punkunta manaraq wichqayaptin ëwakuyarqan. Y manam musyätsu mëpa ëwakuyanqanta, jinan höra qatiparninqa taripäyankim”. 6 (Rasumpa kaqchöqa, rikapakoqkunataqa wayimpa altusninman apëkurmi lïnupa tullunkuna qoturëkaqman pakëkushqa karqan). 7 Tsënam soldädukunaqa Jordan mayu* kaqpa qatipar ëwayarqan, y mayuta tsimpayänan sitiukunachömi ashiyarqan.+ Y soldädukuna yarquriyaptinllam markapa punkunta wichqayarqan.
8 Tsëpitanam rikapakoqkuna manaraq punukäyaptin, Rahabqa wayimpa altusninman witsarqan. 9 Y pëkunatam kënö nirqan: “Noqaqa musyämi kë markakunata Jehovä entregayäshunëkipaq kaqta.+ Qamkuna shamunqëkita musyarmi, llapäkunapis alläpa mantsakashqa këkäyä.+ Kë markachö nunakunaqa, manam ni imanö këtapis puëdiyannatsu.+ 10 Wiyayarqömi Egiptupita yarqayämuptiki, tsaki patsapa pasayänëkipaq Puka lamarta Jehovä rakirinqanta.*+ Tsënöllam wiyayarqö, amorreukunapa gobernaqninkuna Sehonta+ y Ogta,+ Jordan mayupa* wak tsimpanchö* wanutsiyanqëkitapis. 11 Tsëta musyëkurmi alläpa mantsakäyarqä. Jehovä Diosnikikunaqa, ciëluchö y Patsachöpis alläpa puëdeq Diosmi. Manam pillapis valurantsu qamkunawan pelyëta.+
12 Kananqa Jehovä Diospa jutinchö änïkalläyämë, qamkunata llakipanqänölla,* qamkunapis papänïpa familianta llakipëkuyänëkipaq. Tsëta següru kanäpaqmi juk señalta munä. 13 Papänïta, mamänïta, turïkunata, nanäkunata o ñañäkunata y pëkunapa familiankunata salvëkulläyë, ama mëqätapis wanutsiyämëtsu”.+
14 Tsënam rikapakoqkunaqa kënö niyarqan: “Imata ruraq shayämunqäta mana willakuyaptiki y kë markata Jehovä entregayämaptinqa, äniyanqaqta cumpliyäshaqmi y llakipäyashqëkim.* ¡Qamkunapaqqa, wanurpis wanuyäshaqmi!”. 15 Tsëpitam Rahabqa tsë rikapakoqkunata juk waskata alistapurqan, y tsë waskawanmi ventänapa bajayarqan. Rahabpa wayinqa tsë markata corralaraq perqachömi karqan, pëqa tsë wayipa altusninchömi täkurqan.*+ 16 Tsëpitanam kënö nirqan: “Jirkakunapa ëwakuyë y kima junaq tsëchö quedakuyë, tsënöpa ashiyäshoqniki soldädukuna mana tariyäshunëkipaq. Pëkuna kutirayämuptinnam, qamkunapis ëwakuyanki”.
17 Tsënam rikapakoqkunaqa kënö niyarqan: “Noqakunaqa rasumpam äniyanqaqta cumpliyäshaq. Tsëpaqqa,+ 18 kë markaman yëkarayämuptïmi, kë bajatsiyämanqëki puka waskata ventänëkiman warkunëki.* Y papänikita, mamänikita, turikikunata, nanëkikunata o ñañëkikunata y papänikipa llapan familiantam kë wayikiman pushamunëki.+ 19 Kë wayikipita pillapis yarquptinqa, manam noqakunatsu wanunqampita o wañuqampita culpayoq kayäshaq, sinöqa kikimpa culpanmi kanqa. Culpayoqqa kayäshaq kë wayichö këkar wanuptinllam. 20 Peru imapaq shayämunqäta willakuptikiqa,+ manam äniyanqaqta cumpliyäshaqtsu”. 21 Tsënam Rahabqa, “qamkuna niyanqëkinö kallätsun” nirqan.
Tsëpitanam Rahabqa pëkunapita despidikurqan y puka waskatam ventänanman warkurqan. 22 Tsënam rikapakoqkunaqa jirkakunata ëwakuyarqan. Tsëchömi kima junaq quedakuyarqan, asheqnin soldädukuna kutikuyanqanyaq. Tsë soldädukunaqa mëtsëpa ashirnimpis manam tariyarqantsu. 23 Tsë ishkan rikapakoqkunaqa jirkapita uräramurmi Jordan mayuta* tsimpayarqan. Y Nunpa tsurin Josuëtam llapan pasakunqanta willayarqan. 24 Y kënömi Josuëta niyarqan: “Jehovä Diosqa rasumpam llapan markakunata entregamarquntsik.+ Tsë markachö nunakunaqa noqantsik shamunqantsikta musyarmi, mantsakarnin ni imanö këtapis puëdiyannatsu”.+