Ezequiel
28 Teyta Jehoväqa yapëmi parlapämarqan y kënömi nimarqan: 2 “Nunapa tsurin, Tïruchö mandakoqta kënö nï: ‘Llapanta Gobernaq Teyta Jehovämi kënö nishunki:
“Qamqa orgullösum tikrarqunki.+ Tsëmi kënö nikanki:
‘Noqaqa diosmi kä. Y dios jamakunanchömi, lamar chowpinchö* tëkä’.+
Peru qamqa, shonquykichö dios kanqëkita pensarpis manam diostsu kanki.
Qamqa nunallam kanki.
3 Awmi, qamqa Danielpitapis mas musyaqmi kanki.+
Imëkatapis llapantam musyanki.
4 Qamqa imëkatapis alli yachar y alli musyarmi rïcuyarqunki.
Örutapis y pläta metaltapis mas mastaran juntëkanki.+
5 Negociu rurëta alli yacharmi, imëkata tarirqunki.+
Tsëmi rïcuyar orgullösu tikrarqunki”’.
6 ‘Tsëmi Llapanta Gobernaq Teyta Jehovä kënö nishunki:
“Shonquykichö dios kanqëkita pensanqëkipitam,
7 llakipäkuyta* mana yachaq juk nacion nunakunatam pushamushaq.+
Pëkunam, yachaq kar imëka shumaqkunata ruranqëkita espädankunawan ushakätsiyanqa.
Y mananam shumaqnatsu kanki.+
9 Y tsë wanutsiyäshoqnikitaqa, ¿‘diosmi kä’ ninkitsuraq?’.
Despreciayäshoqnikikunapa makinchöqa nunallam kanki, manam diostsu”’.
10 ‘Noqa parlashqa kaptïmi juk nacion nunakunaqa,
ishpakunampa puntanchö mana señalakushqa nunatanö despreciar wanutsiyäshunki’ ninmi Llapanta Gobernaq Teyta Jehovä”.
11 Teyta Jehoväqa yapëmi parlapämarqan y kënömi nimarqan: 12 “Nunapa tsurin, Tïruchö gobernaqta llakishqa* cantapë, kënö nï: ‘Llapanta Gobernaq Teyta Jehovämi kënö nishunki:
13 Qamqa Eden huertachömi karqëki, Diospa huertanchö.
Adornuykikunaqa örupitam karqan.
Y örupita këkarpis, tsë adornuykikunaqa tukuyläya shumaq rumikunawan adornashqam karqan.
Rubïwan, topaciuwan, jaspiwan, crisölituwan, öniciwan, jädiwan, zafïruwan, turquësawan+ y esmeraldawan adornashqam karqan.
Tsë llapantam qampaq alistamurqä kamanqaq junaq.
14 Qamtam akrarqaq y churarqaq querubinnö tsapänëkipaq.
Diospa sagrädu jirkanchömi karqëki+ y nina pasëpa* rawrëkaq o lunyëkaq rumikuna chowpimpam* purirqëki.
15 Kamanqaq junaqpitam imëkatapis allillata ruraq kanki.
Peru tsëpitaqa mana allikunatam rurar qallëkurqëki.+
16 Mëtsika negociuyoq karmi,+ lïsu tikrakurirqëki y jutsata* rurarqëki.+
Tsëmi kananqa, tsapäkoq querubin,
Diospa sagrädu jirkampita mana väleqtanö qarqushqëki
y nina rawrëkaq o lunyëkaq rumikunapita mas karuman apëkurmi ushakätsishqëki.+
17 Shumaqllan karmi orgullösu tikrarqunki.+
Shumaq kanqëkipita gälakurmi, yachaq kanqëkitapis qonqarirqunki.+
Tsëmi kananqa patsaman jitarpushqëki.+
Gobernantikunapa puntanchömi penqakatsishqëki.
18 Imëka jutsata* rurar y mana alli negociukunata rurarmi, sagrädu sitiukunatapis respetarqunkitsu.
Tsëmi mandakushaq ninawan prendiyäshunëkipaq y tsëwanmi ushakanki.+
Llapan rikarëkäyäshoqnikipa puntanchömi patsachö qoturëkar uchpa quedarinki.
19 Mëtsë markakunachö llapan reqiyäshoqnikikunam mantsakashqa rikaräyäshunki.+
Mana pensanqëki höram, mantsakëpaq juklla ushakärinki
y mananam ni imëpis rikäyäshunkinatsu”’”.+
20 Teyta Jehoväqa yapëmi parlapämarqan y kënömi nimarqan: 21 “Nunapa tsurin, kananqa Sidonman+ rikëkur willakuy. 22 Kënö nï: ‘Këtam Llapanta Gobernaq Teyta Jehovä nishunki:
“Sidon marka, kananqa contrëkim churakarqö.
Qamta castigapteq y castiganqaqpita respetayämaptinmi, llapan nunakuna musyariyanqa noqa Jehovä kanqäta.
23 Raslla o saslla wanutsikoq qeshyawanmi castigashqëki y cällikunapaqa yakunöran yawar ëwanqa.
Entëru lädumpa atacar espädawan wanutsiyaptinmi, cällikunachöqa wanushqakuna mëtsika kanqa.
Y pëkunaqa musyariyanqam noqa Jehovä kanqäta.+
24 Tsënö ushakätsiptïmi Israel nunakunapa amänunkunachöqa, alläpa nanatsikoq kashanö+ y tuksikoq kashanö kayanqanatsu ni despreciaq nunakuna kayanqanatsu. Y nunakunaqa musyariyanqam, Llapanta Gobernaq Teyta Jehovä noqa kanqäta”’.
25 ‘Llapanta Gobernaq Teyta Jehovämi nin: “Mëtsë markakunachö këkaq israelïtakunata kutitsimuptïmi,+ llapan nacionkuna respetayämanqa,+ y israelïtakunam sirwimaqnï Jacobta+ entreganqä markakunachö kawayanqa.+ 26 Tsëchömi imapitapis mana mantsapakuypa kawakuyanqa,+ wayikunata rurayanqa y üvas plantakunatam plantapakuyanqa.+ Amänun markakunachö nunakunata juzgar condenaptïqa, kushishqam kawakuyanqa.+ Y musyariyanqam noqa Jehovä Diosninkuna kanqäta”’”.