Lücas
10 Tsëpitanam Señorqa qateqninkunapita setenta masta akrëkur, llapan ëwanampaq kaq markakunaman y sitiukunaman pëpa puntanta ëwayänampaq ishkë ishkë mandarqan.+ 2 Tsëpitanam pëkunata kënö nirqan: “Rikäyanqëkinöpis, cosechëpaqqa mëtsikam kan, peru peonkunaqa wallkaqllam kayan. Cosëchanman mas peonkunata mandamunampaq chakrapa Duëñunta rogakuyë.+ 3 ¡Cuidädulla ëwayë! Atoqkunaman* üshakunata mandaqnömi qamkunata mandëkä.+ 4 Ama qellë puritsina bolsata ni mirkapa* puritsina bolsata ni juk par mas llanqita apayankitsu,+ y ama nänichöqa pitapis saludayankitsu.* 5 Më wayimampis yëkurqa, puntataqa ‘kë wayichö kaqkuna yamë kayë’+ nir saludayanki. 6 Yamë këta asheqkunata tsëchö tariyaptinqa, niyanqëkinölla yamë këta tariyätsun. Peru yamë këta mana ashiyaptinqa, yamë kayänanta munayanqëki qamkunaman kutimutsun. 7 Yamë këta asheqkunata tarirqa, qarayäshunqëkita mikur y upur+ tsë wayichö quedakuyanki,*+ ama juk wayita ashir puriyankitsu. Musyayanqëkinöpis, trabajaq nunaqa pägunta chaskinanmi.+
8 Më markachöpis chäyaptiki alli chaskiyäshuptikiqa, qarayäshunqëkita chaskikur mikuyanki, 9 y tsëchö qeshyëkaqkunata alliyätsir kënö niyanki: ‘Diospa Gobiernunqa qamkunaman chëkämunnam’.+ 10 Peru më markachöpis chäyaptiki mana chaskiyäshuptikiqa, mas reqishqa cällinkunaman ëwar kënö niyanki: 11 ‘Qamkunapitana kaptinmi markëkikunachö chakïkunaman laqakämunqan allpata tapsikuriyä.+ Peru këta musyayë: Diospa Gobiernunqa chëkämunnam’. 12 Noqam qamkunata nï,* Juiciu Junaqchöqa Sodömapitapis mas feyupam tsë marka castigashqa kanqa.+
13 ¡Allaw Corazin markapita nunakuna! ¡Allaw Betsaida markapita nunakuna! Qamkunachö rurakanqan milagrukuna* Tïruchö y Sidonchö rurakashqa kaptinqa, unënam tsëchö nunakunaqa chukru tëlakunata janankunaman churakur y uchpa jananman jamakur arrepentikuyanman karqan.+ 14 Tsëmi Juiciu Junaqchöqa, Tïruchö y Sidonchö nunakunapitapis mas feyupa castigashqa kayanki. 15 Y Capernaum markapita nunakuna, ¿qamkunaqa ciëluyaqtsuraq chäyanki? Manam, tsëpa rantinqa, Sepultüramanmi* uräyanki.
16 Qamkunata wiyayäshoqniki kaqkunaqa noqatapis wiyayämanmi,+ peru qamkunata mana wiyayäshoqniki kaqkunaqa, manam noqatapis wiyayämantsu, y noqata mana wiyamaq kaqkunaqa, manam mandamaqnïtapis wiyayantsu”.+
17 Tsëpitanam setenta qateqninkuna kushishqa kutir kënö niyarqan: “Teytë, jutikichö mandayaptïqa demoniukunapis cäsuyämanmi”.+ 18 Tsënam pëqa nirqan: “Räyunö ciëlupita ishkimushqatanam Satanasta rikëkä.+ 19 Rikäyë, culebrakunata y atoq kurukunata jarur ushayänëkipaq, y chikikoq poderninwan imëka ruranqanta venciyänëkipaqmi noqapita poderta chaskiyanki,+ y manam imapis imanäyäshunkitsu. 20 Tsënö kaptimpis, ama mana alli espïritukuna cäsuyäshunqëkipita kushikuyëtsu, sinöqa ciëluchö jutikikuna qellqashqa kanqampita kushikuyë”.+ 21 Tsë höram santu espïrituta chaskir alläpa kushikur kënö nirqan: “Ciëluta y patsata Gobernaq Teytallä, llapankunapa jananchömi alabaq. Qamqa manam yachaq y ni musyaq nunakunatatsu këkunata musyatsirqunki,+ sinöqa pishi wamranö kaqkunatam. Awmi Teytallä, qamqa tsënö kanantam munarqunki”.+ 22 Y kënöpis nirqanmi: “Teytäqa llapantam cargüman churamushqa. Tsuritaqa manam pï nunapis alli reqintsu, sinöqa Teytallam, y Teytatapis manam ni pï alli reqintsu, sinöqa Tsurillam,+ y Tsuri reqitsita munanqan kaqllam”.+
23 Tsëpitanam qateqninkunaman tumëkur japallankunata kënö nirqan: “Kushikuyätsun qamkuna rikëkäyanqëkita rikaqkuna.+ 24 Noqam qamkunata nï,* Teyta Diospa mëtsikaq willakoqninkuna y gobernaqkunam rikäyanqëkita rikëta munayarqan, peru manam rikäyarqantsu,+ y wiyayanqëkitam wiyëta munayarqan, peru manam wiyayarqantsu”.
25 Tsënam Leyta alli reqeq nuna sharkur* mana alliman chätsita munar kënö tapurqan: “Maestru, ¿imatataq ruranä imëyaqpis kawëta chaskinäpaq?”.+ 26 Tsënam pëqa, “¿imatan Leychö qellqarëkan? ¿Imatataq tsëchö leyirqunki?” nirqan. 27 Tsëta contestarnam pëqa kënö nirqan: “‘Jehovä* Diostam llapan shonquykikunawan, llapan kawënikikunawan, llapan kallpëkikunawan y llapan pensënikikunawan kuyayänëki’,+ y ‘qamkuna kuyakuyanqëkinömi nuna mayikikunatapis kuyayänëki’”.+ 28 Tsënam Jesusqa, “allitam nimurqunki, imëpis tsëta rurarqa imëyaqpis kawëtam tarinki”+ nirqan.
29 Tsë nunaqa, alli ruraq kanqanta Jesus rikänanta munarmi,+ kënö tapurqan: “Cläru parlakuychöqa, ¿pitan nuna mayï?”. 30 Tsënam Jesusqa nirqan: “Juk nunam Jerusalenpita Jericöman urëkarqan, tsënam suwakoqkuna maqakacharkur y wanunëkaqta dejëkur röpanta y imëkanta aparkur ëwakuyarqan. 31 Tsë nänipam juk sacerdöti urëkarqan, peru rikëkurqa juk lädupam pasakurqan. 32 Tsënöllam juk levïtapis tsë sitiuman chëkur rikëkurqa, juk lädupa pasakurqan. 33 Peru Samariapita nunam+ tsë nänipa ëwëkar pë këkanqanman charqan, y rikëkurmi alläpa llakiparqan.* 34 Tsënam pëman witïkur aceitita y vïnuta jichar herïdankunata vendapurqan. Tsëpitanam animalninman montarkatsir juk posädaman apar tsëchö cuidarqan. 35 Waränin junaqnam, posadatsikoq nunata ishkë denariuta* paguëkur kënö nirqan: ‘Cuidëkullë, masta gastaptikiqa kutimurmi pagashqëki’. 36 Qampaqqa, ¿tsë kimampita mëqantan nuna mayinta kuyarqan?”.+ 37 Pënam, “llakipar* yanapaq kaqmi”+ nirqan. Tsënam Jesusqa, “ëwar qampis tsënölla rurë”+ nirqan.
38 Nänipa ëwëkäyaptinnam Jesusqa juk caserïuman yëkurqan. Tsëchömi Marta+ jutiyoq warmi wayinchö posadatsirqan. 39 Pëpam Marïa jutiyoq nanan o ñañan karqan. Pëmi Señorpa chakin kaqman jamëkur llapan ninqankunata wiyar këkarqan. 40 Peru Martaqa imëkata rurarmi ocupädu këkarqan. Tsëmi pëman witïkur kënö nirqan: “Teytë, ¿manaku ima ninki imëka rurëpaq këkaptin, nanä japalläta dejaramanqampaq? Shamur yanapamänampaq nïkuy”. 41 Tsënam Señorqa nirqan: “Marta, Marta, imëkata rurar y imëkapaq yarpachakurmi këkanki. 42 Peru wananqantsikqa* juk ishkëllam o jukllëllam. Marïaqa mas alli kaqtam akrashqa,+ y tsëtaqa manam ni pï qochinqatsu o qechunqatsu”.