Mateu
15 Tsënam Jerusalenpita fariseukuna y Ley qellqaqkuna Jesusman+ shamur kënö niyarqan: 2 “¿Imanirtaq qatiräshoqnikikunaqa unë witsan nunakunapa costumbrinkunata rurayantsu? Këllata niriyashqëki, pëkunaqa manam mikuyänampaq makinkunata yakuwan awikuyantsu”.*+
3 Tsënam pëqa nirqan: “¿Y imanirtaq qamkunaqa costumbrikikunata välitsir Teyta Dios mandakunqanta rurayankitsu?+ 4 Këllata niriyashqëki, Teyta Diosqa kënömi nirqan: ‘Papänikikunata y mamänikikunatam kuyar respetayänëki’,+ y: ‘Papäninta o mamäninta insultaq* nunataqa wanutsiyänëkim’.+ 5 Peru qamkunaqa kënömi niyanki: ‘Pï nunapis papäninta o mamäninta, “qamta yanapanaqpaq kapamanqantaqa Teyta Diostam qarëtanö entreguëkurqö”+ neqqa, 6 manam teytankunata respetar yanapanannatsu’. Tsënö nirmi qamkunaqa costumbrikikunata välitsir Diospa palabranta mana kaqpaq churayarqunki.+ 7 Allish tukoq nunakuna, rasuntam Isaïasqa qamkunapaq kënö nirqan:+ 8 ‘Kë nunakunaqa shiminkunallawanmi respetayäman, shonqunkunachöqa manam kuyayämantsu. 9 Ardëllam* adorayämampis, pëkunaqa nunakuna mandakuyanqanllatam yachatsikuyan’”.+ 10 Tsëpitanam nunakunata qayëkur kënö nirqan: “Wiyayë y ima ninan kanqanta entiendiyë:+ 11 manam shimimpa yëkoqtsu nunataqa Diospa rikëninchö mana limpiuta tikratsin, sinöqa shimimpita yarqamoqmi”.+
12 Tsënam qateqninkunaqa Jesusman witïkur niyarqan: “¿Cuentata qokurqunkiku ninqëkita wiyar fariseukuna ofendikuyanqanta?”.+ 13 Tsënam pëqa kënö nirqan: “Ciëluchö këkaq Teytä mana plantanqan plantaqa, sutashqam kanqa. 14 Ama pëkunata cäsuyëtsu, pëkunaqa wisku pushakoqkunam kayan. Juk wisku o qapra, wisku mayinta pushaptinqa, ishkanmi jatun uchkuman jeqarkuyanqa”.+ 15 Pëdrunam, “tsë igualatsikuyta entienditsiyämë” nirqan. 16 Tsënam pëqa kënö nirqan: “¿Manaku qamkunapis entiendiyankiraq?+ 17 ¿Manaku cuentata qokuyanki shimipa yëkoqqa pachapa pasar desäwichö ushanqanta? 18 Peru imapis shimipita yarqamoqqa shonqupitam shamun, y tsëkunam nunataqa Diospa rikëninchö mana limpiuta tikratsin.+ 19 Këllata niriyashqëki, shonqunkunachö mana allita pensarmi nunakunaqa,+ nuna mayinta wanutsiyan, casädu këkar jukwan oqllanakuyan, oqllanakur melanëpaqkunata rurayan,* suwakuyan, mana rasun kaqta parlayan y jukkunata insultayan. 20 Tsëkunam nunataqa Diospa rikëninchö mana limpiuta tikratsin; manam makinta yakuwan mana awikur* mikunqantsu”.
21 Tsëpita yarqurirnam Jesusqa Tïru y Sidon kinrëman ëwakurqan.+ 22 Tsë kinrëpitam fenicia* warmi pëman shamur fuertipa kënö nirqan: “Teytë, Davidpa Tsurin, llakipëkallämë.* Warmi wamrämi demoniuyoq kar alläpa sufrikan”.+ 23 Peru pëqa manam imapis nirqantsu. Tsënam qateqninkunaqa pëman witïkur kënö rogayarqan: “Taqë warmiqa fuertipa rogakurmi qepantsikta shamuykan, ëwakunampaq nïkuy”. 24 Tsënam Jesusqa nirqan: “Noqataqa oqrakashqa üshakunanö këkaq Israel nunakunallamanmi Teyta Dios mandamashqa”.+ 25 Peru tsë warmiqa puntanman ëwëkurmi qonqurikuykur, “¡Teytë, yanapëkallämë!” nir rogakurqan. 26 Tsënam pëqa nirqan: “Manam allitsu wamrakunapa tantanta chushchukunapaq jitëkuyqa”. 27 Tsë warminam nirqan: “Rasunmi Teytë, peru rasumpa kaqchöqa, duëñunkunapa mësankunapita shikwanqanllatam chushchukunaqa mikuyan”.+ 28 Tsënam Jesusqa nirqan: “Warmi, qamqa alläpam markäkunki o yärakunki, munanqëkimannö rurakätsun”. Y tsë höram warmi wamranqa alliyaskirqan.
29 Tsëpita ëwakurnam Jesusqa Galilëa qochapa*+ amänunman chärirqan, y jirkaman witsarkurmi tsëchö tëkarqan. 30 Tsëmannam mëtsika nunakuna cöjukunata, mancukunata, wiskukunata o qaprakunata, müdukunata* y imëkawan qeshyëkaqkunata chätsir puntanman churëkuyarqan, y pënam llapankunata alliyätsirqan.+ 31 Y müdukuna* parlayaptin, mancukuna alliyäyaptin, cöjukuna puriyaptin y wiskukuna o qaprakuna rikäyaptinmi nunakunaqa alläpa mantsakar Israelpa Diosninta alabayarqan.+
32 Tsënam Jesusqa qateqninkunata qayëkur kënö nirqan: “Kë nunakunatam alläpa llakipä,*+ kima junaqnam noqawan quedakuyashqa y manam imatapis mikuyashqatsu. Manam mallaqlla kutikuyänanta munätsu, capaz mallaqar nänichö ishkiskiyanman”.+ 33 Peru qateqninkunaqa kënömi niyarqan: “Teytë, karu sitiuchömi këkantsik, ¿mëchötan tantata tarishun kë mëtsika nunakunapa pachanta juntatsinapaq?”.+ 34 Tsënam Jesusqa, “¿ëka tantataq kayäpushunki?” nirqan. Pëkunanam, “qanchis tantakuna, y juk ishkë ichisaq pescädukunam” niyarqan. 35 Tsëpitanam, tsëchö mëtsika nunakunata patsaman jamakuyänampaq mandëkur 36 qanchis tantata y pescädukunata aptarkur Teyta Diosta agradecikurqan, y pakir pakirmi qateqninkunata entregarqan, y pëkunanam nunakunata qarayarqan.+ 37 Llapankunam pacha junta mikuyarqan, y qanchis canasta junta sobranqantam juntayarqan.+ 38 Cuatru mil ollqukunam mikuyarqan, y warmikuna y wamrakunapis kayarqanmi. 39 Tsëpitanam nunakunata despachëkur barcuwan ëwar Magadan+ kinrëman charqan.