Lücas
8 Tsëpita ichik tiempullatanam, markan markan y caserïun caserïun, Diospa Gobiernumpita alli noticiakunata willakur ëwarqan.+ Pëwanmi ëwayarqan döci apostolninkuna, 2 y mana alli espïritukunapita y qeshyankunapita alliyätsinqan warmikunapis: Magdalëna nir reqiyanqan Marïa, pëpitam qanchis demoniukuna yarqushqa karqan; 3 Herödispa wayinta rikaq Cüzapa warmin Juäna,+ Susäna y mas warmikuna. Pëkunam Jesustawan apostolninkunata imëkankunawan atiendiyaq.+
4 Juk kutinam markan markan qatir ëwaqkunaman mëtsikaq nunakuna juntakäriyaptin, juk igualatsikuywan kënö yachatsirqan:+ 5 “Juk nunam muruta muroq ëwarqan. Y maqtsikaptinmi wakin murukunaqa chakra kuchun näniman shikwayarqan, tsëchömi jarur ushayarqan y pishqukuna shamurmi mikukurkuyarqan.+ 6 Wakinnam qaqakuna kanqanman shikwayarqan, y allpan mana oquraptinmi jeqaramurlla tsakiriyarqan.+ 7 Wakinnam kashakuna rurinman shikwayarqan, y murukunawan juntu kashakuna winarmi pasëpa* tsaparkuyarqan.+ 8 Wakinnam alli allpaman shikwayarqan, y jeqamurmi muruyanqampita cien masta wayuyarqan”.+ Tsëkunata nirirmi fuertipa, “wiyakuyta munaq kaqqa, shumaq wiyakutsun”+ nirqan.
9 Qateqninkunaqa tsë igualatsikuy ima ninan kanqantam tapuyarqan.+ 10 Tsënam pëqa kënö nirqan: “Qamkunataqa Teyta Diosmi yanapayäshunki Gobiernumpita sagrädu noticiata entiendiyänëkipaq, peru wakinkunapaqqa igualatsikuykunata wiyayanqanllachömi llapampis quedarin.+ Tsënöpa wiyarnimpis mana entiendiyänampaq, y rikarnimpis mana yachakuyänampaq.+ 11 Tsë igualatsikuyqa kë ninanmi: muruqa Diospa palabranmi.+ 12 Chakra kuchun näni kinrëman shikwaq muruqa, Diospa palabranta wiyakoqkunam kayan, peru mana creikuyänampaq y Teyta Dios mana salvanampaqmi, Diablu shamur shonqunkunachö murushqa Diospa palabranta ushakäratsin.+ 13 Qaqakuna kanqanman shikwaq murunam, Diospa palabranta wiyar kushishqa chaskikoqkuna kayan. Peru matsun o watsin* janallachö kaptinmi, juk tiempupa creikurpis, imëka mana allikunata pasar creikuyanqanta dejariyan.+ 14 Kashakuna rurinman shikwaq murunam, Diospa palabranta wiyakurpis, imëkapaq yarpachakur, imëkayoq këta+ munar y kë vïdachö kushikuyllaman+ yarpar wiyakuyanqanta qonqareqkuna kayan, tsëmi imatapis wayuyantsu.+ 15 Alli allpaman shikwaq murunam, alli shonqunkunawan+ Diospa palabranta wiyakoqkuna kayan, y tsëkunata shonqunkunachö mana qonqarmi alli tsarakur wayuyan.+
16 Chiwchita tsaritsirqa manam imawampis tsaparkuyantsu ni cäma rurinmantsu churarkuyan, sinöqa wayiman yëkoqkunata aktsinampaqmi churaränanman churayan.+ 17 Manam ima tsaparëkaqpis tsaparëkartsu quedakun, y manam ima pakarëkaqpis pakarëkartsu ni mana musyëtsu imëpis quedakun.+ 18 Tsëmi imanö wiyakuykäyanqëkiman pensayë. Imatapis entiendeqkunaqa mastam entiendiyanqa,+ peru imatapis mana entiendeqkunaqa, entiendiyanqanta pensayanqantapis qonqëkuyanqam”.+
19 Tsënam mamänin y wawqinkuna+ Jesusta rikaq shayämurqan, peru mëtsikaq nunakuna kayaptinmi pëman witita puëdiyarqantsu.+ 20 Tsëmi, “mamëkiwan wawqikikunam waqtachö këkäyan, y rikäyäshuynikitam munayan” nir willayarqan. 21 Tsënam pëqa nirqan: “Mamänï y wawqïkunaqa, këchö këkaq Diospa palabranta wiyakur cäsukoqkunam kayan”.+
22 Juk kutinam Jesusqa qateqninkunawan barcuman yëkur, “qochapa wak tsimpanman ëwashun” nirqan, tsënam ëwar qallëkuyarqan.+ 23 Ëwëkäyaptinmi pëqa punukärirqan, y fuertipa vientur qochata laqcheqsätsiptinmi barcuman yaku winakar qallëkurqan, tsëmi peligruchö këkäyarqan.+ 24 Tsënam qateqninkunaqa pëman ëwëkur, “¡Maestru! ¡Maestru! ¡Kananqa ushakäshunchi!” nir riyatsiyarqan o rikchatsiyarqan. Tsënam pëqa sharkur vientutawan laqcheqsëkaq yakuta qayapëkurqan, y tsë höram llapan calmakärirqan.+ 25 Tsëpitanam, “¿imanirtan markäkuyankitsu o yärakuyankitsu?” nir pëkunata tapurqan. Peru pëkunaqa alläpa mantsakashqa y espantashqa karmi kënö ninakuyarqan: “Rasumpa kaqchöqa, ¿pitan kë nunaqa? Vientutapis y yakutapis mandantaq, y ninqantataq cäsuyan”.+
26 Tsëpitanam Galilëa provinciapa wak tsimpanchö Geräsa nunakunapa markankunaman chäyarqan.+ 27 Tsaki patsaman Jesus yarquriptinllam, demoniuyoq nuna pëman shamurqan. Tsë nunaqa unënam röpannaq purikoq, y manam wayichötsu kawaq, sinöqa sepultürakuna kaqchömi.+ 28 Y Jesusta rikëkurmi, qayarëkur puntanman qonqurikuykur fuertipa kënö nirqan: “¿Imatataq noqapita munanki, Llapanta Gobernaq Poderösu Diospa Tsurin Jesus? Mana sufritsimänëkipaqmi rogakoq”.+ 29 Jesusqa tsë nunapita yarqunampaqmi, tsë mana alli espïrituta kutin kutin mandashqa karqan, tsë espïrituqa atska kutichömi tsë nunaman yëkushqa karqan.*+ Mëtsika kutim cadenarkur y chakinkunaman grillëtikunata churarkur tsë nunata täpar katsiyarqan, peru pëqa cadënakunatapis y chakinkunachö grillëtikunatapis rachirmi pasëpa* ushakäratseq, y demoniu pushaptinmi tsunyaq sitiukunaman ëwakoq. 30 Tsënam Jesusqa, “¿imatan jutiki?” nir tapurqan. Pënam, “Legion” nir contestarqan. Tsënöqa nirqan, mëtsikaq demoniukuna pëman yëkushqa kayaptinmi. 31 Y mankarëkaq uchkuman mana mandanampaqmi rogakuyarqan.+ 32 Tsë kutim amänun jirkachö mëtsika kuchikuna mikur këkäyarqan,+ tsëmi tsë kuchikunaman yëkuyänampaq rogakuyarqan, y pënam tsëta rurayänanta permitirqan.+ 33 Tsënam tsë demoniukunaqa nunapita yarqur kuchikunaman yëkuyarqan. Kuchikunaqa jirkampitam qochaman jeqarkuyarqan, y tsëchömi llapan wanuyarqan o wañuyarqan. 34 Tsënö pasanqanta rikëkurnam kuchi mitseqkunaqa qeshpir ëwakuyarqan, y markachö y amänunkunachömi tsëta willakuyarqan.
35 Tsënam nunakunaqa ima pasanqanta rikaq ëwayarqan. Jesus kaqman chärirnam, mëtsika demoniuyoq kashqa nunata vistishqata y juiciunchöna Jesuspa lädunchö tëkaqta tariyarqan, y tsëta rikarmi alläpa mantsakäyarqan. 36 Pasanqanta rikaqkunam, tsë demoniuyoq nuna imanö alliyanqanta pëkunata willayarqan. 37 Tsënam Geräsa kinrëpita mëtsika nunakunaqa alläpa mantsakar markankunapita ëwakunampaq Jesusta niyarqan. Tsëmi pëqa ëwakunampaq barcuman yëkurqan. 38 Tsënam demoniuyoq kashqa nunaqa pëwan ëwakunampaq Jesusta rogarqan, peru Jesusqa kënö nirmi ëwakunampaq mandarqan:+ 39 “Wayikiman kutir Teyta Dios qampaq ruramunqanta llapan kastëkikunata willë”. Tsënam ëwakur Jesus pëpaq ruranqanta entëru markachö willakurqan.
40 Galilëa provinciaman kutiriptinnam, shuyarëkaq mëtsikaq nunakuna Jesusta kushishqa chaskiyarqan.+ 41 Tsënam Diosta adorayänan wayita rikaq Jairu jutiyoq nuna Jesusman shamurqan, y chakin kaqman qonqurikuykurmi wayinman ëwanampaq kutin kutin rogakurqan.+ 42 Döci watayoqnö jukllëlla warmi tsurinmi wanuykarqanna, tsëmi tsënö rogakurqan.
Jesus ëwëkaptinmi mëtsikaq nunakuna kichkipäyarqan. 43 Tsëchömi döci watapana yawar ëwëwan qeshyëkaq warmi këkarqan,+ y manam ni pï alliyätsita puëdishqatsu karqan.+ 44 Pëmi qepampa witïkur Jesuspa janan röpampa kuchunta yatëkurqan,+ y jinan höram yawar ëwënin pärarirqan. 45 Tsënam Jesusqa, “¿pitan yatamashqa?” nirqan. Llapankuna negayaptinmi Pëdruqa kënö nirqan: “Maestru, läduykichö këkaq mëtsikaq nunakunataq kichkipëkäyäshunki”.+ 46 Tsënam Jesusqa, “pï karpis yatamashqam, noqapita poder yarqunqantam cuentata qokurqö”+ nirqan. 47 Tsë warmiqa ima pasanqanta Jesus cuentata qokushqa kaptinmi, karkaryëkar witïkur puntanman qonqurikuykurqan, y llapan nunakunapa jananchömi imanir yatanqanta, y jinan höra imanö alliyärinqanta willarqan. 48 Tsënam pëqa nirqan: “Hïja, markäkurmi o yärakurmi qeshyëkipita alliyarqunki. Yamëna ëwakuy”.+
49 Manaraq parlar ushaptinmi, Jairupa wayimpita juk nuna shamur kënö nirqan: “¡Warmi tsurikiqa wanukushqanam! Ama Maestruta tiempunta perditsinatsu”.+ 50 Tsëta wiyarnam Jesusqa Jairuta kënö nirqan: “Ama mantsakëtsu, qamqa markäkuylla o yärakuylla, pëqa kawanqam”.+ 51 Wayiman chärirqa Pëdruta, Juanta, Santiäguta, y wamrapa papänintawan mamäninllatam yëkatsirqan, y mastaqa manam pitapis yëkatsirqantsu. 52 Llapan nunakunam wamrapaq waqar y llakikur pëchunkunata kutakur këkäyarqan. Tsëmi pëqa, “ama waqayënatsu,+ wamraqa manam wanushqatsu këkan, sinöqa punuykanllam”+ nirqan. 53 Tsëta niptinnam nunakunaqa wamra wanushqa kanqanta musyar, pëpita burlakurnin asikuyarqan. 54 Pëqa makipita aptarkurmi, “wamra, ¡sharkamuy!”+ nir qayarqan. 55 Tsënam kawarkamur* tsë höra sharkurqan,+ y Jesusqa imallatapis qarayänampaqmi mandakurqan. 56 Tsënam papäninkunaqa alläpa kushikur espantashqa quedayarqan, peru Jesusqa tsë pasanqanta pitapis mana willayänampaqmi mandarqan.+