Gälatas
2 Tsëpita catorci wata pasariptinnam, Bernabëwan+ Jerusalenta yapë witsarqä, y Tïtutapis pusharqämi.+ 2 Revelacionta chaskishqa karmi witsarqä, y juk nacion nunakunata alli noticiakunata willëkanqätam wawqikunata musyatsirqä. Tsënö kaptimpis, ruranqä envänu mana kanqanta segurakunäpaqmi, tsëtaqa creikoqkunachö mas respetashqa ollqukunawan juntakëkurlla rurarqä. 3 Peru griëgu nuna këkaptimpis, manam noqawan këkaq Tïtutapis+ ishpakunampaq puntanchö señalakunampaq obligayarqantsu.+ 4 Tsë asuntuqa yurimurqan wawqi tukoqkuna congregacionchö kaqkunaman yachëllapa yëkayämushqa kayaptinmi.+ Pëkunaqa Cristu Jesuswan juknölla karnin libri kanqantsikpita musyapakurir,+ leypa esclävun tikratsimänapaqmi yachëllapa yëkayämurqan.+ 5 Peru noqakunaqa rasumpa kaqpita alli noticiakuna qamkunachö imëpis kanampaqmi,+ pëkunata ichikllapis* cäsuyarqätsu ni cuentaman churayarqätsu.
6 Peru väleqpaq churayanqan nunakunaqa+ awmi, alläpa respetayanqan nunakunaqa, manam mana musyanqätaqa imatapis niyämashqatsu. Ima kashqa kayaptimpis manam ima qokamantsu, Teyta Diosqa manam nunapa rikëninllatatsu cuentaman churan. 7 Tsëpa rantinqa, ishpakuyänampa puntanchö señalakushqakunata alli noticiakunata willanampaq+ Pëdru carguta chaskinqannölla, ishpakuyänampa puntanchö mana señalakushqakunata alli noticiakunata willanäpaq carguta chaskishqa kanqätam musyariyarqan. 8 Awmi, ishpakuyänampa puntanchö señalakushqakunapa apostolnin kanampaq Pëdruta poderninwan yanapaqmi, noqatapis juk nacion nunakunapa apostolnin kanäpaq poderninwan yanapaman.+ 9 Pëkunaqa Teyta Dios noqakunawan alläpa alli kanqantam cuentata qokuyarqan.+ Tsënam congregacionchö kaqkunapaq columnanö kaqkuna Santiägu,+ Cëfas* y Juanqa, llapäkunapis trabajaq mayi kayanqäta* rikätsiyämar Bernabëtawan noqata+ derëcha makinkunata makyayämarqan, tsënöpa juk nacion nunakunata willaq ëwayänäpaq, y pëkunana ishpakuyänampa puntanchö señalakushqa kaqkunata willaq ëwayänampaq. 10 Tsënö kaptimpis, waktsakunata cuentaman churayänällapaqmi niyämarqan, y gänas gänaslla tsëta ruranäpaqmi kallpachakurqö.+
11 Tsënö kaptimpis, Antioquïaman+ Cëfas+ shamuptinqa, pantashqa* këkanqanta rikarmi, pëwan cläru parlarqä.* 12 Awmi, Santiägu+ kaqpita shamoqkuna manaraq chäyämuptinqa, juk nacion nunakunawanmi mikoq,+ peru pëkuna chärayämuptinqa, manam tsëta rurarqannatsu, sinöqa ishpakuyänampa puntanchö señalakuyta väleqpaq churaqkunata mantsarmi pëkunapita rakikäkurirqan.+ 13 Wakin judïukunapis ishkë cära tikrarmi pënölla rurayarqan, y Bernabëpis ishkë cära tikrarmi pëkunanölla rurarqan. 14 Tsëmi rasumpa kaqpita alli noticiakuna ninqannö mana rurëkäyanqanta rikarnin,+ pëkunapa puntanchö Cëfasta kënö nirqä: “Qam judïu këkar, juk nacion nunakunanö kawëkar y judïukunanö mana kawëkarqa, ¿imanirtan juk nacion nunakunata obliganki judïukunapa costumbrinkunamannö kawayänampaq?”.+
15 Noqantsikqa yurikunqantsikpita judïu kar, y juk nacion nunakunanö jutsa* ruraq mana karmi, 16 alli musyantsik ley ninqanta ruranqampitatsu nunaqa allita ruraqnö rikashqa kanqanta, sinöqa Jesucristuman+ markäkunqanllapita o yärakunqanllapita.+ Tsëmi noqantsikqa Cristu Jesusman markäkurquntsik, tsënöpa ley ninqanta ruranqantsikrëkurtsu, sinöqa Cristuman yärakunqantsikrëkur allita ruraqnö rikashqa kanapaq. Awmi, manam pï nunapis ley ninqanta ruranqampitaqa, allita ruraqnö rikashqatsu kanqa.+ 17 Noqantsik Cristurëkur allita ruraqnö rikashqa këta tïrëkashqa, jukkuna jutsata* ruraqtanö rikämashqaqa, ¿Cristu jutsapa sirweqnin kanqantaku* rikätsikun? ¡Manam tsënötsu! 18 Unë ushakätsinqäta yapë välitsirqa, leyta mana cäsukunqätam rikätsikü. 19 Tsëmi leyrëkur leypaq wanurqö o wañurqö,+ tsënöpa Teyta Diospaqna kawanäpaq. 20 Cristuwan juntum qeruchö clavarëkä.+ Kawëkaqqa manam noqanatsu kä,+ sinöqa Cristum noqawan juntu kawëkan. Awmi, Diospa Tsurinman markäkurmi o yärakurmi kananqa kë cuerpuchö kawëkä.+ Pëqa kuyamarmi noqapaq wanurqan.+ 21 Ley ninqanta ruranqampita, pï nunapis allita ruraqnö rikashqa kaptinqa, manam Cristu wanunqan imapaqpis välintsu.+ Tsëmi noqaqa Teyta Dios alläpa alli kanqanta mana kaqpaqtsu churä.*+