Hebrëus

6 Tsëmi Cristupita qallanan yachatsikuykunata yachakushqana këkarqa,+ poqu këman chänapaqna kallpachakushun,+ ama yapëqa juk cimientuta patsätsishuntsu, mana imapaqpis sirweq rurëkunapita* arrepentikunapaq, Diosman markäkunapaq o yärakunapaq yapë yachakur, 2 y tukuyläya bautismupaq parlaq yachatsikuykunapita, pimampis makita churëpita,+ wanushqakuna kawariyämunampita+ y imëyaqpis juzgashqa këpita yachakur. 3 Teyta Dios permitimashqaqa tsëta lograshunmi.

4 Juk tiempuchö aktsita chaskishqa këkar,+ ciëlupita shamoq qarëta debaldi chaskishqa këkar, santu espïrituta chaskishqa këkar, 5 Diospa alli palabranta chaskishqa këkar, y shamoq tiempuchö* chaskinapaq bendicionkunata rikashqa këkar, 6 Teyta Diospa contran churakaqkunata arrepentikuyänampaq yanapëqa manam puëdipaqnatsu.+ Pëkunaqa yapëmi Teyta Diospa Tsurinta qeruman clavayan y penqakuyman churayan.+ 7 Seguïdu tamyaptin tamyata shoqoq patsaqa Teyta Diospa bendicionnintam chaskin, tsëpitanam murukoqkuna mikuyänampaq murukuyninkunata wayutsin. 8 Peru kashakuna y cardonkuna winaptinqa, maldicirmi mana väleqpaq churayanqa y ninawanmi ushakätsiyanqa.

9 Tsënö parlarpis, qamkunapaqqa kuyashqa wawqikuna y panikuna, pëkunapita mas alli këkäyanqëkita y Teyta Dios salvayäshunëkipaq imëkata rurëkäyanqëkita segürum këkäyä. 10 Teyta Diosqa manam mana allita ruraqtsu, y manam rurayanqëkita y jutinta kuyar limpiu nunakunata sirwikäyanqëkita+ y sirwir sïguikäyanqëkita qonqantsu. 11 Peru shuyarëkäyanqëki ushananyaq següru kanampaqmi,+ cada ünu tsëkunata gänas gänaslla rurëkäyänëkita munayä,+ 12 tsënöpa qela mana tikrayänëkipaq,+ sinöqa markäkur o yärakur y pacienciakur änikuyta chaskeqkunata qatiyänëkipaq.

13 Abrahanta Teyta Dios änirqa, pï nunapis pëpita mas väleq mana kaptin jukpa jutinchö mana jurëta puëdirmi, kikimpa jutinchö jurarqan+ 14 kënö nir: “Noqaqa bendicishqëkim, y qampa kastëkikunaqa mëtsikam kanqa”.+ 15 Tsënömi Abrahanqa pacienciawan shuyaranqampita tsë änikuyta chaskirqan. 16 Nunakunaqa pëkunapitapis mas respetashqapa jutinchömi jurayan, y jurayanqan pëkunapaq garantïanö kaptinmi, ima pleytutapis ushakäratsin.+ 17 Tsënöllam Teyta Diospis, änikunqanta chaskeqkunata+ munanqan mana cambianqanta mas cläru rikätsinampaq, juramentuta rurar garantïata churarqan. 18 Tsëtaqa rurarqan, tsë ishkë mana cambiaqkunarëkur, y Teyta Dios mana ulikunqanta o llullakunqanta musyar,+ tsapämänapaq Teyta Diosman qeshpir ëwaqkuna, shuyarëkanqantsikman confiakunapaq kallpata chaskinapaqmi. 19 Tsë següru y alli patsakashqa shuyarëkanqantsikqa,+ barcu ëwakunanta mana dejaq anclanömi vïdantsikpaq, y cortïna këkanqampitapis mas ruriyaqmi yëkun,+ 20 tsëmanmi puntantsikta ëwaq Jesus+ noqantsikrëkur yëkushqa, pëqa Melquisedecnömi+ imëyaqpis mandakoq sacerdöti këman chashqa.