1 Timoteu

4 Tsënö kaptimpis, Teyta Diospa santu espïritunmi cläru nin, shamoq tiempukunachö Teyta Diospitanö shamoq engañakoq noticiakunata+ y demoniukuna yachatsikuyanqanta wiyakur, wakinkuna creikuyanqanta dejayänampaq kaqta. 2 Tsëqa kanqa engañakur parlaq nunakuna ishkë cära kayanqanrëkurmi,+ pëkunapa concienciankunaqa achachätsishqa fiërruwan marcashqanömi këkan. 3 Pëkunaqa casakuyänantam michäkuyan,+ y markäkoqkuna o yärakoqkuna+ y rasumpa kaqta alli reqeqkuna agradecikur mikuyänampaq,+ Teyta Dios kamanqanta+ mana mikuyänampaqmi nunakunata mandayan. 4 Teyta Dios llapan kamanqanqa alläpa allim,+ y agradecikur mikuyanqantaqa manam imatapis despreciayanmantsu,+ 5 tsëqa Teyta Diospa palabranwan y mañakuyanqanwanmi limpiu tikran.

6 Wawqikunata y panikunata këta consejarqa, creinqantsik y cäsukunqantsik alli yachatsimanqantsikwan alli yachatsishqa Cristu Jesuspa alli sirweqninmi kanki.+ 7 Peru chakwaskuna cuentakuyanqannö, Teyta Diosta deshonraq mana rasumpa cuentukunataqa ama wiyayëtsu.+ Tsëpa rantinqa, llapan shonquykiwan Diosta sirwinëkipaq alistakuy. 8 Ejerciciuta rurëqa ichikllachömi yanapakun, peru llapan shonquntsikwan Teyta Diosta sirwiqa llapanchömi yanapakun, awmi, kanan witsan y shamoq tiempuchö bendicionkunata tariyänampaqmi nunakunata yanapan.+ 9 Tsë ninqäqa confiakuypaqmi, tsëmi tsëmanqa alli creinantsik. 10 Tsëmi kawëkaq Teyta Diosman markäkur o yärakur alli trabajëkantsik y kallpachakuykantsik.+ Pëqa imëkaläya+ nunakunapa Salvaqninmi,+ peru masqa pëta mana dejëpa sirweqkunapa.

11 Tsëkunata mandakur y yachatsikur sïgui. 12 Ama jövin kanqëkipita pï nunapis despreciashuytsu. Tsëpa rantinqa, parlakunqëkichö, portakunqëkichö, kuyakoq kanqëkichö, markäkoq o yärakoq kanqëkichö y limpiu shonquyoq kanqëkichö, Teyta Diosta mana dejëpa sirweqkunapaq alli ejemplu kë. 13 Chämunqäyaqqa jukkunapaq leyinqëkichö,+ wakinkunata consejanqëkichö* y yachatsikunqëkichö mas alliyänëkipaq kallpachakur sïgui. 14 Ama Diospa willakoqninkuna qampaq puntallapitana willakunqannö, anciänukuna* qamman makinkunata churayämuptin, Teyta Diospita chaskinqëki carguta dejëtsu.+ 15 Tsëkunaman pensë, y tsëkunata imëpis rurë, tsënöpam llapankuna cläru rikäyanqa Diospa kaqchö mas alli këkanqëkita. 16 Imanö portakuykanqëkita y imanö yachatsikuykanqëkita imëpis altantu kë.+ Ama tsëkuna rurëta dejëtsu, tsënömi qampis y wiyashoqnikikunapis salvakuyanki.+