Isaïas
6 Gobernaq Uzïas+ wanunqan watam, Teyta Jehoväta rikarqä gobernar jamakunanchö täkuykaqta,+ y vistirëkanqan röpampa largunqa entëru templu rurintam juntaskirqan. 2 Pëpa rikëninchömi serafin niyanqan angelkuna shëkäyarqan,* y cada ünupam joqta älankuna karqan. Ishkë kaqwanmi cärankunata tsapakuyaq, ishkë kaqwannam chakinkunata tsapakuyaq y ishkë kaqwannam volëkäyarqan.
3 Jukninkuna jukninkunam fuertipa kënö ninakuyaq:
“Limpiu, limpiu, limpium angelkunata mandaq Teyta Jehoväqa.+
Alläpa puëdeq kanqanqa entëru patsachömi rikakun”.
4 Pëkuna parlayaptinmi punkunkunapa marcunkunapis kuyurqan, y entëru wayimanmi qoyë o qoshni juntaskirqan.+
5 Tsëmi nirqä: “¡Allaw noqallä! Kananqa ushakäshaqchi.
Noqaqa jutsa* ruraqmi kallä,
y parlanqäpis manam Teyta Diospa rikënimpaq limpiutsu,
kawanqä markachö nunakunapis jutsa ruraqmi kayan
y parlayanqampis manam Diospa rikënimpaq limpiutsu.+
Tsënö këkarmi, Llapanta Gobernaq y angelkunata mandaq Teyta Jehoväta rikarqö”.
6 Tsënö pensëkaptïmi, serafin niyanqan juk angel noqaman shamurqan, y makinchömi altarpita pinzakunawan jipimunqan pukarëkaq+ carbonta katsirqan,+ 7 y shimïta yatëkurmi nimarqan:
“¡Rikë! Kë pukarëkaq carbonmi shimikita topashqa.
Kananqa manam culpayoqnatsu kanki,
y jutsata* ruranqëkipitam perdonashqa karqunki”.
8 Tsë höram Teyta Jehovä kënö ninqanta wiyarqä: “¿Pitaraq mandashaq y piraq noqantsikpa rantintsik ëwanqa?”.+ Tsënam, “¡noqata mandamë! ¡Këchömi këkä!”+ nirqä.
9 Tsënam Teyta Diosqa nimarqan:
“Ëwë, y kë markachö nunakunata këta nï:
‘Wiyarpis qamkunaqa manam entiendiyankitsu,
y rikarpis manam imatapis yachakuyankitsu’.+
10 Tsë nunakuna mana wiyayänampaq ni rikäyänampaq,
shonqunkuna mana entiendikoq kanampaq,+
noqaman mana kutiyämunampaq
y alliyätsishqa mana kayänampaq,
shonqunkunata chukruyätsi,
rinrinkunata tsaparkuy y nawinkunata wichqarkuy”.+
11 Tsënam nirqä: “¿Imëyaqtan tsënö kanqa Teyta Jehovä?”. Tsënam pëqa nimarqan:
“Tsënöqa kanqa tsë markakunata juchutsir* ushakätsiyanqanyaq,
y nunakuna juk nacionman apashqa kayanqanyaqmi.
Tsë pasakuptinqa, manam wayikunachöpis nunakuna kayanqanatsu
y entëru markakunapis ushakashqa y tsunyaqmi quedanqa.+
12 Awmi, tsënöqa kanqa noqa Jehovä
nunakunata karu nacionman apanqäyaq+
y cäsi llapan markakuna tsunyaq quedanqanyaqmi.
13 Peru cada chunka nunapitam juk tsë markachö quedanqa, tsë markaqa yapëmi ninawan ushakätsiyanqa. Tsë quedaq nunakunaqa, roblita o jatun montita o qeruta mutuyaptin troncun quedaqnömi kayanqa, y pëkunaqa Teyta Diospa rikënimpaq limpiu nunakunam kayanqa”.