Marcus
13 Templupita yarquykaptinnam juk qateqnin kënö nirqan: “Maestru, ¡rikë! ¡Imanö shumaqmi templuman churayanqan rumikuna y entëru templupis!”.+ 2 Peru Jesusqa kënömi nirqan: “¿Rikankiku kë shumaq jatun templuta? Këchö rumikunaqa manam perqarëkartsu quedayanqa, sinöqa llapanmi patsachö ushanqa”.+
3 Templupa wak tsimpan Olïvus jirkachö Jesus jamarëkaptinmi, Pëdru, Santiägu, Juan y Andres japallanllata kënö tapuyarqan: 4 “Niyämë, ¿imëtan tsëkuna pasanqa, y ima señalta rikartan tsëkuna ushakänan witsanna kanqanta musyayäshaq?”.+ 5 Tsënam Jesusqa kënö nir qallëkurqan: “Cuidädu kayanki mana ni pï engañayäshunëkipaq.*+ 6 Atskaqmi jutïchö shayämunqa, y ‘noqam pë kä’ nirmi mëtsikaqta engañayanqa. 7 Guërrakuna kanqanta y guërrakuna kanqampaq willakuyanqanta wiyarqa, ama mantsakäyankitsu. Tsëkunaqa pasanqam, peru manam ushakëraqtsu kanqa.+
8 Juk nacionmi juk nacionwan guërrata ruranqa y juk gobiernum juk gobiernuwan pelyanqa.+ Wakchö këchömi terremötukuna y mallaqëpis kanqa.+ Tsë llapankunaqa alläpa sufrimientukunapa qallananllaran kanqa.*+
9 Qamkunaqa nunakunapita cuidakuyanki. Pëkunaqa patsan cortikunamanmi chätsiyäshunki,+ Diosta adorayänan wayinkunachömi astayäshunki,+ y qatimaqnïkuna kayaptikim gobernadorkunaman y gobernaqkunaman chätsiyäshunki, tsëchömi pëkunata noqapita musyatsiyanki.+ 10 Y puntataqa llapan nacionkunachöran alli noticiakuna willakushqa kanan.+ 11 Peru autoridäkunaman chätsiyäshuptikiqa, ama imata parlayänëkipaq kaqman yarpachakuyankitsu, tsë höraqa manam qamkunatsu parlayanki, sinöqa santu espïritum, tsëmi parlayänëkipaq niyäshunqëkita parlayänëki.+ 12 Wawqinllam wawqinta wanutsiyänampaq o wañutsiyänampaq entreganqa, y papäninnam tsurinta wanutsiyänampaq entreganqa, y wamrakunanam papäninkunapa y mamäninkunapa contran karnin wanutsiyänampaq entregayanqa.+ 13 Qamkunataqa qatimaqnïkuna kayaptikim llapan nunakuna chikiyäshunki,+ peru ushananyaq alli tsarakoqqa+ salvakunqam.+
14 Tsëmi imëkata ushakätseq melanëpaqta mana këkänan sitiuchö rikarqa+ (tsëta leyeqqa, shumaq entienditsun), Judëa provinciachö këkaqkuna, jirkakunaman qeshpir ëwakuyanki.+ 15 Wayi janan azoteachö këkaqqa, ama urarnin imëkanta jipeq wayin rurinman yëkutsunnatsu, 16 y chakrachö këkaqqa, ama janan kaq röpanta asheq kutitsuntsu.* 17 ¡Allaw tsë witsanchö qeshyaq këkaq y chichikaq* llulluyoq warmikuna!+ 18 Qeshpir ëwakuyänëki höra tamya witsanchö mana kanampaq, Teyta Diosman mañakur këkäyë. 19 Tsë junaqkunaqa alläpa sufrimientum kanqa.*+ Tsënö sufrimientuqa manam kashqaraqtsu Teyta Dios nunakunata kamanqampita, y manam yapëqa kanqanatsu.+ 20 Tsë tiempu pöcu tiempulla mana kaptinqa, manam ni pï salvakunmantsu, peru akrashqankunapaq yarpachakurmi Teyta Jehoväqa* pöcu tiempulla kananta permitinqa.+
21 ‘¡Rikäyë! Këchömi Cristu këkan’ o ‘¡washachömi këkan!’ niyäshuptikiqa, ama creiyankitsu.+ 22 Cristu tukoqkuna y Diospa willakoqnin tukoqkunam yuriyämunqa.+ Nunakunata engañayänampaq y puëdirqa akrashqakunatapis engañayänampaqmi imëka milagrukunata y espantëpaqkunata rurayanqa. 23 Tsëmi cuidädu kayänëki.+ Manaraq pasakuptinmi tsë llapanta willëkäyaq.
24 Tsë junaqkunachö alläpa sufrimientu pasariptinllam, intipis o rupaypis aktsinqanatsu ni killapis atsikyanqanatsu.+ 25 Estrëllakunapis ciëlupitam jeqayämunqa, y ciëluchö kaqkunapis kuyutsishqam kayanqa. 26 Tsënam pukutë jananchö mëtsika poderyoq+ y chipapäkur shamuykaqta Nunapa Tsurinta rikäyanqa.+ 27 Y patsapa chuskun lädumpita* akrashqankunata juntanampaqmi angelkunata mandanqa. Awmi, patsapa juknin kuchumpita ciëlupa juknin kuchunyaqmi akrashqankunata juntanqa.+
28 Hïgus plantapaq igualatsikuypita yachakuyë. Rämankuna tseqlliptin raprankuna yarqaramuptinqa, musyayankinam usya witsan chämunampaqna kaqta.+ 29 Tsënölla qamkunapis tsëkuna pasanqanta rikarqa, musyayë Nunapa Tsurinqa chämunampaqna këkanqanta, awmi, punkuchöna këkanqanta.+ 30 Noqam qamkunata nï,* tsë llapankuna manaraq pasakuptinqa, manam kanan witsan nunakuna imanöpapis wanuyanqatsu.+ 31 Ciëluwan patsa ushakaptimpis,+ ninqäkunaqa manam imëpis ushakanqatsu.+
32 Tsëkuna imë junaq o imë höra pasanampaq kaqtaqa manam ni pï musyantsu, ni ciëluchö këkaq angelkuna ni Tsuripis, sinöqa kikin Teytallam.+ 33 Tsëmi dispunishqa tiempu imë kanampaq kaqta mana musyëkarqa,+ mana punukarlla alkäbu alkäbu këkäyë.+ 34 Tsëqa juk nacionman ëwakoq nunanömi, ëwakurqa wayinta rikäyänampaqmi sirweqninkunata churarqan,+ cada ünutam imata rurayänampaq nirqan, y punku täpaqtanam alkäbu alkäbu këkänampaq mandarqan.+ 35 Tsënö këkaptinqa, alkäbu alkäbu këkäyë, manam musyayankitsu, inti o rupay jeqanan höra, pullan paqas, gällu cantanqan höra, tempränuraq këkaptin o imë junaq+ wayiyoq nuna chämunampaq kaqta.+ 36 Tsënöpa illaqpita chämur punukashqata mana tariyäshunëkipaq.+ 37 Qamkunata ninqällatam* wakinkunatapis nikä: alkäbu alkäbulla këkäyë”.+