Hëchus

21 Shonqükunachö llakikurpis pëkunapita despidikurmi, barcuman yëkur Cos islaman defrenti ëwayarqä. Waränin junaqnam Rödas islaman ëwayarqä, tsëpitanam Pätara puertuman chäyarqä. 2 Feniciaman ëwaq barcuta tarirnam, tsëman yëkur ëwakuyarqä. 3 Ëwëkarnam, Chipri islata karupita rikar izquierda läduchö dejëkur Siriaman ëwar sïguiyarqä. Tsëpitanam barcupa carganta descargayänan kaptin Tïruchö pärayarqä. 4 Tsëchömi Jesuspa qateqninkunata ashir tariyarqä, y qanchis junaqmi tsëchö quedakuyarqä. Peru santu espïritu yanapaptinmi, pëkunaqa kutin kutin Pabluta niyarqan Jerusalenman mana ëwanampaq.+ 5 Qanchis junaq pasariptinnam viajar sïguiyarqä, y llapankunam warmikunawan y wamrakunawan juntu, tsë markapita yarquyanqäyaq noqakunawan shayämurqan. Tsënam lamar kuchunchö qonqurikuykur Teyta Diosman mañakuyarqä, 6 y despidikuyarqä. Noqakunam barcuman yëkur ëwakuyarqä, y pëkunanam wayinkunata kutikuyarqan.

7 Tïru markapitanam Tolemaida markaman barcuwan ëwayarqä. Tsëchömi wawqikunata y panikunata saludar juk junaq pëkunawan quedakuyarqä. 8 Waränin junaq tsëpita ëwakurnam Cesarëa markaman chäyarqä. Tsëpitanam alli noticiakunata willakoq Felïpipa wayinman ëwar pëwan quedakuyarqä. Pëqa Jerusalenchö apostolkuna akrayanqan qanchis nunakunapita juk kaqmi karqan.+ 9 Pëpaqa Teyta Dios ninqanta willakoq chusku soltëra tsurinkunam karqan.+ 10 Atska junaq tsëchö këkäyaptïnam, Ägabu jutiyoq Diospa willakoqnin Judëa provinciapita urämurqan.+ 11 Pëmi këkäyanqäman shamur Pablupa wachakanta aptarkur, chakinta y makinta watarkur kënö nirqan: “Santu espïritum këta nin: ‘Kë wachakayoq nunatam judïukuna Jerusalenchö kënö watayanqa,+ y juk nacion nunakunamanmi entregayanqa’”.+ 12 Tsëta wiyëkurnam, noqakuna y tsëchö këkaqkunaqa Jerusalenman mana witsänampaq rogayarqä. 13 Tsënam Pabluqa nirqan: “¿Imanirtan waqarnin shonqüta yarpakachätsiyanki? Këta cläru musyayë, noqaqa manam watashqa kanällapaqtsu listu këkä, sinöqa Señor Jesuspa jutinrëkur Jerusalenchö wanunäpaqpis o wañunäpaqpis listum këkä”.+ 14 Cambiatsita mana puëdirnam michëta dejar,* “tsëqa Teyta Jehovä* munanqannö katsun” niyarqä.

15 Tsë junaqkuna pasariptinnam, alistakur Jerusalenman ëwar qallëkuyarqä. 16 Y Chipri islachö Jesuspa punta qateqninkunapita Mnason jutiyoq nunapa wayinchö posadakuyänä kaptinmi, tsëman pushayämänampaq Cesarëa markapita Jesuspa juk ishkë qateqninkuna noqakunawan ëwayarqan. 17 Jerusalenman chäriyaptïnam, wawqikuna y panikuna kushishqa chaskiyämarqan. 18 Waränin junaqnam Pabluqa noqakunawan juntu Santiäguta+ rikaq ëwarqan, y llapan anciänukunam* tsëchö këkäyarqan. 19 Pëkunata saludëkurnam yachatsikur purinqanwan juk nacion nunakunapaq Teyta Dios ruranqanta Pablu cläru willarqan.

20 Tsëta wiyëkurnam pëkunaqa Teyta Diosta alabar qallëkuyarqan, peru tsëpitaqa kënömi niyarqan: “Wawqi, musyanqëkinöpis mëtsika judïukunam creikoq tikrayashqa, y llapankunapis Ley ninqantam llapan shonqunkunawan cäsukuyan.+ 21 Pëkunash wiyayashqa, wamrankunata ishpakuyänampa puntanchö mana señalatsiyänampaq y unë costumbrikunata mana qatiyänampaq nir, juk nacionkunachö judïukunata, Moises qellqanqan Leypa contran* yachatsikur këkanqëkita.+ 22 Tsëqa, ¿imatataq rurashun? Pëkunaqa chämushqa kanqëkitam wiyayanqa. 23 Tsëqa niyanqaqta rurë. Këchömi änikuyanqanta cumplikaq chusku ollqukuna kan. 24 Tsë ollqukunata aparkur pëkunawan juntu Ley ninqannö Diospa rikëninchö limpiakuy y llapan aqtsankunata rutukuyänampaq gastunkunapita cargutsakuy. Tsënöpam llapankuna musyayanqa qampaq parlayanqanqa mana rasumpa kanqanta, sinöqa alli portakuykanqëkita y Ley ninqantapis cäsukuyqanqëkita.+ 25 Juk nacionkunapita creikoqkunapaqqa, santukunapaq apayanqan qarëkunapita,+ yawarpita,+ jurkashqa* animalkunata mikuypita+ y oqllanakur melanëpaqkunata rurëpita*+ cuidakuyänampaqmi, decidinqantsikta qellqarkur apatsirquntsik”.

26 Waränin junaqnam Pabluqa chuskun ollqukunata aparkur pëkunawan juntu Ley ninqannö Diospa rikëninchö limpiakurqan.+ Tsëpitanam Ley ninqannö imë junaq Teyta Diospa rikëninchö limpiu kanampaq kaqta, imë junaq tsë nunakunapaq qarëkunata apayänampaq kaqta templuman willakoq yëkurqan.

27 Qanchis junaqkuna cumplinampaq këkaptinnam, Asiapita judïukunaqa templuchö rikëkur mëtsikaq nunakunata pëpa contran sharkatsiyarqan. Tsënam Pabluta prësoq ëwar 28 fuertipa kënö niyarqan: “¡Israel ollqukuna, yanapayämë! Kë nunam markantsikpa, Leynintsikpa y kë sitiupa contran wakchö këchö nunakunata imëkata yachatsin. Manam tsëllatsu, griëgu nunakunatam templuman yëkatsishqa, y kë sagrädu sitiutam mana limpiuta tikratsishqa”.+ 29 Ëfesupita Tröfimuta+ pëwan markachö rikashqa karmi, pëkunaqa Pablu templuman yëkatsishqa kanqanta pensayarqan. 30 Tsë markachö llapan nunakunam büllar sharkuyarqan, y Pablu jananman cörripa ëwarmi templupita waqtaman qaracharkur apayarqan y tsë höram punkukunata wichqarkuyarqan. 31 Wanutsita munëkäyaptinnam, Jerusalenchö llapan nunakuna büllar sharkuyanqanta, soldädukunapa comandantinta willayarqan. 32 Tsënam pëqa jinan höra soldädukunata y soldädukuna mandaqkunata pusharkur pëkuna këkäyanqanman cörripa urarqan. Soldädukunapa comandantinta y soldädukunata rikëkurnam nunakunaqa Pabluta maqëta dejariyarqan.

33 Tsënam soldädukunapa comandantinqa pëman witir prësurqan, y ishkë cadënakunawan cadenayänampaqmi mandakurqan.+ Tsëpitanam pï kanqanta y imata rurashqa kanqanta tapukurqan. 34 Peru nunakunaqa fuertipam jukta jukta niyaq. Nunakuna büllayaptin rasumpa pasanqanta musyëta mana puëdirnam, soldädukunapa cuartelninman Pabluta apayänampaq mandakurqan. 35 Peru escalon kaqman chëkuptinqa, nunakuna cölerashqa kayaptinmi soldädukuna pallarkur* apayarqan. 36 Tsë nunakunaqa fuertipa büllarmi, “¡wanutsi!” nir qepanta ëwayarqan.

37 Soldädukunapa cuartelninman yëkatsiyänampaq këkäyaptinnam, Pabluqa soldädukunapa comandantinta, “¿jukta nireqmanku?” nirqan. Pënam kënö nirqan: “¿Griëgu idiömata parlankiku? 38 ¿Manaku qamqa qepallataraq gobiernupa contran nunakunata sharkatseq, y cuatru mil asesïnukunata* tsunyaq sitiuman pushaq Egiptu nuna kanki?”. 39 Tsënam Pabluqa kënö contestarqan: “Noqaqa Ciliciachö reqishqa Tarsu markapita+ judïu nunam kä.+ Tsëmi nunakunata parlapänäta permitïkamänëkipaq rogakoq”. 40 Parlananta permitïkuptinam, Pabluqa escalonchö shëkur* nunakunata makinwan sëñasta rurarqan. Llapankuna upällariyaptinnam, hebreu idiömachö pëkunata kënö nirqan:+