Marcus
7 Juk kutinam, Jerusalenpita shamushqa fariseukuna y wakin Ley qellqaqkuna Jesuspa lädunman juntakäriyarqan.+ 2 Jesuspa wakin qateqninkunatam rikäyarqan mana limpiu makinkunawan* o makinkunata yakuwan mana awikushpa* mikuykäyaqta. 3 Fariseukuna y wakin judïukunaqa unë nunakunapa costumbrinkunata qatirmi, makinkunata kukuchinkunayaq yakuwan mana awikurqa, mana mikuyantsu. 4 Mercädupita kutiramurpis, makinkunata yakuwan manaraq awikurqa* manam mikuyantsu, y tsënö mëtsika costumbrikunatam alläpa väleqpaq churayan. Tsëmi cöpakunata, järrakunata y cobripita mankakunata utilizäyänampaqpis puntataqa yakumanraq tullpuyan.+ 5 Tsëmi tsë fariseukuna y Ley qellqaqkunaqa kënö tapuyarqan: “¿Imanirtaq qatiräshoqnikikunaqa mana limpiu makinkunawan mikuyan, y unë witsan nunakunapa costumbrinkunata rurayantsu?”.+ 6 Tsënam pëqa nirqan: “Allish tukoq nunakuna, rasuntam Isaïasqa qamkunapaq kënö qellqarqan: ‘Kë nunakunaqa shiminkunallawanmi respetayäman, shonqunkunachöqa manam kuyayämantsu.+ 7 Ardëllam* adorayämampis, pëkunaqa nunakuna mandakuyanqanllatam yachatsikuyan’.+ 8 Qamkunaqa costumbrikikunata välitsirmi, Teyta Dios mandakunqanta mana kaqpaq churayanki”.+
9 Kënöpis nirqanmi: “Qamkunaqa imëkata rurarmi costumbrikikunata välitsir Teyta Dios mandakunqanta cäsukuyankitsu.+ 10 Këllata niyashqëki, Moisesqa kënömi nirqan: ‘Papänikikunata y mamänikikunatam kuyar respetayänëki’,+ y: ‘Papäninta o mamäninta insultaq* nunataqa wanutsiyänëkim?’.+ 11 Peru qamkunaqa kënömi niyanki: ‘Pï nunapis puëdinmanmi papäninta o mamäninta kënö nita: “Qamta yanapanaqpaq kapamanqanqa corbanmi”’ o Teyta Diosta qarëtanö entreganäpaqmi. 12 Tsënö nirmi qamkunaqa papäninkunapaq o mamäninkunapaq imatapis rurananta dejayankinatsu.+ 13 Tsënömi yachatsikuyanqëki costumbrikikunata välitsir, Teyta Diospa palabranta mana kaqpaq churayanki,+ tsëtanöqa imëkatam rurayanki”.+ 14 Tsëpitanam nunakunata qayëkur kënö nirqan: “Wiyayë y ima ninan kanqanta entiendiyë.+ 15 Imapis shimipa yëkoqqa manam nunata Diospa rikëninchö mana limpiuta tikratsintsu, sinöqa nunapita yarqamoqmi”.+ 16 *
17 Mëtsikaq nunakunata dejëkur juk wayiman yëkuriptinnam, qateqninkunaqa tsë igualatsikuypaq Jesusta tapuyarqan.+ 18 Tsënam pëqa nirqan: “¿Manaku qamkunapis entiendiyankiraq? ¿Manaku cuentata qokuyanki imapis shimipa yëkoqqa nunata mana limpiuta mana tikratsinqanta? 19 Tsëkunaqa manam shonqunmantsu chan, sinöqa pachampa pasarmi desäwichö ushan”. Tsënö nirmi llapan mikuykuna limpiu kanqanta rikätsikurqan. 20 Y kënöpis nirqanmi: “Nunapa shonqumpita yarqoqmi, nunataqa Diospa rikëninchö mana limpiuta tikratsin.+ 21 Shonqunkunachö mana allita pensarmi nunakunaqa,+ oqllanakur melanëpaqkunata rurayan,* suwakuyan, nuna mayinta wanutsiyan o wañutsiyan, 22 casädu këkar jukwan oqllanakuyan, imatapis ërayëpa munayan, mana rasun kaqta parlayan, mana penqakur mana allikunata rurayan,* envidianakuyan, jukkunata insultayan, allish tukuyan y upanö portakuyan. 23 Tsë imëka mana allikunam nunapa shonqumpita yarqamun, tsëmi nunataqa Diospa rikëninchö mana limpiuta tikratsin”.
24 Tsëpita yarqurirnam, Tïru y Sidon+ kinrëman ëwarqan, y tsëchö këkanqanta mana musyayänanta munarmi juk wayiman yëkurqan, tsënö kaptimpis musyaskiyarqanmi. 25 Jesuspaq parlayanqanta wiyëkurnam, warmi wamranman mana alli espïritu yëkushqa kaptin, juk warmi shamur chakin kaqman qonqurikuykurqan.+ 26 Tsë griëga warmiqa Siriachö këkaq Feniciachömi täkoq,* y kutin kutinmi warmi wamrampita demoniuta qarqunampaq rogarqan. 27 Peru Jesusqa kënömi nirqan: “Puntataqa wamrakunaraq pacha junta mikuyätsun, manam allitsu kanman wamrakunapa tantanta chushchukunapaq jitëkuyqa”.+ 28 Tsënam pëqa nirqan: “Rasunmi Teytë, peru mësa jawanchö chushchukunapis, wamrakuna mikur shikwatsiyanqantam mikuyan”. 29 Y Jesusnam, “yamëna ëwakuy, tsënö ninqëkipitam demoniuqa warmi wamrëkipita yarqushqana”+ nirqan. 30 Tsënam pëqa wayinta ëwakur warmi wamranta cämachö jitarëkaqta tarirqan, y demoniuqa pëpita yarqushqanam kanaq.+
31 Tïru kinrëpita Galilëa qochaman kutirnam, Jesusqa Sidonpa y Decäpolis* kinrëpa pasarqan.+ 32 Tsëchönam alli parlëta mana puëdeq sordu nunata pëman apayämurqan,+ y alliyëkatsinampaqmi rogayarqan.* 33 Tsënam pëqa nunakunapita karuman apëkur tsë nunapa ishkan rinrinman dëdunkunata yakarqan, y toqëkurmi qallunta yatëkurqan.+ 34 Tsëpitanam ciëluman rikëkurnin shonqupita shütëkur, “Ëffatha” nirqan, tsëqa “kichakë” ninanmi. 35 Tsë höram rinrinkuna kichakärirqan,+ y alli parlëta mana puëdinqampita alliyarmi allina parlar qallëkurqan. 36 Tsënam Jesusqa pitapis mana willayänampaq nunakunata mandarqan,+ peru mas mandëkaptinmi pëkunaqa masraq willakuyaq.+ 37 Rasumpa kaqchöqa, alläpa espantakurmi+ kënö niyaq: “Imëkatapis allim ruran. ¡Sordukunatapis wiyatsinmi, y müdukunatapis* parlatsinmi!”.+