Santiägu
2 Wawqilläkuna y panilläkuna, ¿imanötan puëdeq këta chaskishqa Señornintsik Jesucristuman markäkuykar o yärakuykar, wakinkunata respetar y wakinkunata despreciar këkäyanki?+ 2 Qamkuna rurayanqëki reunionman dëdunkunachö örupita sortijayoq y alli röpakunawan vistishqa nuna chämuptin, y mana limpiu röpawan vistishqa waktsalla nuna chämuptinqa, 3 ¿alli röpakunawan vistishqa kaqta allipa rikarku, “kë alli kaq sitiuman jamakamuy” niyanki, peru waktsa kaqtaqa, “qamqa tsëllachö shäkamuy”* o “qamqa chakïta jamatsinä bancu lädunllaman jamakamuy” niyanki?+ 4 Tsënö rurarqa, ¿manaku wakinllata mas väleqtanö rikëkäyanki,+ y mana allita decideq juezkuna tikrayarqunki?+
5 Wiyarayämë kuyë wawqilläkuna y panilläkuna. ¿Manaku Teyta Diosqa, pëman alläpa markäkuyänampaq o yärakuyänampaq+ y kuyaqninkunata äninqan Gobiernuta chaskiyänampaq, nunakunapa rikënimpaq waktsa kaqkunata akrashqa?+ 6 Tsënö kaptimpis, qamkunaqa waktsa kaqkunatam despreciayarqunki. ¿Manaku rïcu kaqkunaqa mana alli tratayäshunki y cortikunaman chätsiyäshunki?+ 7 ¿Manaku pëkunaqa chaskiyanqëki alli jutipaq mana allita parlayan? 8 Tsëmi qellqarëkanqanchö, “qamkuna kuyakuyanqëkinömi nuna mayikikunatapis kuyayänëki”+ ninqanta cäsukur, Gobernaqpa alläpa väleq leyninta cumplirqa, alläpa allitam rurëkäyanki. 9 Peru wakinllata mas väleqtanö rikarqa,+ jutsatam* rurëkäyanki, y mana allita rurayanqëkipitam ley condenayäshunki.*+
10 Pï nunapis Ley llapan ninqanta cäsukuykar, juk asuntullachöpis ninqanta mana cäsukurqa, llapan Leypa contranmi jutsata* rurashqa.+ 11 Awmi, “mana majëkikunawanqa manam oqllanakuyänëkitsu”+ neq kaqllam, “manam nuna mayikikunata wanutsiyänëkitsu”+ nirqan. Tsëmi mana majëkiwan mana oqllanakurpis, pitapis wanutsirqa, llapan leypa contran jutsata* rurarqunki.* 12 Qamkunaqa libri nunakuna karmi qamkunachö ley ninqannö juzgashqa kayanki, tsëmi tsëmannö parlar y portakur këkäyë.+ 13 Mana llakipäkoq* nunataqa, mana llakipashpam juzgayanqa.+ Llakipäkoq këqa, juzguëpitapis mas väleqmi.
14 Wawqilläkuna y panilläkuna, ¿imapaqtan välin pï nunapis markäkoq o yärakoq kanqanta ninqan ima allitapis mana rurëkaptinqa?+ Tsënö markäkunqanqa manam salvëta puëdintsu, ¿aw?+ 15 Mëqan wawqipis o panipis röpata wanëkaptin,* y cada junaqpaq mikunan mana këkäpuptin, 16 mëqëkipis “yamëlla ëwakuy, qoñu qoñulla këkë y pacha junta mikuy” niyaptiki, peru cuerpunkunapaq wanayanqanta* mana qarayaptikiqa, ¿imachötan yanapan?+ 17 Tsënöllam markäkoq o yärakoq kayanqëkipis, alli kaqta mana rurayaptikiqa, wanushqa o wañushqa cuenta këkan.+
18 Tsënö kaptimpis, capaz pï nunapis kënö ninqa: “Qamqa markäkoqmi o yärakoqmi kanki, y noqanam allikunata rurarqö. Markäkoq kanqëkita alli rurëninnaqta rikätsimë, y noqanam allita ruranqanwan yärakoq kanqäta rikätsishqëki”. 19 Qamqa juk Dioslla kanqantam creinki, ¿aw? Tsëqa alläpa allitam ruranki. Peru tsëtaqa demoniukunapis creiyanmi, y alläpam mantsakäyan.+ 20 Upa nuna, ¿manaku musyanki alli rurëkunachö mana rikakoq markäkoq o yärakoq këqa mana imapaqpis välinqanta? 21 ¿Manaku unë awiluntsik Abrahanpis, tsurin Isaacta altarchö qarëtanö rupatsishqa karnin ruranqampita allita ruraqnö rikashqa karqan?+ 22 Rikanqëkinöpis markäkoq o yärakoq kanqanqa ruranqanchömi rikakurqan, y markäkoq kanqanqa ruranqanwanmi pasëpa* alliyätsishqa karqan.+ 23 Tsënömi kënö qellqarëkanqan cumplikarqan: “Abrahanqa Teyta Jehoväman* markäkurmi o yärakurmi, allita ruraqnö rikashqa karqan”,+ y Jehoväpa* amïgun nirmi reqishqa karqan.+
24 Tsëchömi rikäyanki nunaqa ruranqampitaraq allita ruraqnö rikashqa kanqanta, y manam markäkoq o yärakoq kanqanrëkurllatsu. 25 Qellëpaqrëkur jukwan jukwan kakoq* Rahabpis, ¿manaku rikapakoq ëwaqkunata shumaq chaskir juk nänipa mandanqanrëkur, ruranqampita allita ruraqnö rikashqa karqan?+ 26 Awmi, kawatsikoq kallpannaq* kar cuerpu wanushqa o wañushqa këkanqannöllam,+ alli rurëkunachö mana rikakoq markäkoq o yärakoq këpis wanushqa cuenta këkan.+