Marcus
5 Tsëpitanam qochapa wak tsimpanchö Geräsa nunakunapa markankunaman chäriyarqan.+ 2 Y barcupita Jesus yarquriptinllam, sepultürakuna kaqpita mana alli espïrituyoq nuna pëman shamurqan. 3 Pëqa sepultürakuna kaqchömi täkoq,* y tsë witsanyaqqa, cadënawampis manam ni pï alli watëta puëdeqtsu. 4 Mëtsika kutim makinta cadenayarqan y chakinkunaman grillëtikunata churayarqan, peru pëqa cadënakunatapis rachiskeqmi y chakinkunachö grillëtikunatapis pasëpam* ushakäratseq, y manam ni pï dominëta puëdeqtsu. 5 Sepultürakunachö y jirkakunachömi paqasta junaqta fuertipa büllar y rumikunawan roqukur pureq. 6 Peru Jesusta karupita rikëkurmi, cörripa ëwar puntanman qonqurikuykur+ 7 fuertipa kënö nirqan: “¿Imatataq noqapita munanki Llapanta Gobernaq Poderösu Diospa Tsurin Jesus? Diospa jutinchö jurëkamë mana sufritsimänëkipaq”.+ 8 Tsënöqa nirqan, Jesus kënö niptinmi: “Kë nunapita yarquy mana alli espïritu”.+ 9 Tsënam Jesusqa, “¿imatan jutiki?” nir tapurqan. Pënam, “mëtsikaq kayaptïmi jutïqa Legion”* nir contestarqan. 10 Y tsë kinrëpita mana qarqunampaqmi, tsë mana alli espïritukunaqa kutin kutin Jesusta rogayarqan.+
11 Amänun jirkachömi+ mëtsika kuchikuna mikur këkäyarqan.+ 12 Tsënam tsë mana alli espïritukunaqa, “kuchikunaman mandëkayämë pëkunaman yëkuyänäpaq” nir rogakuyarqan. 13 Tsënam Jesusqa tsëta rurayänanta permitirqan, y tsë mana alli espïritukunaqa nunapita yarqurmi kuchikunaman yëkuyarqan. Y dos milnö kuchikunam jirkampita qochaman jeqar tsëchö wanuyarqan o wañuyarqan. 14 Tsënam kuchi mitseqkunaqa qeshpir ëwakuyarqan, y tsë markachö y amänunkunachömi tsëta willakuyarqan. Tsënam nunakunaqa ima pasakunqanta rikaq shayämurqan.+ 15 Jesus kaqman chärirqa, mëtsika demoniuyoq kashqa nunata vistishqata y juiciunchöna tëkaqta rikarmi alläpa mantsakäyarqan. 16 Demoniuyoq nunata y kuchikunata ima pasanqanta rikaqkunam, llapan pasakunqanta pëkunata willayarqan. 17 Tsënam nunakunaqa tsë kinrëpita ëwakunampaq Jesusta rogayarqan.+
18 Barcuman Jesus yëkuriptinnam, demoniuyoq kashqa nunaqa pëwan ëwakunampaq Jesusta rogarqan.+ 19 Peru pëqa manam qatinanta munarqantsu, sinöqa kënömi nirqan: “Wayikita ëwar kastëkikunaman kutikuy, y qampaq Jehovä* ruramunqanta y llakipäshunqëkita* pëkunata willë”. 20 Tsënam tsë nunaqa ëwakurqan, y pëpaq Jesus ruranqantam entëru Decäpolischö* willakurqan. Tsëta wiyarnam nunakunaqa alläpa espantakuyarqan.
21 Tsëpitanam Jesusqa qochapa wak lädunman barcuwan yapë tsimparqan, y qochapa kuchunchö këkaptinmi mëtsika nunakuna tsëman juntariyarqan.+ 22 Tsënam Diosta adorayänan wayita rikaqkunapita Jairu jutiyoq nuna Jesusman shamurqan, y rikëkurmi chakin kaqman qonqurikuykur+ 23 kutin kutin kënö rogakurqan: “Warmi wamrallämi grävi këkan.* Shamuykullë, y makikita+ pëman churëkullë alliyärir mana wanunampaq”. 24 Tsënam Jesusqa pëwan ëwarqan, y mëtsikaq nunakunam pëta kichkir-raq qepanta ëwayarqan.
25 Tsëchömi döci watapana+ yawar ëwëwan qeshyëkaq+ warmi këkarqan. 26 Mëtsika doctorkunaman ëwashqa kaptimpis alläpam sufritsishqa kayarqan. Imëkantam ushashqa karqan, peru alliyänampa rantinmi mas peorashqa karqan. 27 Jesuspaq willakuyanqanta wiyashqa karmi, mëtsika nunakuna rurimpa ëwar Jesuspa janan kaq röpanta qepampa yatëkurqan.+ 28 Tsëtaqa rurarqan, “janan kaq röpanllatapis yatëkurqa, alliyärishaqmi” nirmi.+ 29 Tsë höram yawar ëwënin pärarirqan, y alläpa sufritseq qeshyampita alliyärishqa kanqantam cuerpunchö sientirqan.
30 Tsë höram Jesusqa pëpita poder yarqushqa kanqanta cuentata qokur,+ mëtsika nunakunaman tumëkur, “¿pitan janan kaq röpata yatamushqa?”+ nir tapukurqan. 31 Tsënam qateqninkunaqa kënö niyarqan: “¿Mëtsika nunakuna kichkikäyäshunqëkita rikëkarku, ‘¿pitan yatamashqa?’ nir tapukunki?”. 32 Tsënö niyaptimpis, pï yatashqa kanqanta musyëta munarmi pëqa wakpa këpa rikachakurqan. 33 Tsënam tsë warmiqa alliyashqa kanqanta cuentata qokur, alläpa mantsakar karkaryëkarqan, y Jesusman witïkurmi qonqurikuykur llapanta willarqan. 34 Tsënam pëqa kënö nirqan: “¡Hïja! Markäkurmi o yärakurmi qeshyëkipita alliyarqunki. Yamëna ëwakuy,+ ama kë qeshyawan sufrinatsu”.+
35 Manaraq parlar ushaptinmi, Jairupa* wayimpita nunakuna shamur kënö niyarqan: “¡Warmi tsurikiqa wanukushqanam! ¿Imapaqnatan Maestruta tiempunta perditsinki?”.+ 36 Tsënö niyanqanta wiyarnam Jesusqa Jairuta kënö nirqan: “Ama mantsakëtsu, qamqa markäkuylla o yärakuylla”.+ 37 Tsëpitanam Pëdruta, Santiäguta, y Santiägupa wawqin Juanta pusharkur ëwarqan, y wakin ëwayänantaqa manam munarqantsu.+
38 Jairupa wayinman chärirnam, nunakuna büllayanqanta y fuertipa waqar këkäyanqanta rikarqan.+ 39 Tsënam yëkurir kënö nirqan: “¿Imanirtan büllar y waqar këkäyanki? Wamraqa punuykanllam, manam wanushqatsu”.+ 40 Tsëta niptinnam nunakunaqa pëpita burlakurnin asikuyarqan. Peru Jesusqa llapankunata waqtaman yarquyänampaq nïkurmi, wamrapa papäninta, mamäninta y pëwan këkaqkunata pusharkur, wamra këkanqanman yëkurqan. 41 Tsëpitanam wamrata makipita aptarkur, “Tälitha cümi” nirqan, tsëqa, “wamra, noqam ‘¡sharkamuy!’ neq” ninanmi.+ 42 Tsë höram wamraqa sharkamur purir qallëkurqan. Pëqa döci watayoqmi karqan. Tsëta rikëkurmi alläpa kushikur espantashqa quedayarqan. 43 Peru pëqa kutin kutinmi tsë pasanqanta pitapis mana willayänampaq cläru mandakurqan,+ y wamrata imallatapis qarayänampaqmi nirqan.