Ezequiel
24 Isqun watachömi, chunka killapa chunka junaqninchö, Teyta Jehoväqa yapë parlapämarqan y kënömi nimarqan: 2 “Nunapa tsurin, kanan junaq ima fëcha kanqantapis apuntë, kanan junaqmi Babiloniapa gobernantinqa Jerusalen markata atacar qallëkushqa.+ 3 Tsë mana cäsukoq nunakuna imanö kayanqanta entiendiyänampaq juk igualatsikuywan willakuy, tsë nunakunapaq kënö nï:
‘Llapanta Gobernaq Teyta Jehovämi kënö nin:
“Tullpaman mankata* churkurkur yakuta winë.+
4 Tsë mankamanna mas allin kaq pedasashqa ëtsakunata,+
chankankunata, palitinkunata y tullukunatapis mas allin kaqta winë.
5 Tsëpaqqa mas allin kaq üshakunata pishtanki+
y tullpaman yantata alli qotuykur, tsë pedasashqa ëtsakunata y tullukunata alli puwatsinki”’.*
6 Tsëmi Llapanta Gobernaq Teyta Jehovä kënö nin:
‘¡Allaw marka! ¡Yawarta jichaq marka!+ Tsë markaqa oxidashqa mankanömi, oxidunta mana limpiayanqan mankanö.
Tsë mankapita llapan ëtsakunata mana akrëllapa jukpa jukpa jipimuy.+
7 Tsë markachöqa nunakunapa yawarnintam jichëkäyanllaraq,+ peru manam patsamantsu jichayashqa allpawan tsapayänampaq,
sinöqa allpapis mana kanqan qaqa jananmanmi jichayashqa.+
8 Cölerar castiganäpaqmi pëkunapa yawarnintapis
allpannaq rumi jananman jicharqö,
allpan mana kaptinmi imawan tsapëtapis puëdiyanqatsu’.+
9 Llapanta Gobernaq Teyta Jehovämi kënö nin:
‘¡Allaw marka! ¡Allaw yawar jichaq marka!+
Kananqa mëtsika yantatam qotushaq.
10 Mëtsika yantata qoturkur ninata tsaritsi y mankachö këkaq ëtsata alli puwatsi,*
tsëpitana tullukuna rupar ushakänampaq caldunta qemari.
11 Alli achachänampaq jinëlla mankata carbon jananman churëkur,
tsëchö cobripita rurashqa manka pukayanqanyaq achachätsun,
tsëchömi rakchampis o qanrampis tsullur ushakanqa+ y oxidumpis rupanqa.
12 Kë mankaqa alläpa oxiduyoqmi y oxidunqa manam yarquntsu,
tsëmi kë mankaqa alläpa cölerëpaq y aburripaq.+
¡Tsë oxidashqa mankata ninaman jitarkuy!’
13 ‘Imëka jutsakunata* rurashqa karmi, alläpa rakcha o qanra karqunki y imëkatam rurarqö limpiu kanëkipaq,+ peru rakchëkiqa manam yarquntsu, cölerä pasaptinran limpiuqa tikranki.+ 14 Noqa Jehovämi parlarqö y parlanqänöllam rurakanqa, pensanqätaqa cumplishaqmi y manam llakipäyashqëkitsu,* mana alli portakuyanqëkipita+ y mana allikunata rurayanqëkipitam juzgayäshunki’. Tsënömi nin Llapanta Gobernaq Teyta Jehovä”.
15 Teyta Jehoväqa yapëmi parlapämarqan y kënömi nimarqan: 16 “Nunapa tsurin, noqa munaptïmi derepentita kuyë warmiki wanukunqa,+ pë wanukuptin ama llakikunkitsu ni waqankitsu.* 17 Llakikurpis shonquykillachö llakikunki, peru wanupakur nunakuna rurayanqantaqa ama rurankitsu,+ peqëkita o umëkita wankunëki tëlata churakunki+ y llanqikita llanqikunki,+ ama shimikita* tsapankitsu+ y mikunëkipaq apayämunqan tantatapis ama mikunkitsu”.+
18 Tsëmi patsa waräriptinlla nunakunata parlaparqä, y tardipaqqa warmïmi wanukurqan, tsëmi waräninqa Teyta Dios nimanqannölla rurarqä. 19 Tsënam nunakunaqa kënö niyämarqan: “¿Imanirtan tsëta rurëkanki? ¿Imatan pasayämanqa? Willayämë”. 20 Tsënö tapuyämaptinnam kënö contestarqä: “Teyta Jehovämi kënö nimashqa: 21 ‘Israel nunakunata kënö nï: “Llapanta Gobernaq Teyta Jehovämi kënö niyäshunki: ‘Alläpa kuyayanqëki, yachanäyanqëki y alabakur katsiyanqëki sagrädu templütam mana kaqpaq churashaq.+ Y dejayanqëki ollqu wamrëkikunata y warmi wamrëkikunatam espädawan wanutsiyanqa o wañutsiyanqa.+ 22 Tsëmi qamkunapis noqa ruranqänö rurayanki, manam shimikikunata* tsapakuyankitsu y mikuyänëkipaq apayämunqan tantatapis manam mikuyankitsu.+ 23 Peqëkikunata o umëkikunata wankuyänëki tëlatapis ni llanqikikunatapis manam jipiyankitsu y manam llakikur waqayankitsu, tsëpa rantinqa imëka jutsata* rurayanqëkita yarparkurmi alläpa sufriyanki+ y llakikuyanki.* 24 Ezequielta pasanqankunaqa qamkunatapis pasayäshunkim.+ Pë ruranqankunatam qamkunapis rurayanki, tsë llapankuna pasayäshuptikiqa musyayankim Llapanta Gobernaq Jehovä noqa kanqäta’”’”.
25 “Nunapa tsurin, qamtaqa willayäshunkim. Kuyayanqan, yachanäyanqan, kuyar katsiyanqan markankunata* y warmi wamrakunata y ollqu wamrankunata ushakätsiptïmi,+ 26 tsë sitiupita qeshpimoq nuna llapan pasanqanta willashunki.+ 27 Tsë junaqpaqqa parlëta puëdinkinam, tsëmi tsë qeshpimoq nunawan parlanki, manam müdunatsu* kanmi.+ Pëkunapaqmi juk señal kanki, y musyariyanqam noqa Jehovä kanqäta”.