1 Rëyes
3 Egiptuchö gobernantiwanmi Salomonqa parlarqan warmi wamranwan casakunampaq.+ Y casakurirmi David Marka+ nir reqiyanqan markaman aparqan. Tsë witsanmi Salomonqa rurëkätsirqan kikimpa wayinta,+ Jehovä Diospa wayinta+ y Jerusalen markapa murällanta.+ 2 Jehovä Diosta adorayänampaq+ wayi manaraq kaptinmi,* israelïtakunaqa Teyta Diosta adorayänan sagrädu sitiukunachö*+ animalkunata pishtëkur rupatsiyaq. 3 Salomonqa Jehovä Diosta kuyarmi, papänin David ninqankunata cäsukurqan. Y Diosta adorayänan sagrädu sitiukunachömi*+ animalkunata pishtëkur rupatseq.
4 Tsëpitanam gobernanti Salomonqa pishtashqa animalkunata rupatsinampaq, Gabaon markachö Diosta adorayänan sagrädu sitiuman* ëwarqan, tsë sitiuqa mas jatun y mas reqishqam karqan.+ Tsëchömi mil animalkunata pishtëkur Teyta Diospaq rupatsirqan.+ 5 Gabaonchö këkaptinmi suëñuyninchö Salomonta yuripur Jehovä Dios nirqan:+ “Imatapis munanqëkita mañamë”. 6 Tsënam gobernanti Salomonqa kënö nirqan: “Papänï Davidqa, mandanqëkita cäsukurmi alli shonqunwan sirwishurqëki. Tsëmi qamqa pëta alläpa kuyarqëki. Tsënöpam papänïpa rantin gobernanti kanäpaq permitirqunki.+ 7 Teyta Jehovä, papänï Davidpa rantin gobernanäpaqmi churëkämanki. Jövinllaraq karmi imanö gobernëtapis yachätsu.+ 8 Kananqa yupëtapis mana puëdipaq akranqëki+ nunakunapa gobernantinmi kashaq. 9 ¿Piraq puëdinman mëtsikaq nunakunata gobernëta?+ Yanapëkallämë llapan shonqüwan cäsukunäpaq y ima alli y mana alli kanqanta musyanäpaq.+ Tsënöpam markëkita alli gobernëta puëdishaq”.
10 Salomon tsënö mañakunqanqa Jehovä Diospaq allim karqan.+ 11 Tsëpitanam Teyta Diosqa kënö nirqan: “Qamqa manam atska wata kawanëkipaqtsu, rïcu kanëkipaqtsu ni contrëkikunata ushakätsinäpaqtsu mañakamarqunki, sinöqa justiciata ruranëkipaq yachëyoq këtam+ 12 y tsëtam ruramushaq.+ Tsëmi alli yachaq kanëkipaq y imatapis alli entiendinëkipaq yanapashqëki.+ Yachaq kanqëkinöqa manam ni pï kashqatsu, ni manam imëpis kanqatsu.+ 13 Tsënöllam mana mañakëkämaptikipis+ yanapashqëki rïcu kanëkipaq y reqishqa kanëkipaq.+ Qam kawanqëkiyaqqa, manam ni pï gobernantipis qamnöqa kanqatsu.+ 14 Y papäniki Davidnö leynïkunata y mandamientükunata cäsukuptikiqa,+ atska watakuna kawanëkipaqmi yanapashqëki”.+
15 Tsë llapanta suëñukuykarmi Salomonqa riyarkamurqan o rikcharkamurqan. Tsënam Jerusalen markata ëwar Jehoväpa Sagrädu Cäjan churaranqanchö pishtashqa animalkunata rupatsirqan, y Teyta Dioswan amïgu kayanqanta rikätsikurmi qarëkunata rupatsirqan.+ Tsënöllam llapan sirweqninkunapaq mikuyta ruratsirqan.
16 Tsë witsanmi qellëpaqrëkur jukwan jukwan kakoq* ishkë warmikuna gobernantiman quejakoq ëwayarqan. 17 Juk kaq warmim kënö nirqan: “Teytallë, kë warmiwanmi tsë wayillachö täkuyä.* Y juk junaqmi wamrä yurirqan. 18 Wamrä yurikunqampita kima junaqtanam pëpapis wamran yurikurqan. Tsë wayichöqa manam ni pï karqantsu, ishkäkunallam këkäyarqä. 19 Juk paqasmi kë warmiqa, punuykanqanchö llullu wamranta wanoqpaq lapirirqan.* 20 Tsënam pullan paqasqa wanushqa wamranta oqllanïman churëkamur, llullu wamräta aparkur oqllakurkurqan. 21 Patsa waräriptinnam wamräta chichita* munarqä, peru oqllanïchöqa wanushqa wamram këkänaq. Alli rikärinäpaqqa manam wamrätsu kanaq, sinöqa pëpa wamranmi kanaq”. 22 Tsënam juk kaq warmiqa nirqan: “Manam ninqëkinötsu, kawëkaq wamraqa noqapam, y qampaqa wanushqa kaqmi”. Juknin kaqnam nirqan: “Manam, wanushqa kaqmi qampaqa, y kawëkaq wamraqa noqapam”. Tsënö nirmi gobernantipa puntanchö pleytuyarqan.
23 Tsënö pleytuyaptinmi gobernantiqa kënö nirqan: “Këkaq warmim, ‘¡kawëkaq wamraqa noqapam y wanushqa kaqmi qampaqa!’ nin, y juk kaq warminam, ‘¡manam, wanushqa kaqmi qampa wamrëkiqa, y kawëkaqmi noqapaqa!’ nin”. 24 Tsëpitanam gobernantiqa nirqan: “Juk espädata apayämuy”. Apëkuyaptinnam 25 kënö nirqan: “Kawëkaq wamrata ishkëman roqurir, ishkan warmikunata pullan pullan entreguëkuyë”. 26 Tsënam kawëkaq wamrapa mamanqa, llullunta alläpa kuyarnin gobernantita kënö rogarqan: “¡Teytallë ama wanutsilläyätsuntsu! ¡Tsëpa rantinqa kawëkaqllata taqë warmita entreguëkuyë!”. Peru juk kaq warminam kënö nirqan: “¡Ishkëman juklla roquriyätsun! ¡Tsënöpam pëpis ni noqapis gustükunawanqa quedayäshaqtsu!”. 27 Tsënö niptinmi gobernantiqa nirqan: “Amana roquyëtsu. Wamrataqa, wanunanta mana munaq warmita entreguëkuyë, pëmi rasumpa kaq mamanqa”.
28 Tsë problëmata gobernanti imanö arreglanqanta musyarirqa, llapan israelïtakunam espantakuyarqan.+ Y cuentatam qokuyarqan justiciata ruranampaq Teyta Dios yanapëkanqanta.+