Isaïas
5 Kuyashqäpaq cantaramunäta permitïkayämë,+
kuyashqalläpaq y üvas chakrampaq cantaramushaq.
Kuyashqäpaqa ladërachömi alli wayoq üvas chakran kapurqan.
2 Pëqa patsata uchkurmi rumikunata jitamurqan,
y alli kaq puka üvastam plantarqan.
Tsëpitaqa üvas plantan alli üvasta wayunantam shuyararqan,
peru mana imapaqpis sirweq üvasllatam wayurqan.+
3 Tsëmi pëqa kënö nin: “Jerusalenpita y Judäpita nunakuna,
noqata y üvas chakräta kanan juzgayämë.+
4 Üvas chakräpaqqa imëkatanam rurarqö,
¿ima mastanaraq ruräman?+
Alli üvas wayunanta shuyëkaptïqa,
¿imanirtan mana imapaqpis sirweq üvasllata wayushqa?
5 Kananmi willayashqëki üvas chakräta imata ruranäpaq kaqta:
ninawan ushakätsiyänampaqmi+ cercunkunata jipishaq,
y jarur ushayänampaqmi rumipita perqanta juchutsishaq.*
6 Imapis mana jeqanqan chakramanmi tikratsishaq;+
üvas plantakunatapis manam ni pï llümapanqatsu o llawmipanqatsu
Kashakuna y mana alli qorakunallam juntanqa
y pukutëtapis manana tamyamunampaqmi mandashaq.+
7 Noqa angelkunata mandaq Jehoväpa
üvas chakräqa Israel nunakunam kayan,+
y Judä nunakunanam kuyanqä plantakuna kayan.
Noqaqa allita rurayänantam shuyararqä,+
peru pëkunaqa mana allitam rurayashqa.
Noqaqa alli portakuyänantam shuyararqä,
peru sufritsiyanqan nunakuna llakikur waqayanqanllatam wiyarqö”.+
8 Allaw, wayiyoq këkar mas wayikunata ranteqkuna,+
y chakrankuna këkaptin mas chakrakunata ranteqkuna.+
Pëkunaqa manam wakinkunapaq imatapis dejayantsu,
y pëkunallam entëru sitiupa duëñun kayan.
9 Tsënö kaptimpis, tsë jatusaq
y shumaq wayikuna ushakänampaq kaqta
y tsë wayikunachö ni pï mana kawanampaq kaqta
angelkunata mandaq Teyta Jehovä jurar parlanqantam wiyarqö.+
10 Jatun üvas chakrapitam veintidos litrus* vïnulla yarqunqa,
y cientu sesenta kïlus* trïguta mururpis
11 Allaw, washkuta upuyänampaq tempränulla shärikoqkuna,+
y paqasyanqanyaq y juiciunkunata oqrayanqanyaq vïnuta upoqkuna.
12 Mëtsika mikuyta ruratsiyanqanchöqa, manam vïnu faltantsu,
arpata, cuerdayoq instrumentukunata,
panderëtakunata y flautakunatam tocayan.
Peru manam yarpäyantsu Teyta Jehovä ruranqankunata,
y manam ichikllapis pensayantsu llapan rurëkanqanman.
13 Tsëmi kuyë marka mayïkunataqa
Teyta Diosta mana reqiyanqampita juk nacionman apayanqa.+
Reqishqa nunakunapis mallaqäyanqam,+
y llapan nunakunam alläpa yakunäyanqa.
Jerusalenchö reqishqa nunakuna,* büllata ruraq nunakuna
y fiestallachö kakoq nunakunam tsëchö ushayanqa.
15 Nunakunaqa mana kaqpaq churashqa
y penqakatsishqam kayanqa,
y tsënöllam allish tukoqkunapis penqakatsishqa kayanqa.
16 Allita ruranqampitam
angelkunata mandaq Teyta Jehoväqa alabashqa kanqa.
Y allita rurarmi+ Dios Yayaqa Limpiu Dios+ kanqanta rikätsikunqa.
17 Pachata alli mikushqa animalkuna pärayanqan sitiukunachömi,
üshakunapis qewachö libri këkaqnö mikuyanqa,
y tsë tsunyaq sitiukunachömi, juk nacion nunakunapis mikuyanqa.
18 ¡Allaw mana rasumpa kaqta parlaqkuna!
Mana allita rurayanqankuna y jutsata* rurayanqanmi
pëkunataqa watashqatanö katsin,
y animalkuna sutayanqan carrëtanömi wakman këman apashqa kayan.
19 Pëkunaqa kënömi niyan: “Teyta Dios ruranqanta rikänapaq,
ruranampaq kaqta kanan höra ruratsun.
Ima rurëta munanqanta musyanapaq,
Israelpa Limpiu Diosnin rurëta munanqan cumplikätsun”.+
20 Allaw, allita mana allim neqkuna, y mana allita allim neqkuna,+
ampita o tsakëta* junaqtanö rikaqkuna y junaqtana paqastanö rikaqkuna
pochqoqpaq mishkinmi neqkuna mishkeqpaqna pochqunmi neqkuna.
21 Allaw, yachaq tukoqkuna,
y alli juiciuyoq tukoqkuna.+
22 Allaw, vïnu upuychö reqishqa kaqkuna,
llapan machatsikoqkunata takuyta yachaqkuna,+
23 chaskipakuyänanrëkur mana allita ruraqkuna
culpannaq kayanqanta neqkuna,+
y allita ruraqkunapaq justiciata mana ruraqkuna.+
24 Tsëmi raströjuta y tsaki qewata nina ushakätsinqannö
pëkunapis ushakäyanqa.
Watsinkunapis o matsunkunapis* ismurmi ushakanqa,
y wëtankunapis polvunömi mëtsëman apashqa kanqa.
Tsënöqa pasanqa, angelkunata mandaq Teyta Jehovä
mandakunqankunata* mana chaskikushqa kayaptin,
y Israelpa Limpiu Diosnin ninqankunata mana respetashqa kayaptinmi.+
25 Tsëmi Teyta Jehoväqa
sirweqninkunawan alläpa cölerakur pëkunata castiganqa.+
Jirkakunapis alläpam kuyuyanqa,
y ayakunapis cällikunachömi basüranö jitaräkuyanqa.+
Mana cäsukoq kayaptinmi, Teyta Diospa cöleranqa pasashqaraqtsu,
sinöqa pëkunata castiganampaqmi makinqa pallarëkanraq.*
26 Karu nacionpita nunakuna rikäyänampaqmi señalta jawishqa+
y patsapa kuchunkunachö kawaqkunatam wichyar qayashqa,+
y ¡rikäyë! pëkunaqa cörripam shayämun.+
27 Manam mëqampis ishkintsu ni kallpannaqtsu kayan.
Manam mëqampis punukantsu ni pununantsu.
Tseqlla watakuyänampis manam paskakashqatsu,
y llanqinkunapa watunkunapis manam rachishqatsu.
28 Llapan flëchankunam alli afilashqa këkan,
y flechakuyänampis listunam këkan.
Cawallunkunapa shillunkunapis pedernal ruminömi,
y carrëtankunapa ruëdankunapis fuerti vientunöran ëwëkun.+
Leonnö qaparirmi pïmëta prësuyanqa,
y apakuyanqan nunakunataqa manam ni pï salvëta puëdintsu.
30 Tsë tiempuqa, prësuyanqan nunakunapa jananchömi
lamar büllanqannöraq büllayanqa.+
Tsë markata llapan rikaqkunam mantsakëpaq yanaranqanta rikäyanqa,
y pukutë tsaparkuptinmi intipis o rupaypis atsikyanqatsu.+