2 Tesalonicensis

2 Tsënö kaptimpis wawqikuna y panikuna, Señornintsik Jesucristu+ këkämunan witsampaq y pëwan juntakänapaq kaqchöqa,+ rogayaq 2 juiciuykikunata raslla o saslla mana oqrayänëkipaq,+ y Teyta Diospita shamoqtanö willakuyanqanwan, shimipa willakuyanqanwan o noqakunapitanö shamoq cartawan, Teyta Jehovä* nunakunata juzganan tiempu chämushqana kanqanta niyäshuptiki mana mantsakäyänëkipaqmi.+

3 Ama imanöpapis engañayäshunëkita* permitiyëtsu, tsë junaqqa manam chämunqatsu, Teyta Diospa contran churakaq nuna manaraq chämuptin,+ y ushakänampaq kaq mana allita ruraq* nuna manaraq rikakuptinqa.+ 4 Pëqa contrakoqmi, y nunakuna dios niyanqampita y imëka adorayanqampita mas väleq tukurmi, Teyta Diospa templunchö jamakur llapankunapa rikëninchö dios kanqanta nin. 5 ¿Manaku yarpäyanki qamkunawanraq këkar tsëkunata niyanqaqta?*

6 Kananqa musyayankim, dispunishqa tiempuchöraq rikakushqa kanampaq, pëta ima michëkanqanta. 7 Rasunmi, manaraq musyakaptimpis tsë nuna mana alli kanqanqa* rikakuykannam,+ peru michëkanqan këkanqanyaqmi,* mana alli kanqanqa musyëtsu kanqa. 8 Tsënam tsë mana allita ruraq* nunaqa rikakushqa kanqa, pëtam Señor Jesusqa shimimpita yarqoq poderwan ushakätsinqa,+ y këkämunqan witsanmi ushakätsinqa.+ 9 Peru mana allita ruraq* nuna yurimurqa Satanas poderninwan yanapaptinmi,+ imëka espantëpaq milagrukunata, imëka espantëpaqkunata y mana rasumpa milagrukunata ruranqa+ 10 y ushakëman ëwëkaqkunatam* imëka mana allikunata rurar engañanqa.+ Pëkunaqa salvëta puëdeq alli yachatsikuykunata mana kuyashqa karmi, castïguta chaskir ushakäyanqa. 11 Tsëmi Teyta Diosqa ulikuyanqanta o llullakuyanqanta creiyänampaq, engañakur yachatsikuyanqanwan pantayänanta permitin,+ 12 tsënöpa rasumpa kaqta mana creiyanqampita y mana allikunata rurar kushikuyanqampita juzgashqa kayänampaq.

13 Tsënö kaptimpis, Teyta Jehoväpaq* kuyë wawqikuna y panikuna, qamkunataqa santu espïritunwan limpiuyätsiyäshurniki y rasumpa kaqman markäkuyanqëkirëkurmi o yärakuyanqëkirëkurmi, salvashqa kayänëkipaq Teyta Dios qallanampitana akrayäshurqëki,+ tsëmi qamkunarëkur Teyta Diosta imëpis agradecikuyä. 14 Pëqa Señornintsik Jesucristunölla puëdeq këman churashqa kayänëkipaqmi, noqakuna willakuyanqä alli noticiakunawan tsëpaq qayayäshurqëki.+ 15 Tsëqa wawqikuna y panikuna, shimipa o noqakunapita chaskiyanqëki cartawan yachakuyanqëkichö alli patsakashqa këkäyë+ y imëpis alli aguantayë.+ 16 Manam tsëllatsu, kuyamaqnintsik+ y imëyaqpis shoqamaqnintsik y alläpa alli kar següru shuyaranqantsikta änimaqnintsik+ Teyta Diosnintsik y Señornintsik Jesucristu, 17 shonquykikunata shoqëkuyätsun, y alli kaqta rurayänëkipaq y alli kaqta parlayänëkipaq kallpayoqta* tikratsiyäshuy.