3 Juan
1 Awkin nunapita, rasumpa kuyanqä kuyë wawqillä Gäyupaq.
2 Kuyë wawqillä, kanannölla imata ruranqëkipis alli yarqunampaq y alli saloryoq kanëkipaqmi Teyta Diosman mañakü. 3 Wawqikuna shamur, rasumpa kaqmannö kawakur rasumpa kaqta qamchö këkätsinqëkita musyatsiyämaptinmi alläpa kushikurqä.+ 4 Tsurïnö kaqkuna rasumpa kaqmannö kawëkäyanqanta wiyënöqa, manam imapis alläpa kushitsimantsu.*+
5 Kuyë wawqillä, pëkunata mana reqikarpis, wawqikunapaq ruranqëkichömi, confiakuypaq kanqëkita rikätsikuykanki.+ 6 Pëkunaqa congregacionchö kaqkunapa puntanchömi kuyakoq kanqëkita niyämashqa. Mëyaqllapis pëkunawan juntu ëwar shumaq despachëkunëkipaqmi rogakoq, y tsëtaqa Diospa rikënimpaq alli kanqanmannö rurëkullë.+ 7 Pëkunaqa juk nacion nunakunapita imatapis mana shuyarashpam,+ Teyta Diospa jutinrëkur willakoq yarqayämushqa. 8 Tsëmi noqantsikqa, rasumpa kaqta willakuyanqanchö yanapakunapaq,+ pëkunawan alli nuna kanantsik.+
9 Llapëki congregacionchö kaqkunamanmi cartata qellqamurqä, peru qamkunachö punta puntachö këta gustaq Diotrefesqa,+ manam ima niyanqätapis respëtuwantsu chaskin.+ 10 Tsëmi shamurqa, noqakunapaq mana allita parlar mana allita ruranqanta yarpätsishaq.*+ Peru tsëta ruranqanwampis manam kushishqatsu këkan, sinöqa manam munantsu wawqikunata respëtuwan chaskitapis;+ y chaskita munaqkunatapis micharmi ushan y congregacionpitam qarquyta tïran.
11 Kuyë wawqillä, ama mana allita ruranqanta qatitsu, sinöqa alli kaqta rurë.+ Alli kaqta ruraqqa, Teyta Diospa favorninmi këkan.+ Peru mana allita ruraqqa, manam Teyta Diosta reqintsu.*+ 12 Pëkuna y rasumpa kaqpis, Demetriupaqqa allitam parlayashqa. Awmi, noqakunapis alli nuna kanqantam niyä, y qamqa musyankim niyanqankuna rasumpa kanqanta.
13 Qamman qellqamunäpaq imëkaraq kaptimpis, manam tsëkunata tintawan papelman qellqamuyta munätsu. 14 Sinöqa ichikllachöna rikaqniki shamur kikikiwan parlëtam munä.
Cuidakunki.*
Këchö amïguntsikkunam salüdunkunata apatsikayämun. Tsëchö amïguntsikkunata cada ünuta* saludëkullë.