Jeremïas
19 Teyta Jehovämi këta nirqan: “Mituwan imëkata ruraq nunaman ëwar ichikllan cantaruta ranti,+ y markachö wakin dirigeqkunata y sacerdötikunapita wakin dirigeqkunata pusharkur 2 Hinon pampaman* ëwë.+ Tsë pampaqa, Mituwan Imëkata Ruraq Nunapa Punkun niyanqampa yëkunanchömi këkan. Kë ninqaqkunata tsëchö willakuy. 3 Kënömi willakunëki: ‘Judächö gobernaqkuna y Jerusalenpita nunakuna, Teyta Jehovä ninqanta wiyayë. Israelpa Diosnin angelkunata mandaq Teyta Jehovämi këta nin:
“Kë kinrë markakunamanmi imëka mana allikunata chätsimushaq, y tsëta wiyaqkunaqa alläpam mantsakäyanqa. 4 Tsëtaqa rurashaq dejarayämashqa kayaptin,+ y kë kinrë markakunata mana reqipaqtanö tikratsishqa kayaptinmi.+ Pëkunaqa kikinkuna, unë kastankuna y Judächö gobernaqkuna mana reqiyanqan santukunapaqmi qarëkunata rupëkätsiyan. Y kë kinrë markakunachöpis wanutsiyanqan culpannaq nunakunapa yawarninllanam këkan.+ 5 Warmi y ollqu tsurinkunata Baal+ santupaq ninachö rupatsiyänampaqmi, sagrädu sitiukunata rurayashqa. Tsëta rurayänampaqqa manam noqa mandakurqätsu, y manam tsëmanqa ni ichikllapis pensarqätsu”’.+
6 ‘Teyta Jehoväqa kënöpis ninmi: “Ichikllachönam tsë sitiukunataqa, Töfet o Hinon pampa nirnatsu reqiyanqa, sinöqa Nunakunata Wanutsiyanqan uran nirnam reqiyanqa.+ 7 Tsë sitiuchömi Judäpita y Jerusalenpita nunakuna rurëta munëkäyanqan mana alli yarqunanta, y wanutsita munaq nunakuna y chikeqninkuna espädawan wanutsiyänanta permitishaq. Pëkunapa ayankunaqa, ëtsa mikoq jatusaq pishqukunapaq y ëtsa mikoq animalkunapaqmi kanqa.+ 8 Markankunata ushakätsirmi pëkunapita imëpis burlakuyänanta permitishaq, y llapan tsëpa pasaqkunam mantsakashqa rikaräyanqa. Y imëka mana allikunata pasayanqampitam burlakuyanqa.+ 9 Wanutsiyäshuynikita munaqkuna y chikiyäshoqnikikuna entëru markëkikunaman churakäyaptinmi, mana imanö këta puëdir, wamrëkikunapa ëtsanta mikuyanki y kikikikunapura mikunakuyanki”’.+
10 Tsëpitana, qamwan ëwëkaq nunakuna rikëkäyaptin ichikllan cantaruta pakiskir 11 kënö nï: ‘Angelkunata mandaq Teyta Jehovämi këta nin: “Imanömi mituwan imëkata ruraq nuna ruranqan ichiklla cantaruta pakiriptin, pillapis altsëta puëdinnatsu. Tsënömi noqapis kë markata y kë markapita nunakunata ushakätsishaq, y sitiupis manana kanqanyaqmi, entëru Töfet kinrëchö wanushqakunata pampayanqa”’.+
12 Teyta Jehoväqa kënöpis ninmi: ‘Töfet kinrënö quedanampaqmi, kë markata y kë markachö kawaq nunakunatapis tsë cantarutanöllam pasanqa. 13 Jerusalenchö llapan wayikunapis y Judächö gobernaqkunapa wayinkunapis, Töfet+ sitiunömi rikënïchö limpiunatsu kayanqa. Awmi, ciëluchö kaqkunapaq qarëkunata rupatsiyänampaq,*+ y santukunapaq vïnu qarëta jichayänampaq utilizäyanqan wayikunapis, manam rikënïchö limpiutsu kayanqa’”.+
14 Teyta Jehovä Töfetchö willakunampaq mandanqampita kutimurmi, Jeremïasqa Teyta Jehoväpa wayi patiuman ëwëkur llapan nunakunata kënö nirqan: 15 “Israel nunakunapa Diosnin angelkunata mandaq Teyta Jehovämi këta nin: ‘Chukru shonqu kar ninqäkunata mana cäsukuyaptinmi, kë markakunaman y tsëchö kawaq nunakunaman, willakunqänölla imëka mana allikunata chätsimushaq’”.+