2 Corintius
10 Kananqa qamkunawan këkar kallpannaqnö,+ peru qamkunawan mana këkarqa valientinö noqa Pablum,+ parlanqächö Cristunö humildi y alli kanqäta rikätsikur qamkunata rogayaq.+ 2 Awmi, qamkunawan këkarqa, mana valienti kanäpaq y wakinkunata llakitsipa mana correginäpaqmi rogakü. Tsënö kaptimpis, nunakuna pensayanqannö kawayanqäta neqkunawanqa capazchi tsënö rurashaq. 3 Wakin nunakunanö kawarpis, manam nunakuna pelyayanqannötsu pelyayä. 4 Soldädukuna pelyayanqanchö utilizäyanqan armatatsu manam utilizantsik,+ sinöqa Teyta Diosmi, alli patsakashqa këkaqkunata ushakätsinapaq alläpa puëdeqta tikratsimantsik.+ 5 Nunakuna Teyta Diospita yachakuyänanta michaq pensëkunata y atäjukunatam ushakëkätsiyä.+ Cristuta cäsukuyänampaqmi, nunakuna pensayanqanta prësutanö dominëkäyä. 6 Y qamkuna llapanchö cäsukoq kayaptiki, imachöpis mana cäsukoqkunata castigayänäpaqmi listu këkäyä.+
7 Qamkunaqa imanö rikakunqanllapitam imatapis juzgayanki. Pï nunapis Cristupa kanqanta següru karqa, këman pensatsun: pë Cristupa kanqannöllam, noqakunapis Cristupa kayä. 8 Qamkunata ushakätsiyänaqpa* rantin alli kayänëkipaq yanapayänaqpaq* Señorpita autoridäta chaskishqa karmi, conviëninqampita ichik maslla alabakurpis,+ penqakuychötsu ushäman. 9 Manam munätsu cartäkunawan mantsakätsiyënikita ni munanqäta pensayänëkita. 10 Wakinkunaqa kënömi niyan: “Cartankunachöqa fuertipa y clärum imatapis nimantsik, peru rikëninqa manam mantsëpaqtsu y imanö parlanqampis melanëpaqmi”. 11 Tsënö nunaqa, tsëchö mana këkar cartäkunachö niyanqänölla,* tsëchö këkarpis rurayänäpaq kaqta* cuentaman churatsun.+ 12 Noqakunaqa manam kikinkunapaq allita parlaqkunawan igual churakëta ni pëkunawan igualatsikuyta munayätsu.+ Peru pëkuna kikinkunapaq alli kanqanmannö juzgakur y kikinkunatawan igualatsikurqa, imatapis mana entiendiyanqantam rikätsikuyan.+
13 Noqakunaqa manam mana rurayanqäpitaqa alabakuyäshaqtsu, sinöqa Teyta Diospita chaskiyanqä cargullapitam* y tsëchömi qamkunapis këkäyanki.+ 14 Manam Diospita chaskiyanqan cargupita masta rurartsu qamkunaman chäyämurqä. Rasumpa kaqchöqa, noqakunam Cristupita alli noticiakunataqa qamkunaman puntata chätsiyämurqä.+ 15 Manam chaskiyanqä cargupita masta rurayanqäpitatsu, awmi, manam jukkuna rurayanqampitatsu alabakuykäyä. Tsëpa rantinqa, mas markäkoq o yärakoq kayanqëkimannö, chaskiyanqä carguchö rurayanqäkuna mas yanapakunantam shuyaräyä. Tsënö kaptinqa, mastam rurayäshaq. 16 Awmi, qamkunapita karuchö këkaq markakunachömi alli noticiakunata willakuyta puëdiyäshaq, tsënöpa jukpa cargunchö këkaq sitiukunachö rurashqana kayanqampita mana alabakuyänäpaq. 17 “Pï nunapis alabakuyta munarqa, Teyta Jehoväta*+ reqinqampita alabakutsun”. 18 Manam kikimpaq allita parlaqtsu alli këkan,+ sinöqa pëpaq Teyta Jehovä* allita parlanqanmi alliqa këkan.+