Ezequiel

2 Tsënam kënö nimarqan: “Nunapa tsurin,* sharkuy. Qamwanmi parlëta munä”.+ 2 Tsënö parlapämaptinmi sharkunäpaq Teyta Diospa podernin yanapamarqan. Sharkurnam parlapämanqanta wiyarqä.+

3 Kënömi nimarqan: “Nunapa tsurin, qamtam mandëkaq, mana cäsumar munëninkunata rurakoq Israel nunakunata parlapänëkipaq.+ Pëkunaqa unë kastankunapita qallëkurmi kananyaqpis leynïkunata cäsukuyantsu.+ 4 Mana penqakoq rumi shonqu nunakunaman ëwarmi+ kënö ninëki: ‘Llapanta Gobernaq Teyta Jehovämi kënö nin’. 5 Tsënömi ninëki cäsukuyänan o mana cäsukuyänan kaptimpis, tsënöpam musyayanqa markankunachö juk willakoqnï kanqanta.+ Pëkunaqa alläpa mana cäsukoqmi kayan.+

6 Peru qamqa nunapa tsurin, kashakuna rurinchönö* karpis, atoq kurukunapa chowpinchönö* kawarpis+ ama pëkunata mantsankitsu,+ ni parlayanqanta wiyar mantsakankitsu.+ Cärankuna mantsëpaq kaptimpis, ama pëkunata mantsankitsu ni imëkata niyäshuptikipis ama mantsakankitsu.+ Pëkunaqa mana cäsukoqmi kayan. 7 Cäsukuyänan o mana cäsukuyänan kaptimpis ninqäkunataqa llapanta willanki. Pëkunaqa mana cäsukoq nunakunam kayan.+

8 Peru qamqa, nunapa tsurin, parlapanqaqta shumaq wiyamë. Ama tsë mana cäsukoq nunakunanöqa qampis mana cäsukoq këtsu. Shimikita kichë y kë qarëkanqaqta mikuy”.+

9 Y rikarkunäpaqqa röllun* aptashqam+ juk maki makyarëkämunaq.+ 10 Puntächö tsë rölluta kichaskamuptinmi rikarqä ishkan lädupa qellqashqata.+ Tsëchöqa qellqarëkarqan wanupakur o wañupakur cantayanqan cancionkuna, llakikur cantayanqan cancionkuna y waqar cantayanqan cancionkunam.+