Isaïas
38 Tsë witsanmi Ezequïasqa alläpa qeshyar wanunampaqna këkarqan.+ Tsëmi Amozpa tsurin Isaïasqa+ watukaq ëwar kënö nirqan: “Teyta Jehovämi këta nin: ‘Manam alliyankinatsu y ichikllachönam wanukunki. Tsëmi imata rurayänampaq kaqta familiëkikunata nï’”.+ 2 Tsëta wiyarnam Ezequïasqa perqaman tumëkur Jehovä Diosman kënö mañakurqan: 3 “Teytallä Jehovä, mandakunqëkikunata llapan shonqüwan cäsukunqäta,+ y qampa rikënikipaq alli kaqta ruranqäta ama imëpis qonqëkullëtsu”.+ Tsënö nirmi Ezequïasqa llakipëpaq* alläpa waqarqan.
4 Tsënam Teyta Jehoväqa Isaïasta kënö nirqan: 5 “Ezequïasman+ kutir këta nï: ‘Unë kastëki Davidpa Diosnin Jehovämi kënö nishunki: “Mañakamunqëkitam wiyarqö,+ y waqanqëkitapis rikarqömi.+ Tsëmi quinci wata masraq kawatsishqëki.+ 6 Y qamta y kë markatam Asiriachö gobernaqpita salvashaq. Awmi, kë markatam defendishaq.+ 7 Y noqa Jehovä ninqäkunata cumplinäpaq kaqta següru kanëkipaqmi, noqa Jehoväqa kë señalta churëkä:+ 8 inti o rupay avanzanqanmannömi Acazpa grädankunapa* uraq wänita o llantuyta, chunka grädakuna qepaman kutitsishaq”’”.+ Y intipa wäninqa o llantuyninqa, ichikllapa ichikllapam chunka grädakuna qepaman kutirqan.
9 Qeshyanqampita alliyarmi Judächö gobernaq Ezequïasqa këchö ninqanta qellqarqan.
10 Kënömi nirqä: “Manaraq awkinyarchi Sepultüraman* chärishaq.
Masraq kawanä këkaptinchi kananllana ushakärishaq”.
11 Kënöpis nirqämi: “Manachi Jehoväta* rikäshaqnatsu.+
Awmi, kawëkaqkuna këkäyanqan patsachöqa manachi Jehoväta rikäshaqnatsu.
Ayakuna këkäyanqan sitiuchö këkarqa, manachi nunakunata rikäshaqnatsu.
12 Kawanqä sitiutapis mitsikoqpa carpantanömi* paskar apakuyashqa,+
telarchö awanqan tëlata nuna wankunqannömi kawënïta wankurqö.
Teyta Diosqa jiläsa hïlutanömi kapchuman.
Patsa waranqampita patsa paqasyanqanyaqmi,
ichikllapa ichikllapa ushakätsimanki.+
13 Patsa waranqanyaqmi tranquïlu këta tïrä.
Peru pëqa leon tullukunata ushakätsinqannömi ushakätsiman.
Awmi, patsa waranqampita patsa paqasyanqanyaqmi, ichikllapa ichikllapa ushakätsimanki.+
14 Taksha pishqukunanömi waqar këkä,+ y palumanömi llakikur waqëkä.+
Yanapëkamänampaq ciëluman rikaränäpaqpis
manam kallpä kannatsu:+
‘Teytallä Jehovä, alläpa llakishqam këkä.
¡Yanapëkallämë!’.+
15 ¿Imataraq nïman?
Pëqa nimanqannömi rurashqa.
Kawanqäyaqqa alläpa llakikuypa pasanqäta yarparmi humildi kashaq.
16 ‘Teyta Jehovä, qam alläpa alli kaptikim nunakunaqa kawëkäyan,
tsënö alläpa alli kaptikim noqapis kawëkä.
Qammi alliyänäpaq yanapamanki, y kawëkaqta katsimanki.+
17 ¡Rikë! Yamë kanäpa rantinmi alläpa llakishqa karqö,
peru kuyamarmi sepultürachö ushanäpita salvamarqunki.+
18 Sepultürachöna* këkarqa, ¿piraq alabashunkiman?+
Wanushqa këkarqa, ¿piraq qampita allita parlanman?+
Sepultürachö këkaqkunaqa, manam ruranëkipaq kaqta rikëta shuyaräyannatsu.+
19 Kanan qamta alabanqaqnöqa,
kawëkaqkunallam alabayäshuynikita puëdiyan.
Awmi, kawëkaq papäkunallam, qam confiakuypaq kanqëkita tsurinkunata yachatsita puëdiyan.+
20 Teytallä Jehovä, salvëkallämë.+
Tsëqa Teyta Jehovä, wanuyanqäyaqmi cuerdayoq instrumentukunawan
kë cancionkunata wayikichö cantayämushaq’”.+
21 Tsëpitanam Isaïasqa nirqan: “Tsaki hïguswan rurashqa masata apayämuy, y alliyänampaq qerinman laqayë”.+ 22 Ezequïasqa kënömi tapukushqa karqan: “¿Ima señaltan rikätsikunqa Teyta Jehoväpa wayinman ëwanäpaq kaqta?”.+