Ezequiel
17 Teyta Jehovämi yapë parlapämarqan y kënömi nimarqan: 2 “Nunapa tsurin, mana entiendiyanqan willakuywan y igualatsikuywan Israel nunakunapaq willakuy.+ 3 Kënö ninki: ‘Llapanta Gobernaq Teyta Jehovämi kënö nin: “Jatun älayoq, jatusaq plümayoq, mëtsika plümayoq y tukuy color plümayoq jatun pichakmi*+ Lïbanuman+ shamur, cedru qerupa puntanta+ pakirir apashqa. 4 Mas altu kaq puntanta pakirirmi negociantikuna kayanqan markaman* apashqa, y tsëmanmi plantashqa.+ 5 Tsëpitanam tsë markapita juk muruta aptarkur+ alli chakraman mururqan. Mëtsika yaku ëwaq mayu* kuchunmanmi saucitanö plantarqan. 6 Tsë plantanqan muruqa jeqamurqanmi, y üvas plantam karqan.+ Atska rämayoq kaptimpis rämankunaqa manam mashtakëpatsu winarqan y watsinkunapis o matsunkunapis* manam karutaqa ëwarqantsu. Tsënö jatunyarmi maslla tseqllimurqan y mas rämayoqmi karqan.+
7 Y jatun älayoq y jatusaq plümayoq+ juk jatun pichakmi* shamurqan.+ Tsënam tsë üvas plantaqa yakuta jichapänanta alläpa munar, watsinkunata o matsunkunata* y rämankunatapis karuman mashtarqan.+ 8 Kë plantaqa atska rämayoq kanampaq, wayunampaq y jatun kanampaqmi alli chakrachöna y mëtsika yaku ëwaq mayu* kuchunchöna plantarëkarqan”’.+
9 Kënömi ninëki: ‘Këtam Llapanta Gobernaq Teyta Jehovä nishqa: “¿Tsë plantaqa alli plantatsuraq kanqa? ¿Manatsuraq watsimpita o matsumpita* sutariyanqa?+ ¿Tsëqa manatsuraq frütankunapis ismunqa y tseqllimunqankunapis tsakirinqa?+ Awmi, pasëpa* tsakiriptinmi watsimpita o matsumpita fäcil-llana sutarkur jitariyanqa. 10 O ¿sutarir juk läduman plantariyaptimpis kawanmantsuraq? ¿Manatsuraq inti o rupay yarqamunan lädupita shamoq vientuwan tsakirinqa? Awmi, mëchömi jeqamurqan tsëchömi tsakinqa”’”.
11 Teyta Jehoväqa yapëmi parlapämarqan y kënömi nimarqan: 12 “Tsë mana cäsukoq nunakunata kënö nï: ‘¿Manaku cuentata qokuyanki kë rikëkäyanqëkikuna imapaq kanqanta?’. Y kënö nï: ‘Yarpäyë, Babiloniachö gobernaqmi Jerusalen markata shamurqan y gobernantitawan* dirigentikunatam Babiloniaman llapanta apakurqan.+ 13 Tsëpitanam gobernantipa juk familianwan acuerduta rurarqan.+ Y pë munanqanllata ruranampaqmi juratsirqan.+ Tsëpitanam mas yachaq nunakunata nacionninman apakurqan.+ 14 Tsë yachaq nunakunataqa aparqan, Israel nunakuna poderninchö kayänanta munarmi. Babiloniachö gobernaq ruranqan acuerduta cumplirllam Israel nunakunaqa alli kawakuyanman karqan.+ 15 Peru Judächö gobernantiqa,* ruranqan conträtuta mana respetarmi Babiloniachö gobernaqpa* contran churakarqan.+ Tsëmi cawallunkunawan y mëtsika soldädunkunawan+ yanapayänanta munar sirweqninkunata Egiptu nacionman mandarqan.+ Peru ¿pensanqannötsuraq yarqapakunqa? Tsëta ruraq nunaqa, ¿castïgupita librakunqatsuraq? ¿Ruranqan conträtuta mana respetanqampitaqa salvakunqatsuraq?’.+
16 ‘“Noqa kawëkaq Diosmi nï, Judächö gobernantiqa* juranqanta mana cumplinqampita y ruranqan acuerduta mana respetanqampitam Babiloniachö wanunqa o wañunqa, gobernanti kanampaq churanqan gobernantipa* markanchö”+ ninmi Llapanta Gobernaq Teyta Jehovä. 17 “Markata atacayänampaq y nunakunata wanutsiyänampaq murälla waqtampa altu perqata rurar y allpata qotur qallëkuyaptinqa, manam Egiptupita ëwaq mëtsika soldädukunapis salvëta puëdiyanqatsu.+ 18 Judächö gobernaqqa manam juranqanta cumplishqatsu y ruranqan acuerdutapis manam respetashqatsu. Cumplinampaq parlëkarmi* tsë llapanta rurashqa, tsëmi salvakunqatsu”’.
19 ‘Tsëmi Llapanta Gobernaq Teyta Jehovä kënö nin: “Noqa kawëkaq Diosmi nï, juranqäta mana cumplinqampita y ruranqä acuerduta mana respetanqampitam kananqa kikinlla castïguta chaskinqa.+ 20 Animalkunata tsarinä* mällaman winarkurmi+ Babiloniaman apashaq y tsëchömi mana cäsumanqampita juzgashaq.+ 21 Soldädunkunatapis qeshpeq kaqtaqa llapantam wanutsishaq y kawëkar quedaq kaqkunatanam mëtsë markakunaman qarqushaq.+ Tsënöpam qamkunaqa musyayanki noqa Jehovä parlashqa kanqäta”’.+
22 ‘Këtam Llapanta Gobernaq Teyta Jehovä nin: “Cedru qerupa puntanta pakirirmi plantashaq.+ Rämankunapita llullu puntanta pakirirmi,+ mas altu kaq jirkaman kikï plantashaq.+ 23 Israelchö këkaq mas altu kaq jirkamanmi plantashaq. Tsëchömi mëtsika rämayoq kanqa, mëtsika frütatam wayunqa y jatun cedru këmanmi chanqa. Tsëmanmi mëtsika pishqukuna kawakuyänampaq ëwayanqa y wäninchömi o llantunchömi pärayanqa. 24 Y llapan plantakunam musyayanqa, noqa Jehovä tsë jatun plantata desprecianqäta, ichikllan plantata jatunyätsinqäta,+ kawëkaq plantata tsakitsinqäta y tsakishqa plantata kawaratsir wëtatsinqäta.+ Noqa Jehovämi tsëta parlarqö y parlanqänöllam rurarqö”’”.