Josuë
20 Tsëpitanam Jehovä Diosqa Josuëta kënö nirqan: 2 “Israelïtakunatam këta ninëki: ‘Moisesta ninqänömi, qeshpir ëwayänëkipaq markakunata akrayänëki.+ 3 Tsënöpa pitapis accidentipa wanutsirqa, tsë wanutseq o wañutseq nuna tsë markakunaman qeshpir ëwakunampaq. Tsë markakunaman yëkuyaptikim wanutsiyanqëki nunapa familianqa* wanutsiyäshunkinatsu.+ 4 Y pitapis wanutseq nunaqa, tsë markakunamanmi mëqanman karpis qeshpir ëwakunan,+ y tsë markapa punkunman chëkurmi,+ tsëchö dirigentikunata llapan pasakunqanta willanan. Pëkunanam tsë markachö chaskiyänan, y quedakunampaqmi juk sitiuta rikätsiyänan, y tsë nunaqa pëkunawan juntum täkunan.* 5 Wanushqa nunapa familian qatipar chäriptinqa, manam wanutsikoq nunata entregayänantsu. Tsë nunaqa manam chikiparnintsu nuna mayinta wanutsishqa, sinöqa accidentipam.+ 6 Tsë wanutsikoq nunaqa, juezkuna cäsunta rikäyanqanyaqmi tsë markachö quedakunan.+ Tsëpitanam tsë witsan mandakoq sacerdöti+ wanunqanyaq tsë markachö kawanan. Y mandakoq sacerdöti wanukuptinran, munarqa markanta y wayinta kutikunan’”.+
7 Tsëmi kë markakunata akrayarqan sagrädu kanampaq: Quedes markata,+ tsëqa Galilëa markachömi karqan, Neftalïpa kastankunata tocanqan jirkakunachö; Siquem markata,+ tsëqa Efrainpa kastankunata tocanqan jirkakunachömi karqan; Quiryat-Arbä+ o Hebron markata, tsëqa Judäpa kastankunata tocanqan jirkakunachömi karqan. 8 Y Jordan mayupa* wak tsimpanchö y Jericö markapa inti o rupay yarqamunan läduchönam, kë markakunata akrayarqan: Bëzer markata,+ tsëqa Rubenpa kastankunata tocanqan tsunyaq sitiupa jirka pampankunachömi karqan; Ramot markata,+ tsëqa Gadpa kastankunata tocanqan Galaadchömi karqan; y Golan markata,+ tsëqa Gadpa kastankunata tocanqan Basanchömi karqan.+
9 Tsëkunam karqan israelïtakuna y pëkunawan kawaq forastërukuna qeshpir ëwayänampaq akrashqa markakuna. Tsënöpa pitapis accidentipa wanutsirqa, tsë markakunaman qeshpir ëwakuyänampaq,+ y juezkuna manaraq juzgayaptin, wanushqa nunapa familian mana wanuratsinampaq.+