Esdras
6 Tsë cartata chaskirirmi gobernanti Darïuqa mandakurqan, Babiloniachö väleq cösaskuna churaränanchö documentukunata ashiyänampaq. 2 Tsëmi Media provinciachö këkaq Ecbätana markata ëwar, alli segurashqa jatun wayichö juk libruta* tariyarqan. Tsë libruchömi kënö qellqarëkarqan:
3 “Gobernanti Cïrum, gobernar qallanqan wata Jerusalenchö templupaq kënö mandakurqan:+ ‘Judïukuna ëwarnin cimientunkunata shumaq patsëkatsir templuta yapë sharkatsiyätsun. Tsë templuchömi animalkunata pishtëkur Diospaq rupatsiyanqa. Tsë templupa anchumpis y altumpis veintisiëti metrusmi* kanan.+ 4 Y perqantanam jatusaq rumikunawan kima hilërata perqayänan y jananmannam juk hilëra masta qeruta churayänan.+ Llapan gastukunataqa gobernantim pagakunqa.+ 5 Tsënölla Jerusalen templuman kutitsiyätsun örupita y pläta metalpita rurashqa väsukunata y tazonkunata. Tsëkunataqa Nabucodonosormi Babiloniaman apamushqa karqan.+ Tsë llapanta Diospa templunman yapë churayätsun’”.+
6 “Tsënö këkaptinqa Eufratis mayu* tsimpanchö* gobernador Tatenäi, Setar-Bozenäi, yanapaqninkuna y Eufratis mayu tsimpachö*+ oficialkuna witikuyë, ama imatapis niyëtsu. 7 Judïukunachö mandakoq gobernador y dirigentikunapis punta kanqanllachö Diospa templunta yapë rurayätsun, ama imanöpapis michäyëtsu. 8 Y Diospa templunta shäritsir ushayänampaq judïukunapa dirigeqninkunata yanapayë. Eufratis mayupa* wak tsimpanchö* noqapaq chaskiyanqëki impuestuwan jinan höra llapan gastukunata pagakuyë.+ 9 Llapan junaqkunam apayänëki Jerusalenchö sacerdötikuna llapan mañayäshunqëkita: mallwa törukunata,+ carnërukunata,+ mallwa üshakunata,+ trïguta,+ kachita,+ vïnuta+ y aceititapis.+ 10 Tsënöpam pëkunaqa tsë qarëkunata imëpis rupatsirnin ciëluchö Diosta kushitsiyanqa, y gobernantipaq y tsurinkunapaqpis mañakayämunqa.+ 11 Peru kanan mandakunqäta pillapis mana cäsukuptinqa, wayinchö këkaq qeruta jawirkur tsëman warkuyanki wanunampaq o wañunampaq y wayintana bäñuman* tikratsiyanki. 12 Kë mandakunqäta mana cäsukoq kaqta y Jerusalenchö Diospa templunta ushakätseq kaqtaqa, gobernantita karpis, o më markakunachö täkoq* nunakunata karpis, kikin Dios ushakätsitsun, pëmi Jerusalen templuta akrarqan jutimpa reqishqa kanampaq.+ Noqa Darïum këta mandakuykä y jinan höram cumpliyänëki”.
13 Gobernanti Darïu tsënö mandakuptinmi Eufratis mayu* tsimpanchö* gobernador Tatenäi, Setar-Bozenäi+ y yanapaqninkunaqa, tsë höra llapan mandakunqanta cumpliyarqan. 14 Tsënam judïukunapa dirigentinkunaqa, Diospa willakoqninkuna Ageuwan+ Idöpa willkan Zacarïas+ willakuyanqanta wiyarir, templuta kushishqa yapë sharkatsiyarqan.+ Israelïtakunapa Diosnin mandakunqannö+ y Persia nacionpa gobernantin Cïru,+ Darïu+ y Artajerjes+ mandakuyanqannöllam Teyta Diospa templunta rurar ushayarqan. 15 Y joqta watapa Darïu gobernëkaptinmi templutaqa rurar ushayarqan, Adar* killapa kima kaq junaqninchö.
16 Teyta Diospa templunta rurar ushaskirnam israelïtakuna, sacerdötikuna, levïtakuna+ y Babiloniaman prësu apayanqampita wakin kuteqkunapis fiestata kushishqa rurayarqan. 17 Tsëchömi cien törukunata, doscientus carnërukunata y cuatrocientus malta üshakunata pishtëkur Teyta Diospaq rupatsiyarqan. Tsënöllam Israel kastakuna döci kayaptin, jutsankunapitapis* chïvukunata* döcita apayarqan.+ 18 Tsëpitanam Moises qellqanqan libruchö+ mandakunqannö, Jerusalen templuchö trabajayänampaq sacerdötikunata grupuypa churayarqan+ y levïtakunatapis cada familiapa churayarqan.
19 Babiloniachö prësu kayanqampita kuteqkunaqa, Pascua Fiestata rurayarqan wata qallëkuptinmi, punta kaq killapa catorci junaqninchö.+ 20 Y llapan sacerdötikuna y levïtakunam Diospa rikëninchö limpiu* këkäyarqan,+ tsëmi Pascua Fiestachöqa sacerdöti mayinkunapaq, Babiloniachö prësu kayanqampita llapan kutimoqkunapaq y kikinkunapaqpis animalkunata pishtayarqan. 21 Tsëpitanam israelïtakunaqa, Babiloniachö prësu kayanqampita kuteq nunakunawan juntu Pascua Fiestapaq pishtayanqan ëtsata mikuyarqan. Israelïtakunawan kuteq nunakunaqa kayarqan, Teyta Jehovällatana* adorayänampaq juk nacion nunakunapa mana alli costumbrinkunata dejashqa nunakunam.+ 22 Israelïtakunaqa Jehovä Dios yanapashqa kaptinmi kushishqa këkäyarqan, y Pë munaptinmi Asiria nacionpa gobernantimpis templu rurëta ushayänampaq yanapakurqan.+ Tsëmi Levadürannaq Tantata+ Mikuna Fiestatapis qanchis junaqpa kushishqa rurayarqan.