Job
15 Tsënam temanïta Elifazqa+ kënö nirqan:
2 “¿Yachaq nunatsuraq mana cäbeqkunata parlanqa*
o shonqunchö mana alli munëkunata katsinqa?
3 Shimillapa pitapis corregiqa, manam imachöpis yanapakuntsu
y parlarllaqa manam pitapis yanapantsiktsu.
4 Qampa culpëkim nunakunaqa
Teyta Diosta respetayannatsu ni pëta yarpäyannatsu.
5 Jutsata* rurashqa karmi tsënö parlanki
y yachëllapa engañakuyta munarmi imatapis ninki.
6 Shimikim condenashunki, manam noqatsu
y kikiki parlanqëkim contrëkichö këkan.+
7 ¿Qamku puntata yureq nuna kanki?
¿Jirkakunapita mas puntataku yurirqëki?
8 ¿Teyta Dios pakëllapa parlanqantaku wiyanki
o qamllaku yachëyoq kanki?
9 ¿Imatataq noqakunapita mas yachanki?+
¿Imatataq noqakunapita mas entiendinki?
10 Noqakunawanqa soqu aqtsa y mayorna nunakunam+ këkäyan.
Pëkunaqa papänikipitapis mas awkinnam kayan.
11 ¿Imanirtan Teyta Dios shoqashunqëkiwan
o nunakuna shumaq parlapäyäshunqëkiwan conformakunkitsu?
12 ¿Imanirtan shonquyki dominashunëkita dejanki
y nawikipis yarqunanqanyaq cölerakunki?
13 Teyta Dioswan cölerakurmi
pëpaq imëka mana allikunata parlanki.
14 ¿Imanöparaq wanoqlla nunaqa limpiu kanman
o warmipita yureq nuna allillata ruranman?+
15 Teyta Diosqa manam angelninkunamampis confiakuntsu.
Pëpaqqa manam ciëlukunapis limpiutsu.+
16 ¿Tsëtsuraq confiakunman melanëpaq y imatapis chaskipakoq nunaman+
o yakuta upoqnöraq mana allikunata ruraq nunaman?
17 Wiyamë qamta ninqäta.
Rikanqätam willashqëki,
18 yachaq nuna kayänampaq papäninkuna yachatsiyanqanta
y pëkunata llapan willayanqanta.+
19 Pëkunallatam patsata entregayarqan
y manam mëqan forastërupis tsëpa pasarqantsu.
20 Mana allita ruraq nunaqa mantsakashqallam kawan,
y imëpis problëmayoqllam këkan.
21 Alläpa mantsakëpaq büllatam wiyan+
y yamë këkanqan witsanmi imëkankunata suwar apakuyan.
22 Ampirëkaqpita o tsakëkaqpita* mana qeshpita puëdinqantam pensan.+
Espädawan wanutsishqa kanampaqmi këkan.
23 Mikuyta ashirmi, ‘¿mëchöraq kan?’ nir wakpa këpa purin.
Musyanmi ampirëkaq o tsakëkaq* junaqqa këllachöna këkanqanta.
24 Llakikuypa y problëmapa pasarmi mantsakashqa këkan.
Guërraman ëwaq gobernaqnömi pëpa contran shayämun.
25 Teyta Diospa contranmi churakan,
Llapanta Puëdeq Dioswanmi pelyëta munan.*
26 Rakta y chukru escüdunman confiakurmi
kutin kutin Teyta Diospa contran churakan.
27 Cärampis y tseqllampis wirayashqam.*
28 Rumikunalla quedanampaq kaq
y pillapis mana kawanampaq kaq wayikunachö,
y ushakänampaq kaq markakunachömi kawan.
29 Manam rïcutsu ni imëkayoqtsu kanqa
y manam entëru patsachötsu imëkan kanqa.
30 Manam ampirëkaqpita o tsakëkaqpita* qeshpinqatsu.
Tseqllikämoq plantata nina tsakiratsinqannömi ushakashqa kanqa.
Teyta Dios pükëkuptinllam pëqa ushakanqa.+
31 Ama kikinta engañakutsuntsu,
y ama imapaqpis mana väleqman confiakutsuntsu.
Tsëta rurarqa, imapaqpis mana väleqllatam tarinqa.
32 Tsëqa pasanqa manaraq tiempun chämuptinmi,
y imëpis mana wëtaq plantapa rämannömi kanqa.+
33 Üvas plantaqa manaraq poqushqa üvasninta shikwatseqnö
y wëtan tsakishqa olïvus plantanömi kanqa.
34 Teyta Diospa contran kaqkunaqa,*
manam imatapis lograyantsu+
y imatapis chaskipakoqkunapa carpankunataqa* ninam ushakätsinqa.
35 Mana alli rurëkunamanmi yarpäyan, y wakinkunatam mana allikunata rurayan.
Shonqunkunachöpis engañakuyllapaqmi pensayan”.