Job
32 Kutin kutin mana culpayoq kanqanta Job nishqa kaptinmi,*+ kë kiman nunakunaqa imatapis niyarqannatsu. 2 Ram kastapita buzïta nir reqiyanqan Barakelpa tsurin Elihüqa,+ Jobwanmi cölerashqa këkarqan. Tsënö cölerashqaqa karqan, Teyta Dios allillata ruraq kanqanta ninampa rantin kikin allita ruranqanta nishqa kaptinmi.+ 3 Elihüqa, Jobpa kiman amïgunkunawampis cölerashqam këkarqan. Tsënöqa cölerarqan, Jobta mana contestëta puëdir Teyta Dios mana alli kanqanta nishqa kayaptinmi.+ 4 Pëkuna mayornin kayaptinmi, Elihüqa Jobta contestanampaq shuyarëkarqan.+ 5 Y kiman nunakuna Jobta contestëta mana puëdiyaptinmi, Elihüqa pëkunawan cölerakurqan. 6 Tsëmi buzïta nir reqiyanqan Barakelpa tsurin Elihüqa kënö nirqan:
“Noqaqa jövinllaran kä,
peru qamkunaqa mayor nunanam kayanki.+
Tsëmi qamkunata respetar
musyanqäta parlakamurqöraqtsu.+
7 Kënömi pensarqä: ‘Puntataqa mayorkunaraq parlayätsun,
y unëna kawashqa kaqkuna yachëyoq kayanqanta rikätsikuyätsun’.
8 Rasumpa kaqchöqa nunakunata kawëkaqta katseq
Llapanta Puëdeq Diospa kallpanmi nunakunataqa imatapis entienditsin.+
9 Manam mayor kartsu pï nunapis yachaq tikran,
ni manam mayor nunakunallatsu ima alli kanqanta musyayan.+
10 Tsëqa wiyamë,
noqapis musyanqäpitam parlakamushaq.
12 Niyanqëkitam shumaq wiyarqö, peru manam mëqëkipis
Job pantashqa këkanqanta rikätsiyarqunkitsu,*
y manam ninqankunata contestëta puëdiyarqunkitsu.
13 Tsëqa, ama ‘noqakunaqa yachëyoqmi kayä;
kikin Teyta Diosmi corregikan, manam nunatsu’ niyëtsu.
14 Jobqa manam noqapa conträ parlashqatsu,
tsëmi qamkuna parlayanqëkinöqa contestashaqtsu.
15 Kë nunakunaqa upayashqam quedakuyashqa,
manam ima nitapis musyayannatsu.
16 Parlayänantam shuyararqö
peru upällam quedakuyashqa,
y manam imatapis niyannatsu.
17 Tsëmi noqapis contestarniki,
musyanqäpita parlakamushaq.
18 Imëkatam parlëta munä;
Teyta Diospa poderninmi parlamunäpaq obligaman.
19 Ruripaqa alli tsapashqa vïnunö,
y pashtanëkaq qarapita mushoq porongunömi këkä.+
20 Alli sientikunäpaq parlamunäta permitïkayämë.
Contestarnikim parlamushaq.
21 Manam pimampis qaqäshaqtsu,+
y manam pitapis alabapäshaqtsu.
22 Noqaqa manam pitapis alabëta yachätsu,
tsëta ruraptïqa Kamamaqnïchi ushakätsimanman.