Job
42 Tsëkunata Teyta Jehovä niptinnam Jobqa kënö nirqan:
2 “Kananqa musyämi imëkapis makikillachö këkanqanta
y llapan pensanqëkita rurëta puëdinqëkita.+
3 Qamqa kënömi nirqunki: ‘¿Pitan imatapis decidinqä mana alli kanqanta nikan, y mana musyashpa parlëkan?’+
Rasuntam ninki, noqaqa mana reqinqä imëka espantëpaqkunapaqmi mana alli musyashpa parlarqö.+
4 Qamqa kënöpis nirqunkim:
‘Parlamunqäta shumaq wiyamë,
y qamta tapuptï shumaq contestamë’.+
5 Kananyaqqa qampaq parlayanqanllatam wiyarqö,
peru kananqa nawïwanmi qamta rikarqoq.
7 Jobwan Teyta Jehovä parlar ushaskirmi, Teyta Jehoväqa temanïta Elifazta nirqan:
“Qamkunaqa manam sirwimaqnï Jobnötsu noqapaq rasumpa kaqta parlayarqunki,+ tsëmi qamwan y ishkan amïguykikunawan cölerashqa këkä.+ 8 Tsëmi qanchis törukunata y qanchis carnërukunata aparkur sirwimaqnï Jobman ëwayänëki. Tsë animalkunatam noqapaq rupatsiyämunëki, y sirwimaqnï Jobmi qamkunapaq mañakamunqa.+ Sirwimaqnï Job mañakamunqanta wiyarmi, mana rasumpa kaqta parlayanqëkipitaqa rurayanqëkimannötsu castigayashqëki”.
9 Tsënam temanïta Elifaz, suhïta Bildad y naamatïta Zofarqa, Jehovä Dios mandanqannölla rurayarqan. Teyta Jehoväqa pëkunapaq Job mañakunqantam wiyarqan.
10 Amïgunkunapaq Job mañakuriptinmi,+ Teyta Jehoväqa Jobpa sufrimientunkunata ushakätsirqan,+ y unënö imëkayoq kanampaqmi yanaparqan. Teyta Jehoväqa Jobtam bendicirqan unë kapunqampita juk kuti mas kapunampaq.+ 11 Tsëpitanam llapan wawqinkuna, paninkuna y unë amïgunkunaqa Jobta watukayarqan,+ y pëwan juntum wayinchö mikuyarqan. Teyta Jehovä permitiptin imëkata pasashqa kaptinmi, Jobta llakipäyarqan* y shoqayarqan. Llapan watukaq ëwaqkunam qellëta y örupita sortijata qarayarqan.
12 Tsënömi Teyta Jehoväqa Jobta bendicirqan unë kapunqampitapis masraq kapunampaq.+ Tsënöpam Jobpaqa catorci mil üshankuna, seis mil camëllunkuna, dos mil wäkankuna y mil ashnunkuna kapurqan.+ 13 Y yapëmi qanchis ollqu tsurinkuna y kima warmi tsurinkunapis kapurqan.+ 14 Warmi tsurinkunapa jutinkunaqa, Jemimä, Quesïas y Queren-Hapucmi karqan. 15 Jobpa shumaq warmi tsurinkunanöqa, manam tsë markachö ni pï shipashpis karqantsu. Pëkunatapis turinkunatanöllam Jobqa herenciankuna igual rakipurqan.
16 Tsëpitaqa, Jobqa cientu cuarenta wata masran kawarqan, tsurinkunata, willkankunata, willkankunapa tsurinkunata y willkankunapa willkankunatapis reqirqanran. 17 Tsënö atska watapa kushishqa kawaskirmi Jobqa wanukurqan o wañukurqan.