Jeremïas
50 Babiloniapita+ y Caldëapita nunakunapaq parlaparmi, Teyta Jehoväqa willakoqnin Jeremïasta kënö nirqan:
2 “Mëtsë nacionkunachö këta musyatsikuyë.
Señalta jawiyë* y pïmëta willakuyë.
Ama imatapis pakäyëtsu.
Merodac santupis alläpa mantsakashqam këkan.
Llapan santunkunam penqakuychö ushayashqa,
y melanëpaq santunkunam alläpa mantsakashqa këkäyan’.
3 Norti läduchö nacionpita nunakunam,
pëkunawan pelyaq shamuykäyan.+
Markankunatapis mantsakëpaqtam dejayanqa,
y manam ni pï tsëchö kawanqatsu.
Nunapis y animalpis qeshpirmi ëwakuyashqa”.
4 Teyta Jehoväqa këtapis ninmi: “Tsë junaqkuna y tsë tiempuqa, Israelpita y Judäpita nunakunam waqarëkar shayämunqa.+ Y ishkankuna juntum,+ noqa Jehovä Diosninkunata ashiyämanqa.+ 5 Sion këkanqan läduman rikëkurmi,+ Sionman ëwaq nänipaq tapukuyanqa. Y kënömi niyanqa: ‘Shayämuy Teyta Jehoväwan mana imëpis ushakaq acuerduta rurashun.+ Tsë acuerdutaqa manam imëpis qonqayanqatsu’. 6 Sirwimaqnïkunaqa oqrakashqa üshakunanömi këkäyan,+ y kikin mitseqninkunam oqrakätsiyashqa.+ Jirkakunaman pushëkurmi, mëtsë jirkakunapa y taksha jirkakunapa lluta puritsiyashqa. Tsëmi pëkunaqa qonqayashqana mëchö jamayanqantapis. 7 Chikeqninkuna tarïkurqa ushakätsiyashqam,+ y kënömi niyaq: ‘Manam noqantsiktsu culpayoq kantsik. Kikinkunam Jehoväpa rikëninchö jutsata* rurayashqa. Awmi, pëkunaqa, unë kastankuna confiakuyanqan alli kaqta ruraq Jehovä Diospa rikëninchömi jutsata rurayashqa’”.
8 “¡Babiloniapita qeshpir ëwakuyë!
Caldëa nunakunapa markankunapita yarqukuyë,+
y wakin animalkunapa puntanta ëwaq orqu* üshakunanö kayë.
9 Babiloniachö nunakunawan pelyaq ëwayänampaqmi
norti läduchö këkaq puëdeq nacionkunata mandëkä.+
Pëkunaqa guërraman ëwaqnö shamurmi
Babiloniaman yëkuyanqa.
Pelyëta yachaq puëdeq soldädukunanö
flëchankunata munayanqanman chätsirmi
papä kaqkunatapis tsurinnaqta dejayan.+
10 Caldëa nunakunapa imëkankunatam apakuyanqa,+
y imëkankunata apakoqkunaqa kushishqam kayanqa”+ ninmi Teyta Jehovä.
Qewachö ternëranömi wakman këman saltakachäyarqëki,
y padrïllu cawallunömi büllata rurayarqëki.
12 Mamëkikunaqa penqakuychömi quedashqa,+
y wachayäshoqnikiqa llakikuychömi ushashqa.
¡Rikäyë! Wakin nacionkunapitapis mana kaqllam këkan,
y yakunnaq tsunyaq sitiumanmi tikrashqa.+
13 Noqa Jehovä pëwan cölerashqa kaptïmi tsëchöqa ni pï kawanqanatsu,+
y imëpis tsunyaq sitiullam kanqa.+
Babiloniapa llapan pasaqkunam mantsakashqa rikaräyanqa,
y imëka mana allikunata pasanqampitam burlakur wichyayanqa.+
Tsëmi llapëki flechakuna alistëta yachaqkuna, mëtsë lädupa pëkunawan pelyaq ëwayë.
Flëchëkikunata mana llakipar,* pëkunata flëchar ushayë.+
15 Mëtsë lädupa pëkunawan pelyaq ëwar
guërrachö këkaqnö büllayë.
Pëqa pëwan pelyëkaqkunamannam entregakushqa.
Portakuyanqanmannö noqa Jehovä castigashqa kaptïmi,+
columnankunapis y murällankunapis ushakashqa këkan.+
Pëpita vengakur, wakinkunata ruranqannölla kikintapis rurayë.+
16 Babiloniachö murukoqta y cosëcha tiempuchö ösi utilizaqta ushakätsiyë.+
Espädawan mana llakipar* wanutsiyänanta mantsarmi, pïmëpis markankunata kutikuyanqa.
Awmi, täkuyanqan* kinrëtam qeshpir ëwakuyanqa.+
17 Israelpita nunakunaqa, leonkunata mantsar+ wakpa këpa ëwakoq üshakunanömi+ mëtsëchö ushayashqa. Puntataqa Asiriachö gobernaqmi, mikoq cuenta imëkata rurashqa.+ Tsëpitanam Babiloniachö gobernaq Nabucodonosorna, tullunkunata jaqcheq cuenta imëkata rurashqa.+ 18 Tsëmi noqa Israel nunakunapa Diosnin, angelkunata mandaq Jehovä këta nï: ‘Asiriachö gobernaqta castiganqänöllam, Babiloniachö gobernaqta y nacionnintapis castigashaq.+ 19 Üshä cuenta Israelpita nunakunatam qewankunaman kutitsimushaq,+ y Carmëlu kinrëchö y Basan+ kinrëchömi pärayanqa, Efrain+ kinrë jirkakunachö y Galaad+ kinrëchömi, pacha junta mikuyanqa’”.
20 “Tsë junaqkunaqa y tsë tiempuqa,
kawëkar quedaqkunatam perdonashaq.+
Tsëmi Israelpita nunakuna mana allikunata rurayanqanta,
y Judäpita nunakuna jutsata* rurayanqanta ashirpis,
manam tariyanqatsu” ninmi Teyta Jehovä.
21 “Meratäim kinrëpita nunakunawan, y Pecodpita+ nunakunawan pelyaq ëwayë.
Llapankunata wanutsir ushakätsiyë” ninmi Teyta Jehovä.
“Qamkunata mandanqänölla llapanta rurayë.
22 Entëru nacionchömi guërrachö büllayanqan wiyakan,
y imëka mana allikunam pasakuykan,
23 ¡Mëtsë nacionkunata ushakätseq combam feyupa pakir ushakashqa!+
¡Babiloniata pasanqanta rikarmi mëtsë nacionpita nunakuna alläpa mantsakäyanqa!+
24 Babiloniapita nunakuna, qamkunapaq churanqä trampamanmi
mana cuentata qokushpa,
kikillëkikuna ishkiyarqunki.
Noqa Jehoväpa conträ kayaptikim ashiyäshurniki prësuyäshurqunki.+
25 Noqa Llapanta Gobernaq angelkunata mandaq Teyta Jehoväqa,
Caldëapita nunakunapa nacionninchömi trabäjuta rurashaq.
Tsëmi noqa Jehoväqa alläpa cölerashqa karnin,
churaränan sitiupita imëka armakunata jipikämü.+
Gränuta montonaqnö, pëkunapa ayankunata montonayë.
Pëkunataqa llapanta ushakätsiyë,+
y ama ni pï kawëkar quedatsuntsu.
27 Mallwa törunö kaq nunakunata ushakätsiyë.+
Llapankunata wanutsiyë. ¡Allaw tsë nunakuna!
¡Castïguta chaskiyänan junaqmi,
pëkunaman chämushqa!
28 Babiloniapita qeshpir ëwakoqkuna büllayanqanmi wiyakan.
Pëkunaqa templüta ushakätsiyanqampita,+
Babilonia nunakunata noqa Jehovä castiguëkanqäta
Sionchö willakuyänampaqmi qeshpir ëwakuykäyan.
29 Babiloniapita nunakunaqa allish tukurmi
Israel nunakunapa Limpiu Diosnin+ Jehoväpa contran kayashqa.
Tsëmi Babiloniapita nunakunawan pelyayänampaq,
flechakuna alistëta yachaq nunakunata qayatsiyë.+
Babiloniapa entëru lädunman churakäyë,
y ama ni pï qeshpir ëwakunanta dejayëtsu.+
Wakinkunata rurayanqannölla kikinkunatapis rurayë.+
30 Tsëmi jövinkunatapis pläzankunachö wanutsiyanqa o wañutsiyanqa,+
tsë junaqmi llapan soldädunkunatapis ushakätsiyanqa” ninmi Teyta Jehovä.
31 Llapanta Gobernaq angelkunata mandaq Teyta Jehoväqa këtam nin:
“Babiloniapita allish tukoq nunakuna,+ ¡rikäyë! Qamkunapa contrëkikunam këkä.+
Ichikllachönam juzgashqa kayanëki junaq chämunqa. Awmi, ichikllachönam castigashqa kayanëki tiempu chämunqa.
32 Allish tukoq nunakuna, trompizarmi ishkir ushayanki,
y manam ni pï sharkatsiyäshunkitsu.+
Markëkikunatam ninawan tsaritsishaq, tsë nina ëwarmi
llapan amänuykikunachö kaqkunata ushakätsinqa”.
33 Angelkunata mandaq Teyta Jehovämi këta nin:
“Israelpita y Judäpita nunakunataqa,
nacionninkunaman apaqkunam alläpa sufrikätsiyan.+
Y nacionninkunachö katseqkunaqa, manam libri dejëta munayantsu.+
34 Peru Yapë Ranteqninkunaqa alläpa puëdeqmi.+
Pëpa jutinqa angelkunata mandaq Jehovämi.+
Pëmi yamëna+ kawakuyänampaq pëkunata defendinqa,+
y Babiloniapita nunakunamanmi
imëka mana allikunata chätsimunqa”.+
35 Teyta Jehoväqa këtapis ninmi: “Espädankunawan shamurmi Caldëapita y Babiloniapita nunakunata,
dirigeqninkunata y tsëchö musyaq nunakunata ushakätsiyanqa.+
36 Espädankunawan shamurmi willakoq tukoqkunata,* y upanö portakoqkunata ushakätsiyanqa.
Y espädankunawan shamur pelyëta yachaq puëdeq soldädunkunata ushakätsiyaptinmi,
alläpa mantsakashqa quedayanqa.+
37 Espädankunawan shamurmi cawallunkunata, guërrapaq carrëtankunata
y tsë kinrëchö mëtsë nacionpita nunakunata ushakätsiyanqa.
Tsëmi tsë nunakunaqa, warmikunanö kallpannaq tikrayanqa.+
Y espädankunawan shamurmi, väleq cösasninkunata y imëkankunata apakuyanqa.+
38 Pëkunaman shamurmi yakunkunatapis tsakitsiyanqa.+
Tsënöqa kanqa, tsë kinrëchö mëtsika santukuna kaptinmi,+
y mantsakëpaq revelacionkunata chaskirmi, pëkunaqa löcunö portakuyan.
39 Tsëmi tsë kinrëchöqa, tsunyaq sitiuchö päraq animalkuna,
awllaq animalkuna y avestruzkunallana pärayanqa.+
Tsë kinrëchöqa manam ni pï kawanqanatsu,
y imëyaqpis tsunyaq sitiullanam kanqa”.+
40 Teyta Jehovämi këta nin: “Sodöma, Gomörra+ y amänunchö markakunata+ ushakätsiptï, tsëchö ni pï mana kawanqannömi, tsë kinrë markakunachöpis mana ni pï kawanqanatsu.+
41 ¡Rikäyë! Norti lädupita y patsapa mas karu kuchumpitam,+
puëdeq nacionpita nunakuna y puëdeq gobernaqkuna,+
qamkunaman shayämunqa.
42 Flechakuyänanwan y lanzankunawanmi shamuykäyan.+
Pëkunaqa alläpa mana allim kayan, y manam ichikllapis llakipäyäshunkitsu.*+
Cawallunkuna montashqa shayämuptinqa, lamar büllanqannömi wiyakan.+
Guërraman ëwaqnömi llapankuna juntu,
qamkuna Babiloniapita nunakunawan pelyaq shamuykäyan.+
Y wamran yuriptin warmi sufrinqannömi,
pëpis alläpa sufrinqa.
44 ¡Rikäyë! Jordan kinrëchö mana alli plantakunapita yarqamur, animalkuna següru kawakuyanqan sitiukunaman ëwaq leonnömi, juk nuna shamunqa. Peru juk rätullachömi, kë kinrë markakunapita qeshpir ëwakunanta permitishaq. Tsë kinrë markakunata rikänampaqmi, akranqä nunata churashaq.+ Tsëkunata ruraptïqa, ¿piraq noqanö kanman? ¿Piraq noqawan discutinman? ¿Mëqan mitsikoqraq noqapa conträ kanman?+ 45 Tsëqa Babiloniapita y Caldëapita nunakuna, noqa Jehovä qamkunapaq decidinqäta wiyayë:+
Üshëkikunapa wawankunatam qaracharkur apakunqa, y mana allikunata rurayanqëkipitam
kawayanqëki markakunatapis tsunyaq sitiutanö dejanqa.+
46 Babiloniata duëñutsakushqa kayaptinmi entëru patsapis kuyushqa,
y büllayanqanqa mëtsë nacionkunayaqmi wiyakan”.+