Juan

6 Tsëpitanam Jesusqa Galilëa o Tiberiädis+ niyanqan qochapa* wak tsimpanta ëwakurqan. 2 Qeshyëkaqkunata alliyätsir milagrukunata ruranqanta rikarmi,+ mëtsikaq nunakuna pëpa qepanta ëwayarqan.+ 3 Tsëmi Jesusqa jirkaman witsar qateqninkunawan tsëchö jamayarqan. 4 Judïukuna rurayanqan Pascua Fiestam+ ichikllachöna kanan karqan. 5 Ñukirkur* mëtsika nunakuna shamuykäyanqanta rikëkurnam, Jesusqa Felïpita kënö tapurqan: “¿Mëpitaraq tantata rantishun kë nunakuna mikuyänampaq?”.+ 6 Pëqa musyarqannam imata ruranampaq kaqta. Tsënö kaptimpis, pruëbaman churëta munarmi tsënö tapurqan. 7 Felïpinam nirqan: “Doscientus denariuspa* tantata rantishqapis, manachi ichikllata mikuriyänampaqpis tinkunmantsu”. 8 Tsënam qateqninkunapita juknin kaq, Simon Pëdrupa wawqin Andres, kënö nirqan: 9 “Këchö këkaq wamram cebädapita pitsqa tantata y ishkë taksha pescäduta këkätsin. Peru manachi tsëtsika nunapaqqa tinkunmantsu”.+

10 Jesusnam, “nunakunata jamakuyänampaq niyë” nirqan. Tsë sitiuchö mëtsika qewa kaptinmi, nunakunaqa tsëman jamakuyarqan, y ollqukunaqa cincu milnömi kayarqan.+ 11 Tsënam Jesusqa tantata aptarkur Teyta Diosta agradecikurir tsëchö këkaqkunata qararqan, y tsënöllam taksha pescädukunawampis rurarqan. Llapankunam pacha junta mikuyarqan. 12 Pacha junta mikuriyaptinnam Jesusqa qateqninkunata, “ichikllapis mana perdinampaq, llapan sobrata juntayämuy” nirqan. 13 Tsëmi döci canasta junta, pitsqa cebäda tantapita sobranqanta juntayarqan.

14 Ruranqan milagruta rikëkurmi nunakunaqa, “pëqa rasumpam nunakunaman shamunampaq kaq Diospa willakoqnin”+ niyarqan. 15 Tsënam Jesusqa, nunakuna shamur y amälas apëkur gobernaqninkuna kanampaq churëta munayanqanta musyar,+ jirkata japallan ëwakurqan.+

16 Paqasyarkuptinnam, qateqninkunaqa qochaman uräyarqan,+ 17 y Capernaumman chäyänampaqmi barcuman yëkur qochata tsimpar qallëkuyarqan. Ampina o tsakëna* kaptimpis, Jesusqa manam pëkunawan junturaqtsu këkarqan.+ 18 Fuertipa vientuptinmi, qochaqa laqcheqsar qallëkurqan.+ 19 Barcuta pitsqa o joqta kilömetrutanö* avanzatsishqa këkarnam, barcu kaqman yaku janampa Jesus ëwëkanqanta rikëkur alläpa mantsakäyarqan. 20 Tsënam pëqa, “¡ama mantsakäyëtsu! Noqam kä” nirqan.+ 21 Tsënö niptinmi barcuchö kushishqa chaskiyarqan, y tsëllanam ëwëkäyanqan sitiuman barcu chärirqan.+

22 Waränin junaqnam, qochapa wak tsimpanchö quedakoq nunakunaqa ni ima barcutapis tsëchö rikäyarqannatsu. Qanyannin junaqqa juk taksha barcum tsëchö karqan. Jesuspa qateqninkunaqa tsë barcuwanmi ëwakushqa kayarqan, y Jesusqa manam tsë barcuman yëkushqatsu karqan. 23 Tsënam Teyta Diosta Señor agradecikuriptin nunakuna tantata mikuyanqan sitiupa amänunman, Tiberiädispita barcukuna chäriyarqan. 24 Ni Jesus ni qateqninkuna tsëchö mana këkäyanqanta rikarnam, barcukunawan Jesus asheq Capernaumta ëwayarqan.

25 Qochapa wak tsimpanchö tarïkurnam, “Maestru,+ ¿imëtan këman chämurqunki?” nir tapuyarqan. 26 Tsënam Jesusqa kënö contestarqan: “Rasunllatam qamkunata nï, qamkunaqa manam milagrukunata rikashqa kartsu ashiyämanki, sinöqa tantata pacha junta mikushqa karllam.+ 27 Ama ushakaqlla mikuypaqqa trabajayëtsu, sinöqa Nunapa Tsurin qarayäshunqëki mana ushakaq y imëyaqpis kawëman chätsikoq+ mikuypaq trabajayë. Pëpa cäsunchöqa, kikin Teyta Diosmi rikëninchö alli këkanqanta cläru musyatsikushqa”.*+

28 Tsënö niptinnam, “tsëqa, ¿imatataq rurayänä Teyta Diospa rikëninchö alli kayänäpaq?” nir tapuyarqan. 29 Tsënam Jesusqa, “Teyta Dios munanqanta rurayänëkipaqqa, pë mandamunqan kaqmanmi markäkuyänëki o yärakuyänëki”+ nirqan. 30 Tsënö niptinnam pëkunaqa niyarqan: “¿Ima milagrutataq+ ruramunki tsëta rikar creiyänaqpaq? ¿Ima trabäjutataq qamqa rurëkanki? 31 ‘Mikuyänampaqmi ciëlupita mikuyta shikwatsimurqan’+ nir qellqarëkanqannömi, unë kastantsikkunaqa tsunyaq sitiuchö manäta mikuyarqan”.+ 32 Tsënam Jesusqa nirqan: “Rasunllatam qamkunata nï,* Moisesqa manam ciëlupita rasumpa mikuytatsu* pëkunata qararqan, peru Teytämi sïqa ciëlupita rasumpa mikuyta qarayäshunki. 33 Diospita shamoq mikuyqa* ciëlupita urämoq kaqmi, y imëyaqpis kawayänampaqmi nunakunata yanapan”. 34 Tsënö niptinnam, “Teytë, tsë mikuyta* imëpis qarayämë” niyarqan.

35 Tsënam Jesusqa nirqan: “Noqam kä imëyaqpis kawatsikoq mikuyqa.* Noqaman shamoqqa, manam imëpis mallaqanqanatsu, y noqaman markäkoqqa o yärakoqqa, manam imëpis yakunanqanatsu.+ 36 Peru qamkunata ninqänöpis: qamkunaqa rikëkämarpis, manam creiyankitsu.+ 37 Teyta entregamanqan kaqkunaqa noqamanmi shayämunqa, y noqaman shamoqtaqa manam imëpis despreciashaqtsu.+ 38 Noqaqa manam kikï munanqäta ruraqtsu ciëlupita urämurqö,+ sinöqa mandamaqnï munanqanta ruraqmi.+ 39 Mandamaqnïqa munan entregamanqan kaqkunapita mëqantapis mana oqranätam,+ sinöqa ushanan kaq junaqchö pëkunata kawaritsimunätam. 40 Teytäqa munan Tsurita chaskeqkuna y pëman markäkoqkuna o yärakoqkuna, imëyaqpis kawëta tariyänantam,+ y noqam ushanan kaq junaqchö pëkunata kawaritsimushaq”.+

41 Tsënam judïukunaqa, “noqam kä ciëlupita urämoq mikuyqa”* nishqa kaptin, pëpaq mana allita parlar qallëkuyarqan.+ 42 Kënömi niyarqan: “¿Pëqa manaku Josëpa tsurin Jesus? ¿Manaku papäninta y mamänintapis reqintsik?+ Tsëqa, ¿imanirtan kananqa, ‘noqaqa ciëlupitam urämurqö’ nin?”. 43 Tsëta wiyarnam Jesusqa nirqan: “Amana qamkunapura noqapaq mana allita parlar kayënatsu. 44 Mandamaqnï Teyta mana pushamuptinqa, manam ni pï noqaman shamuyta puëdintsu.+ Noqaman shamoq kaqtaqa noqam ushanan kaq junaqchö kawaritsishaq.+ 45 Diospa willakoqninkuna qellqayanqanchömi, ‘llapankunatapis Jehovämi yachatsinqa’+ nir qellqarëkan. Teytata wiyakoqkuna y pëpita yachakoqkunaqa, noqamanmi shayämun. 46 Diospita shamoq kaqllam Teytata rikashqa,+ tsëpita masqa manam ni pï rikashqatsu. Awmi, pëllam Teytataqa rikashqa.+ 47 Rasunllatam qamkunata nï,* noqaman creeqqa imëyaqpis kawëtam tarinqa.+

48 Noqam kä imëyaqpis kawatsikoq mikuyqa.*+ 49 Unë kastëkikunaqa tsunyaq sitiuchömi manäta mikuyarqan, tsënö karpis wanuyarqanmi o wañuyarqanmi.+ 50 Peru ciëlupita urämoq mikuyta* mikoqqa manam wanunqatsu. 51 Noqam kä ciëlupita urämoq kawëkaq mikuyqa.* Pï nunapis kë mikuyta mikurqa, imëyaqpis kawëtam tarinqa. Cuerpümi nunakuna kawayänampaq entreganäpaq kaq mikuy”.+

52 Tsënö niptinnam judïukunaqa kikinkunapura discutir, “¿imanötan kë nunaqa cuerpunta mikunapaq qaramashwan?” niyarqan. 53 Tsënam Jesusqa nirqan: “Rasunllatam qamkunata nï,* Nunapa Tsurimpa cuerpunta mana mikur y yawarninta mana upurqa, manam kikikikunachö kawëyoqtsu kayanki.+ 54 Cuerpüta mikoq y yawarnïta upoqqa, imëyaqpis kawëtam tarinqa, y noqam ushanan kaq junaqchö kawaritsimushaq.+ 55 Cuerpümi rasumpa kaq mikuy,* y yawarnïmi rasumpa kaq upuna. 56 Cuerpüta mikoq y yawarnïta upoqqa, noqawanmi imëpis juknölla këkan, y noqapis pëwanmi imëpis juknölla këkä.+ 57 Kawëkaq Teytam mandamashqa, y Teytarëkurmi kawëkä. Tsënöllam noqapa cuerpüta mikoqpis noqarëkur kawanqa.+ 58 Këmi ciëlupita urämoq mikuyqa.* Këqa manam unë kastëkikuna mikuyanqan mikuynötsu, pëkunaqa tsëta mikuykarpis wanuyarqanmi o wañuyarqanmi. Peru kë mikuyta mikoqqa imëyaqpis kawëtam tarinqa”.+ 59 Capernaumchö Diosta adorayänan wayichö* yachatsikuykarmi, pëqa tsëkunata nirqan.

60 Tsëta wiyëkurnam atskaq qateqninkunaqa, “kë yachatsikamunqanqa ofendikuypaqmi, ¿piraq wiyëta munanman?” niyarqan. 61 Peru qateqninkuna tsëpaq parlëkäyanqanta musyarmi Jesusqa kënö nirqan: “¿Tsëtaku espantakuyanki? 62 Tsëqa, ¿imanöraq kayankiman unë kanqanman witsëkaqta Nunapa Tsurinta rikarnäqa?+ 63 Santu espïritum imëyaqpis kawëman chätsikun,+ y manam kikinkunallaqa nunakuna tsëta logrëta puëdiyantsu. Noqa niyanqaqqa santu espïritupitam shamun, y imëyaqpis kawëta tariyänëkipaqmi yanapakun.+ 64 Tsënö kaptimpis, wakinnikiqa manam creiyankitsu”. Awmi, Jesusqa qallanampitanam pikuna mana creiyanqanta, y pï traicionanampaq kaqta musyarqan.+ 65 Y kënöpis nirqanmi: “Tsëmi qamkunata nirqö* Teyta mana permitiptinqa ni pï noqaman shamuyta mana puëdinqanta”.+

66 Tsërëkurmi mëtsikaq qateqninkunaqa qepachö dejayanqanman kutikur+ pëwan puriyarqannatsu. 67 Tsënam Jesusqa döci apostolninkunata, “qamkunaqa manam ëwakuyta munayankitsu, ¿aw?” nir tapurqan. 68 Tsënö niptinnam Simon Pëdruqa kënö contestarqan: “Teytë, ¿pimanraq ëwayäman?+ Qamllataq imëyaqpis kawakuypaqqa parlanki.+ 69 Noqakunaqa unëpitanam creiyä y alli musyayä Diospa Limpiu Tsurin kanqëkita”.+ 70 Tsënam Jesusqa nirqan: “Noqam döcikikunata akrarqö* ¿aw?+ Tsënö kaptimpis, qamkunapita jukmi calumniakoq* kanqa”.+ 71 Tsënö nirqa, Simon Iscariötipa tsurin Jüdaspaqmi parlëkarqan. Jüdasqa döci apostolninkunapita këkarmi traicionanan karqan.+