1 Crönicas
28 Tsëpitanam Davidqa Israelchö llapan dirigentikunata Jerusalen markaman qayatsirqan: cada kastakunapa dirigeqninkunata, cada killa sirwiyänampaq grüpukunapa mandaqninkunata,+ mil soldädukunapa mandaqninkunata, cien soldädukunapa mandaqninkunata,+ imëkankunata cuentanchö katseq nunakunapa mandaqninkunata, gobernantipa y tsurinkunapa+ animalninkunata+ cuidaq nunakunapa mandaqninkunata, cortichö trabajaqkunata y puëdeq y yachaq nunakunata.+ 2 Llapan chäriyaptinnam gobernanti Davidqa shëkur* kënö nirqan:
“Wawqilläkuna shumaq wiyarayämë. Noqaqa Jehovä Diosnintsikpa Sagrädu Cäjan churaränampaqmi juk wayita ruratsita munarqä, Diosnintsikpa chakin jarukunannö kanampaq.+ Y imëkatam alistapakurqä.+ 3 Peru Teyta Diosmi kënö nimarqan: ‘Qamqa guërrakunachö pelyarmi mëtsika nunata wanutsirqunki.*+ Tsëmi jutïpa reqishqa kanampaq templuta ruramunkitsu’.+ 4 Tsënö kaptimpis Israelpa Diosnin Jehoväqa, papänïpa familiampitam noqata akramarqan Israelchö imëyaqpis gobernanti kanäpaq.+ Israelchö kastakunapitaqa Judäpa kastantam akrarqan,+ Judäpa kastampitanam papänïpa familianta,+ y papänïpa tsurinkunapitanam noqata akramarqan Israelchö gobernanti kanäpaq.+ 5 Jehovä Dios bendicimaptinmi tsurïkuna mëtsika kashqa+ y tsë tsurïkunapitanam, tsurï Salomonta akrashqa+ Jehovä Diospa gobernar täkunanman jamëkur Israelta gobernanampaq.+
6 Kënömi nimarqan: ‘Tsuriki Salomontam akrarqö wamrä cuenta kanampaq+ y noqam papäninnö kashaq, pëmi noqapaq ruratsimunqa templuta y patiukunatapis. 7 Kanan rurëkanqannö mandakunqäkunata y ninqäkunata cäsukuptinqa,+ imëyaqpis gobernanampaqmi+ churashaq’. 8 Tsëmi kananqa, Jehovä Diospa sirweqninkuna llapëki wiyayämë: Jehovä Diosnintsik mandakunqankunata mana qonqëta cumpliyë. Tsënö cumpliyaptikim entregayäshunqëki alli chakrakunachö+ imëyaqpis kawakuyanki, y wamrëkikunapis tsëchömi kawakuyanqa.
9 Qampis kuyë tsurillä Salomon, sirwinqä Teyta Diosta alli reqï y llapan shonquykiwan* kushishqa sirwï.+ Jehovä Diosqa shonquntsikchö imanö kanqantsikta,+ imata munanqantsikta y imata pensanqantsiktapis musyanmi.+ Mandakunqannö kawakuptikiqa yanapashunkim,+ peru dejariptikiqa, pëpis dejarishunkim.+ 10 Jehovä Diosmi akrashurqunki templunta ruranëkipaq. Tsëqa valienti kë y jinan höra ruratsir qallë”.
11 Tsëpitanam Davidqa tsurin Salomonta plänuta entregarqan+ templuta ruratsinampaq. Tsë plänuchömi këkarqan pasadïzuta+ imanö ruratsinampaq, churakuyänan cuartukunata imanö ruratsinampaq, altuchö cuartukunata imanö ruratsinampaq, rurichö cuartukunata imanö ruratsinampaq y jutsankunata* Teyta Dios perdonanampaq utilizäyanqan cuartuta imanö ruratsinampaq.+ 12 Tsë plänutaqa Teyta Diosmi poderninwan Davidta musyatsirqan, tsë plänuchömi këkarqan Jehoväpa templumpa patiunkunata imanö ruratsinampaq,+ mikuyänan cuartukunata imanö ruratsinampaq, Teyta Diospa väleq cösasninkuna churaränan cuartukunata imanö ruratsinampaq y limpiuta tikratsiyanqan* cösaskunata churayänan cuartukunata imanö ruratsinampaq.+ 13 Tsënöllam alli entienditsirqan sacerdötikuna+ y levïtakuna Jehoväpa templunchö imakunata rurayänampaq y sagrädu cösaskunata Teyta Jehoväpa templunchö imanö utilizäyänampaqpis. 14 Y templuchö utilizänampaq cösaskunata ruratsinampaq örupis y pläta metalpis ëka yëkunampaq kaqtam willarqan. 15 Tsënöllam willarqan candelabruman y candelabruchö ëwaq chiwchikunaman ëka öru yëkunampaq+ kaqta y pläta metalpita candelabruman y candelabruchö ëwaq chiwchikunaman ëka pläta metal yëkunampaq kaqta. 16 Tsënöllam willarqan mësakunata ruratsinampaq ëka öru y pläta metal yëkunampaq kaqta, tsë mësakunaqa kanan karqan Teyta Diospaq* tantakunata churayänampaqmi.+ 17 Tsënöllam willarqan trinchikunaman, tazonkunaman, järrakunaman y taksha tazonkunaman alli kaq öru ëka yëkunampaq+ kaqta, taksha tazonkunaman ëka pläta metal yëkunampaq kaqta. 18 Tsënöllam willarqan inciensuta rupatsiyänan altarman+ y Teyta Diospa carrëtanman+ alli kaq öru ëka yëkunampaq kaqta. Tsë carrëtaqa rikätsikun Jehoväpa Sagrädu Cäjan janampa mashtarëkaq älayoq jatusaq querubinkunatam.+ 19 Davidmi kënö nirqan: “Jehovä Diosmi yanapamashqa y alli entienditsimashqa tsë plänuta+ dibujarnin+ imanö kanqanta llapanta churanäpaq”.
20 Tsëpitanam Davidqa tsurin Salomonta nirqan: “Valienti kë y ama mantsapakuytsu. Jinan höra ruratsir qallë. Sirwinqä Diosnï Jehovämi yanapëkäshunki,+ ama mantsapakuytsu. Pëqa manam dejashunkitsu, y imëpis yanapëkäshunkim.+ Jehoväqa templuta ruratsir ushatsinqëkiyaqmi yanapashunki. 21 Teyta Diospa templunchö yanapakuyänampaqmi sacerdötikuna+ y levïtakunapis+ grüpu grüpuman rakishqa këchö këkäyan. Y yanapayäshunëkipaqqa imëkata rurëta yachaq nunakunam kayan.+ Tsënöllam dirigentikunapis+ y llapan nunakunapis mandanqëkita rurayanqa”.