Josuë
24 Tsëpitanam Josuëqa, Israelchö llapan kastakunata Siquem markachö juntakäyänampaq nirqan. Y autoridäkunata, dirigeqkunata, juezkunata y oficialkunatam qayatsirqan.+ Tsënam pëkunaqa, Teyta Diospa* puntanman juntakäyarqan. 2 Tsënam Josuëqa llapan israelïtakunata nirqan: “Israelpa Diosnin Jehovämi kënö nin: ‘Unë witsanqa Eufratis mayupa* wak tsimpanchömi unë awiluykikuna+ kawayarqan.+ Tsëchömi Abrahanpa y Nacorpa papänin Tarëpis kawarqan. Pëkunaqa santukunatam adorayarqan.+
3 Tiempu pasariptinnam, unë awiluykikuna Abrahanta+ mandarqä Eufratis mayupa* wak tsimpampita ëwakunampaq. Y Canaan markakunapam puritsirqä y familian miranantam permitirqä.+ Tsurin Isaacmi yurirqan,+ 4 tsëpitanam Isaacpa tsurinkuna Jacobwan Esaü+ yuriyarqan. Esaütam Seir jirkata herencian entregarqä,+ y Jacobwan tsurinkunanam Egiptuman uräyarqan.+ 5 Tiempu pasariptinnam, Moisestawan Aaronta+ Egiptuman mandarqä. Y egipciu nunakunatam imëkawan castigarqä.+ Tsëpitanam qamkunata pushamurqä. 6 Y unë kastëkikunata Egiptupita pushamuptï+ y Puka lamarman chäriyaptikim, egipciu soldädukunaqa cawallunkuna montashqa y guërrapaq carrëtankunawan, unë kastëkikunata Puka lamaryaq qatipayämurqan.+ 7 Tsënam unë kastëkikunaqa, noqa Jehoväman qayakayämurqan.+ Tsëmi noqaqa qamkunata salvanäpaq egipciu nunakunapa puntanman yana pukutëta churarqä. Tsëpitanam egipciukunata lamar yakuwan tsaparkurqä.+ Y qamkunaqa Egiptuchö llapan ruranqätam rikäyarqëki.+ Tsëpitanam atska watakunapa tsunyaq sitiuchö kawayarqëki.+
8 Tsëpitanam Jordan mayupa* wak tsimpanchö* amorreu nunakuna kawayanqan markankunaman pusharqä, y pëkunam qamkunawan pelyayarqan.+ Tsë nunakunata wanuratsir markankunapa duëñun tikrayänëkipaqmi qamkunata yanaparqä, y rikëkäyaptikim llapankunata ushakätsirqä.+ 9 Tsëpitanam, Moabchö gobernaq y Ziporpa tsurin Balac qamkunawan pelyarqan. Pëqa maldiciyäshunëkipaqmi Beorpa tsurin Balaamta mandamurqan.+ 10 Peru noqaqa manam Balaamta wiyarqätsu.+ Tsëmi pëqa kutin kutin bendiciyäshurqëki,+ tsënömi pëkunapita qamkunata salvarqä.+
11 Tsëpitanam Jordan mayuta*+ tsimparir Jericö markaman+ chäyarqëki. Tsënam amorreu, perizïta, cananeu, hitïta, guirgaseu, heveu y jebuseu nunakuna y Jericöchö nunakuna* qamkunawan pelyayarqan, y noqam pëkunata venciyänëkipaq yanaparqä.+ 12 Qamkunata mantsayäshunëkipaqmi permitirqä, tsëmi pëkunaqa, amorreu nunakunapa ishkë gobernantinkunanöpis qamkunapita qeshpir ëwakuyarqan.+ Manam espädëkikunawantsu ni flëchana arcuykikunawantsu venciyarqunki, sinöqa noqa yanapaptïmi.+ 13 Tsënömi imatapis mana rurëkäyaptiki listu chakrakunata y listu markakunata herenciëkikuna entregarqä,+ y tsëkunachömi yachakäyarqëki. Y mana plantakushqa këkarmi, üvas y olïvus wayunqantapis mikuykäyanki’.+
14 Tsëmi Jehovä Diosnintsikta respetayänëki y limpiu shonquykikunawan sirwiyänëki.+ Eufratis mayupa* wak tsimpanchö y Egiptuchö unë kastëkikuna adorayanqan santukunatam ushakätsiyänëki,+ y Teyta Jehovällatam sirwiyänëki. 15 Peru Teyta Jehoväta mana sirwita munarqä, kanan akrakuyë pita sirwiyänëkipaq kaqta:+ Eufratis mayupa* wak tsimpanchö+ unë kastëkikuna adorayanqan santukunata kar o kanan këkäyanqëki markakunachö amorreu nunakuna adorayanqan santukunata karpis.+ Peru noqawan familiäqa, Jehovä Diostam sirwiyäshaq”.
16 Tsënam israelïtakunaqa kënö niyarqan: “Noqakunaqa manam Jehovä Diosta imëpis dejayäshaqtsu ni santukunata sirwiyäshaqtsu. 17 Noqantsikta y unë kastantsikkunataqa, Jehovä Diosnintsikmi Egiptuchö+ esclävu kanqantsikpita salvamarqantsik.+ Rikëkashqam imëka milagrukunata rurarqan.+ Y pasamunqantsik markakunachö nunakunapita y shamunqantsik nänichöpis imëkapitam ciudamarqantsik.+ 18 Teyta Jehovämi kanan këkanqantsik markakunata y amorreu nunakunapa markankunapa duëñun tikranapaq yanapamarquntsik. Tsëmi noqakunapis Teyta Jehovällata sirwiyäshaq, pëllam Diosnintsikqa”.
19 Tsënö niyaptinmi, Josuëqa israelïtakunata kënö nirqan: “Qamkunaqa manam Jehovä Diosta sirwita puëdiyankitsu. Pëqa alläpa limpiu Diosmi,+ y pëllata adorayänantam munan.+ Y manam pantayanqëkikunata* ni jutsëkikunata* perdonayäshunkitsu.+ 20 Jehovä Diosta dejarir juk nacion nunakunapa santunkunata sirwiyaptikiqa, qamkunapaq imëka allikunata rurashqa këkarpis, castigayäshunkim y ushakätsiyäshunkim”.+
21 Tsënam israelïtakunaqa Josuëta niyarqan: “Noqakunaqa Teyta Jehovätam sirwiyäshaq”.+ 22 Josuënam israelïtakunata nirqan: “Qamkunaqa kikikikuna munarmi Jehovä Diosta sirwiyänëkipaq decidiyarqunki. Tsëtaqa kikikikunam testïgu kayanki”.+ Y pëkunaqa, “awmi, ¡testïgum kayä!” niyarqanmi.
23 Tsënam Josuëqa nirqan: “Tsëqa, kanan adorëkäyanqëki juk nacion nunakunapa santunkunata ushakätsiyë, y Israelpa Diosnin Jehoväta llapan shonquykikunawan sirwiyë”. 24 Tsënö niptinmi israelïtakunaqa Josuëta niyarqan: “Jehovä Diosnintsiktam sirwiyäshaq, y llapan niyämanqantam cäsukuyäshaq”.
25 Tsë kutim Josuëqa Siquem markachö, imata rurayänampaq kaqta llapan israelïtakunawan parlarir, juk acuerduta rurarqan y juk leyta patsätsirqan. 26 Tsëpitanam Josuëqa llapan parlanqankunata Teyta Diospa Leynin këkanqan libruman qellqarqan,+ y Teyta Jehoväpa carpa* wayin lädunchö jatun montipa o qerupa chakinmanmi jatun rumita churarqan.+
27 Tsëpitanam Josuëqa israelïtakunata nirqan: “Rikäyë, kë rumim Teyta Dios llapan nimanqantsikpita testïgu kanqa,+ kë rumita rikarmi yarpäyanki Jehoväta imëpis mana dejayänëkipaq”. 28 Tsëpitanam Josuëqa israelïtakunata ëwakuyänampaq nirqan, y cada ünum herenciankunaman kutikuyarqan.+
29 Tsëpitanam Jehovä Diospa sirweqnin Josuëqa, cientu diez watayoq këkar wanukurqan o wañukurqan, pëqa Nunpa tsurinmi karqan.+ 30 Y herencian chaskinqan Timnat-Sërah+ markachömi pampayarqan. Tsëqa Gaas jirkapa norti lädunchö Efrainpa kastankunata tocanqan jirkakunachömi karqan. 31 Josuë kawanqan tiempu y israelïtakunapaq Jehovä Dios llapan ruranqanta musyaq dirigentikuna kawayanqan tiempuqa, israelïtakunaqa mana dejëpam Teyta Jehoväta sirwiyarqan.+
32 Egiptupita apayämunqan Josëpa tulluntaqa,+ Hamor jutiyoq nunapa tsurinkunapita Jacob rantinqan chakrachömi israelïtakuna pampayarqan. Tsë chakrataqa, Josëpa tsurinkunata+ tocanqan Siquem markachömi cien pläta qellëwan rantirqan.+ Hamorqa+ Siquem nunapa papäninmi karqan.
33 Tsëpitanam Aaronpa tsurin Eleazarpis+ wanukurqan. Y Finehaspa+ jirkan nir reqiyanqan sitiuchömi pampayarqan (Finehasqa Eleazarpa tsurinmi karqan). Finehaspa jirkanqa, Efrainpa kastankunata tocanqan jirkakunachömi karqan.